సమిష్టి ప్రయోజనం కోసం ఒక్కరే వెళ్లితే ఇలాంటి విమర్శలు…మెగాస్టార్ కు సిపిఐ నారాయణ హితవు …

సమిష్టి కోసం ఒక్కరు వెళ్ళితే ఎలా … మెగాస్టార్ కు సిపిఐ నారాయణ హితవు …
మీరు చెప్పారు కాబట్టి సరిపోయింది.లేకపోతె ఊహాగానాలకు అవకాశం ఇచ్చినట్లే
ఇండస్ట్రీ కోసం ఒక బృందంగా వెళ్లాల్సి ఉంది.
వన్ టు వన్ లో ఏమి మాట్లాడుకున్నారో అనే అనుమానాలు ఉంటాయి

మెగాస్టార్ చిరంజీవిపై సీపీఐ జాతీయ కార్యదర్శి కె.నారాయణ సుతిమెత్తని విమర్శలు చేశారు. చిరంజీవికి ముఖ్యమంత్రి వైఎస్ జగన్మోహన్ రెడ్డి రాజ్యసభ సీటు ఇవ్వబోతున్నట్లు శుక్రవారం జోరుగా ప్రచారం సాగిన విషయం తెలిసిందే. అయితే, ఈ ప్రచారాన్ని చిరంజీవి తీవ్రంగా ఖండించారు. రాజకీయాలకు తాను పూర్తిగా వదిలేశానని, పదవులు ఆశించే ప్రసక్తే లేదని తేల్చి చెప్పారు. దీంతో చిరంజీవికి రాజ్యసభ సీటు దక్కబోతోందంటూ జరిగిన ప్రచారానికి ఫుల్‌స్టాప్ పడింది.

సీఎం జగన్‌తో చిరంజీవి ఒక్కరే భేటీ కావడంపై సీపీఐ నేత నారాయణ తప్పుపట్టారు. సినీ ఇండస్ట్రీలోని అసోసియేషన్స్‌ని కలుపుకుపోకుండా.. ప్రత్యేక విమానంలో ఆగమేఘాలపై విజయవాడ వచ్చి ముఖ్యమంత్రితో పర్సనల్‌గా వన్ టు వన్ మాట్లాడితే.. ఇటువంటి అనుమానాలు రాకుండా ఎలా ఉంటాయని చిరంజీవిని ప్రశ్నించారు. రాజకీయాలపై తనకు ఎలాంటి ఆసక్తి లేదని చిరంజీవి చేసిన ట్వీట్‌పై సీపీఐ నారాయణ ప్రత్యేకంగా ఓ వీడియోని విడుదల చేశారు.

‘‘మెగాస్టార్ చిరంజీవి నాకు మంచి మిత్రుడు. ఆయనిప్పుడు ఓ వివాదంలో పడ్డారు. రాజ్యసభ సీటు నేను ఆశించలేదు.. అంతా అపార్థం చేసుకున్నారంటూ బాధపడుతూ ట్వీట్ చేశారు. నిజమే, అయితే ఈ సమస్య మీ సొంత సమస్య కాదు.. సినీ ఇండస్ట్రీకి సంబంధించిన పబ్లిక్ సమస్య! సినీ ఇండస్ట్రీకి సంబంధించిన సమస్య అన్నప్పుడు.. ఆ ఇండస్ట్రీలో కొన్ని అసోషియేషన్లు ఉన్నాయి. వాటితో సంబంధం లేకుండా ప్రత్యేక విమానంలో ఆగమేఘాల మీద విజయవాడకు వచ్చి ముఖ్యమంత్రిని పర్సనల్‌గా వన్ టు వన్ కలిశారు.

ఒక టీంతో మీరు రాలేదు. మీరు అక్కడ ఏం మాట్లాడారో మాకు ఎలా తెలుస్తుంది? అందుకే ఇటువంటి వివాదం వచ్చింది. నిజంగా సినిమా ఇండస్ట్రీ సమస్య అయితే.. అసోషియేషన్స్‌తో వచ్చి మాట్లాడాలి. లేకపోతే ఒక్కరే వెళ్లి కలిసి, మీ వ్యక్తిగత సమస్యలు మాట్లాడుకోవచ్చు. వచ్చింది ఒక్కడే అయినప్పుడు ఫిల్మ్ ఇండస్ట్రీకి ల్యాండ్ కావాలా? రాజ్యసభ సీటు కావాలా? వంటి అనుమానాలు సహజంగానే వస్తాయి.

ఆ కథనాలలో వాస్తవం లేకపోవచ్చు. స్వయంగా చిరంజీవి చెప్పారు కాబట్టి ఆ కథనాలు అవాస్తవం అయిఉండొచ్చు. కానీ ఊహాగానాలకు దారితీస్తాయా? లేదా? మీరు అలా వెళ్లడం పొరబాటు కదా? మీ సొంత సమస్య కానప్పుడు.. అసోషియేషన్స్‌ని కలుపుకుపోకుండా మీరు వెళ్లి ఏ విధంగా మాట్లాడతారు? ఎలా పరిష్కారం చేస్తారు? అందుకే అనుమానాలు వచ్చాయి. ఇలాంటి పనులు ఇకపై చేయకండి..’’ అంటూ మెగాస్టార్ చిరంజీవికి సీపీఐ నేత నారాయణ హితబోధ చేశారు.

Leave a Reply

%d bloggers like this: