ఉస్మానియా యూనివర్సిటీలో రాహుల్ గాంధీ పర్యటనకు అనుమతి నిరాకరించడంపై తెలంగాణ హైకోర్టులో పిటిషన్ దాఖలైన సంగతి తెలిసిందే. ఈ హౌస్ మోషన్ పిటిషన్ పై హైకోర్టు విచారణ చేపట్టింది. విద్యార్థులు పిటిషన్ లో పేర్కొన్న అంశాలను పరిశీలించాలని ఉస్మానియా వర్సిటీ వీసీని ఆదేశించింది. కాగా, ఈ విచారణకు ప్రభుత్వం, ఉస్మానియా వర్సిటీ తరఫున న్యాయవాదులు హాజరు కాలేదని తెలుస్తోంది.

రాహుల్ గాంధీ తెలంగాణ పర్యటనలో భాగంగా ఈ నెల 7న ఓయూ ఆర్ట్స్ కాలేజీ వద్ద విద్యార్థులతో ముఖాముఖి కార్యక్రమంలో పాల్గొనాలని భావించారు. అయితే, అందుకు ఓయూ కార్యనిర్వాహక మండలి నుంచి అనుమతి లభించలేదు. దాంతో విద్యార్థి సంఘాలు ఈ నిర్ణయానికి వ్యతిరేకంగా నిరసన ప్రదర్శనలు చేపట్టాయి. విద్యార్థి సంఘాల నేతలను పోలీసులు అరెస్ట్ చేశారు. ఈ నేపథ్యంలోనే విద్యార్థులు తెలంగాణ హైకోర్టును ఆశ్రయించారు.