రేవంత్ రెడ్డిపై సోనియాకు ఫిర్యాదు… ఆయన కూడా సీరియస్ ?

తాను రేవంత్‌కు ఎలాంటి ఫోన్ చేయలేదని స్పష్టం చేశారు కోమటిరెడ్డి. ఆ ప్రచారంలో నిజంలేదన్నారు. సభకు సంబంధించి తమకు రేవంత్ ఒక్క మాట కూడా చెప్పలేదని ఆయన ఆరోపిస్తున్నారు.

  • రేవంత్ రెడ్డిపై సోనియాకు ఫిర్యాదు
  • సభ విషయంలో ఫిర్యాదు చేసిన కోమటిరెడ్డి
  • రేవంత్ తీరుపై మాణికం ఠాగూర్ సీరియస్

కాంగ్రెస్ పార్టీలో ఇప్పుడు రేవంత్ రెడ్డి, కోమటిరెడ్డి వ్యవహారం హాట్ టాపిక్‌గా మారింది. టీపీసీసీ చీఫ్ రేవంత్ రెడ్డికి కోమటిరెడ్డి ఫోన్ చేసి మాట్లాడినట్లు వస్తున్న వార్తలపై కోమటిరెడ్డి స్పందించారు. ఈ ప్రచారంలో నిజం లేదని ఆయన స్పష్టం చేశారు. ఇబ్రహీంపట్నం సభను వాయిదా వేయాలంటూ రేవంత్‌రెడ్డికి ఫోన్ చేసి చెప్పినట్టు జరుగుతున్న ప్రచారంలో నిజం లేదన్నారు కోమటిరెడ్డి. అంతేకాకుండా రేవంత్ రెడ్డిపై ఆయన కాంగ్రెస్ అధినేత్రి సోనియాకు ఫిర్యాదు చేసినట్లు తెలుస్తోంది. ఈ నెల 18న ఇబ్రహీంపట్నంలో నిర్వహించాలనుకుంటున్న సభ విషయంలో తమకు ఒక్క మాట కూడా రేవంత్ రెడ్డి చెప్పలేదని ఎంపీ కోమటిరెడ్డి సోనియాకు ఫిర్యాదు చేసినట్లు సమాచారం. 

మరోవైపు పార్టీ రాష్ట్ర వ్యవహారాల ఇన్‌చార్జ్ మాణికం ఠాగూర్ కూడా ఇదే విషయంలో రేవంత్ తీరుపై అసంతృప్తి వ్యక్తం చేసినట్టు తెలుస్తోంది. ఆయన కూడా రేవంత్ వైఖరితో అసహనంలో ఉన్నారని సమాచారం. ఆదిలాబాద్ జిల్లా ఇంద్రవెల్లిలో కాంగ్రెస్ ఇటీవల నిర్వహించిన ‘దళిత, గిరిజన ఆత్మగౌరవ దండోరా’ సభ విజయవంతమైన విషయం తెలిసిందే. దీంతో ఇదే నేపథ్యంలో, అదే ఊపుతో ఈ నెల 18న ఇబ్రహీంపట్నంలోనూ ఇదే పేరుతో ఓ సభ నిర్వహించాలని కాంగ్రెస్ భావిస్తోంది. 

ముందుగా సాగర్ హైవే పక్కన పోలీస్ స్టేషన్ సమీపంలో సభ నిర్వహించాలని నిర్ణయించారు. పోలీసులు అనుమతి నిరాకరించడంతో అవుటర్ రింగురోడ్డు పక్కన బొంగుళూరు సమీపంలో స్థలాన్ని పరిశీలిస్తున్నట్టు మాజీ ఎమ్మెల్యే మల్‌రెడ్డి రంగారెడ్డి తెలిపారు. శనివారం నిర్వహించే కాంగ్రెస్ పార్టీ కోర్ కమిటీ సమావేశంలో సభ నిర్వహణపై నిర్ణయం ప్రకటించే అవకాశాలు ఉన్నాయి. మరోవైపు దళిత, గిరిజన దండోరా కార్యక్రమాన్ని రాష్ట్ర వ్యాప్తంగా విజయవంతం చేసేందుకు కాంగ్రెస్ పార్టీ కార్యాచరణ రూపొందిస్తోంది. క్షేత్రస్థాయిలో పార్టీకి చెందిన నాయకులను స్థానిక నేతలతో సమన్వయం చేసుకునేందుకు సమన్వయకర్తలను నియమించింది.

Leave a Reply

%d bloggers like this: