భార‌త రాష్ట్రప‌తి ఎన్నిక‌ల్లో అధికార ఎన్డీఏ అభ్య‌ర్థిగా బ‌రిలోకి దిగిన ద్రౌప‌ది ముర్ము ఘ‌న విజ‌యం సాధించిన సంగ‌తి తెలిసిందే. ఓట్ల లెక్కింపు పూర్తి కాకుండానే త‌న స‌మీప ప్ర‌త్య‌ర్థి, విప‌క్షాల ఉమ్మ‌డి అభ్య‌ర్థి య‌శ్వంత్ సిన్హాపై భారీ మెజారిటీతో ముర్ము విజ‌యం సాధించారు. ప్ర‌స్తుతం నాలుగో రౌండ్ ఓట్ల లెక్కింపు కొన‌సాగుతోంది. ఈ రౌండ్ పూర్తయ్యాక ముర్ముకు మొత్తం మీద ద‌క్కిన ఓట్లెన్ని అన్న విష‌యం తేల‌నుంది.

ఇదిలా ఉంటే… నేటి రాత్రి 8 గంట‌ల స‌మ‌యంలో ముర్ము త‌న విజ‌యానికి స‌రిప‌డ మేర ఓట్ల‌ను సాధించార‌న్న స‌మాచారం తెలియ‌గానే… ప్రధాని మోదీ నేరుగా ముర్ము నివాసానికి బ‌య‌లుదేరారు. అప్ప‌టికే అక్కడికి చేరుకున్న బీజేపీ జాతీయ అధ్య‌క్షుడు జ‌గ‌త్ ప్ర‌కాశ్ న‌డ్డాతో క‌లిసి ముర్ముతో భేటీ అయిన మోదీ… భార‌త నూత‌న రాష్ట్రప‌తిగా ఎన్నికైన ఆమెకు అభినంద‌న‌లు తెలిపారు. ఈ సందర్భంగా ముర్ము వ్యక్తిత్వాన్ని, విజయాన్ని ఆకాశానికెత్తేసిన మోదీ… ఆమెకు ఓటేసిన ప్రజా ప్రతినిధులను అభినందిస్తూ వరుస ట్వీట్లు చేశారు.

భార‌త 15వ రాష్ట్రప‌తిగా ఎన్నికైన ద్రౌప‌ది ముర్ముకు దేశ‌వ్యాప్తంగా అన్ని వర్గాలు, పార్టీల నుంచి ప్ర‌శంస‌లు వెల్లువెత్తుతున్నాయి. ఇక బీజేపీ నేత‌ల సంబ‌రాల‌కైతే హ‌ద్దే లేకుండా పోయింది. దేశ‌వ్యాప్తంగా బీజేపీ పెద్ద ఎత్తున సంబ‌రాల‌ను మొద‌లుపెట్టింది. ఈ క్ర‌మంలో ఢిల్లీలోని ముర్ము నివాసానికి బీజేపీ అగ్ర నేత‌లు క్యూ క‌ట్టారు. బీజేపీ జాతీయ అధ్యక్షుడు జేపీ న‌డ్డాతో క‌లిసి అంద‌రికంటే ముందు వ‌చ్చిన ప్ర‌ధాని న‌రేంద్ర మోదీ… ముర్ముకు ప్రత్యేకంగా అభినంద‌న‌లు తెలిపారు.

అనంతరం, కేంద్ర హోం శాఖ మంత్రి అమిత్ షా అక్క‌డికి వ‌చ్చారు. ముర్ముకు అభినంద‌న‌లు తెలిపిన అమిత్ షా… త‌న చేతుల‌తో ఆమెకు మిఠాయి తినిపించారు. ఈ ఫొటోల‌ను ఆయ‌న సోష‌ల్ మీడియాలో పంచుకున్నారు. అమిత్ షా అక్క‌డి నుంచి వెళ్లిన కాసేపటికి ర‌క్ష‌ణ శాఖ మంత్రి రాజ్ నాథ్ సింగ్ కూడా ముర్ము నివాసానికి వ‌చ్చి ఆమెకు అభినంద‌న‌లు తెలిపారు.

భార‌త రాష్ట్రప‌తి ఎన్నిక‌ల్లో విప‌క్షాల ఉమ్మ‌డి అభ్య‌ర్థిగా పోటీ చేసిన కేంద్ర మాజీ మంత్రి య‌శ్వంత్ సిన్హా ప‌రిణ‌తి క‌లిగిన రాజ‌కీయ నేత‌గా త‌న‌ను తాను నిరూపించుకున్నారు. రాష్ట్రప‌తి ఎన్నిక‌‌ల్లో తుది ఘ‌ట్ట‌మైన ఓట్ల లెక్కింపులో లెక్కింపు పూర్తి కాకుండానే విజ‌యానికి స‌రిప‌డ ఓట్ల‌ను సాధించిన అధికార ఎన్డీఏ అభ్య‌ర్థి ద్రౌప‌ది ముర్ముకు ఆయ‌న అభినంద‌న‌లు తెలిపారు. అంతేకాకుండా ఓట్ల లెక్కింపు కొన‌సాగుతుండ‌గానే ఆయ‌న త‌న ఓట‌మిని అంగీక‌రించారు. ఈ మేర‌కు గురువారం రాత్రి 9 గంట‌ల స‌మ‌యంలో ఓ ప్ర‌క‌ట‌న విడుద‌ల చేశారు. దానిని ట్విట్ట‌ర్ వేదిక‌గానూ ఆయ‌న పంచుకున్నారు.

అధికార ప‌క్షానికి పూర్తి స్థాయిలో మెజారిటీ ఉంద‌ని తెలిసి కూడా విప‌క్షాల ఉమ్మ‌డి అభ్య‌ర్థిగా పోటీ చేసిన య‌శ్వంత్ సిన్హా ఓటు హక్కు క‌లిగిన ప్ర‌జా ప్ర‌తినిధులు త‌మ ఆత్మ ప్రబోధానుసారం ఓటేయాల‌ని విజ్ఞ‌ప్తి చేసిన సంగ‌తి తెలిసిందే. తాజాగా ఎన్నిక‌ల్లో ఓట‌మి ఖ‌రారు కాగానే.. విజేత ద్రౌప‌ది ముర్ముకు ఆయ‌న అభినంద‌న‌లు తెలిపారు. భార‌త రాష్ట్రప‌తిగా విధి నిర్వ‌హ‌ణ‌లో నిర్భయంగా, నిష్పాక్షికంగా నిర్ణ‌యాలు తీసుకోవాలంటూ ఆయ‌న ముర్ముకు సూచించారు.