డాలర్ రాజ్యంలో డేంజర్ బెల్స్…

డాలర్ రాజ్యంలో డేంజర్ బెల్స్…
-అగ్రరాజ్యం అమెరికాలో భద్రత కరువు …కాల్పుల మోత
-ముగ్గురిని చంపి ఆత్మహత్య చేసుకున్న దుండగుడు!
-నిందితుడు 21 ఏళ్ల యువకుడు
-యకీమాలోని కన్వీనియెన్స్ స్టోర్‌లో ఘటన
-చైనా నూతన సంవత్సర వేడుకల్లోనూ కాల్పులు 10 మృతి
-ఈ ఏడాది ఇప్పటి వరకు 39 కాల్పుల ఘటనలు

డాలర్ రాజ్యం అమెరికాలో డెంజర్ బెల్స్ మోగుతున్నాయి. 50 రాష్ట్రాలు , 30 కోట్లకు పైగా జనాభా కలిగిన ఈదేశంలో ప్రజల భద్రత పై ఆందోళనలు నెలకొన్నాయి. బయటకు వెళ్ళినవారు ఇంటికి తిరిగి వస్తారనే గ్యారంటీ లేకుండా పోయింది . ఎంతసేపటికి అమెరికా …అమెరికా అనే మాటతప్ప అక్కడ ఉన్న గన్ కల్చర్ గురించి ప్రపంచ దేశాలు ఆలోచించకపోవడం దురదృష్టకరం …

ఆదేశంలో ఎదో ఒక మూల తుపాకుల మోత ఇంకా కొనసాగుతోంది. దుండగుల దుశ్చర్యకు ప్రతి రోజూ ఏదో ఒక చోట అమాయకులు ప్రాణాలు కోల్పోతున్నారు. కాలిఫోర్నియాలోని ‘హాఫ్ మూన్ బే’ పట్టణంలో రెండు రోజుల క్రితం ఓ వ్యవసాయ కార్మికుడు సహచరులపై జరిపిన కాల్పుల్లో ఏడుగురు ప్రాణాలు కోల్పోయారు. వీరందరూ చైనాకు చెందిన వారే. అంతకుముందు మోంటెరీ పార్క్ నగరంలో చైనా న్యూ ఇయర్ వేడుకల్లో జరిగిన కాల్పుల్లో 10 మంది మృతి చెందారు.

ఈ రెండు ఘటనలను మర్చిపోకముందే వాషింగ్టన్‌లోని యకీమాలో జరిగిన కాల్పుల్లో ముగ్గురు ప్రాణాలు కోల్పోయారు. ఓ కన్వీనియెన్స్ స్టోర్‌లో ఈ ఘటన జరిగినట్టు పోలీసులు తెలిపారు. నిందితుడు ముగ్గురిని కాల్పి చంపిన కొన్ని గంటల తర్వాత పోలీసులు చుట్టుముట్టడంతో తనను తాను కాల్చుకుని ఆత్మహత్య చేసుకున్నాడు. సర్కిల్ కె మార్కెట్‌లో తెల్లవారుజామున 3.30 గంటలకు ఈ ఘటన జరిగినట్టు పోలీసులు తెలిపారు. నిందితుడిని యకీమా కౌంటీకి చెందిన 21 ఏళ్ల జారిడ్ హడాక్‌గా గుర్తించారు.

కాల్పులు యాదృచ్ఛికంగా జరిగినట్టు పోలీసులు అనుమానిస్తున్నారు. నిందితుడికి, బాధితులకు మధ్య ఎలాంటి విభేదాలు లేవని పోలీసులు తెలిపారు. స్టోర్ లోపలికి నడుచుకుంటూ వెళ్లిన 21 ఏళ్ల నిందితుడు ఒక్కసారిగా కాల్పులు జరిపినట్టు చెప్పారు. స్టోర్ లోపల ఇద్దరిని కాల్చి చంపిన నిందితుడు బయటకొచ్చాక మరొకరిని కాల్చి చంపాడు.

ఈ ఘటన జరిగిన దాదాపు 10 గంటల తర్వాత లూసియానా నైట్‌క్లబ్‌లో జరిగిన కాల్పుల్లో 12 మంది గాయపడ్డారు. ఈ ఏడాది ఇప్పటి వరకు అమెరికాలో 39 కాల్పుల ఘటనలు జరిగినట్టు పోలీసులు తెలిపారు.

దీంతో ఎన్ని ఆశలతో అగ్రరాజ్యం వెళ్లదామనుకున్నవారికి భద్రత పరంగా ఆందోళనలు నెలకొంటున్నాయి. ఒకటి కాదు రెండు కాదు వరస సంఘటనలతో అమెరికాకు చెడ్డపేరు వస్తుంది. డాలర్ రాజ్యంలో డేంజర్ బెల్స్ మోగుతున్నాయి. ఈసంఘటనలకు అడ్డుకట్ట వేయకపోతే అమెరికా వెళ్లనైకొనే వారి సంఖ్య తగ్గటం ఖాయం …

Leave a Reply

%d bloggers like this: