సంజయ్ కుమార్ ఆఫర్ పై మండిపడ్డ జీవన్ రెడ్డి

జగిత్యాల ఎమ్మెల్యే సంజయ్ కుమార్ అసలు ఏ పార్టీలో ఉన్నారని కాంగ్రెస్ పార్టీ సీనియర్ నేత జీవన్ రెడ్డి ప్రశ్నించారు. తనతో కలిసి పనిచేసేందుకు సిద్ధమని అంటున్నారని, ఆయన బీఆర్ఎస్‌లో ఉన్నారని, తాను కాంగ్రెస్ పార్టీలో ఉన్నప్పుడు ఎలా అంటారని నిలదీశారు. సంజయ్ బీఆర్ఎస్ పార్టీలో ఉన్నారని స్పీకర్ చెప్పారని, కాంగ్రెస్‌లో పనిచేసేందుకు తనతో కలిసి వస్తానని సంజయ్ చెబుతున్నారని, నాకు ఆఫర్ ఇచ్చేందుకు ఆయన ఎవరని ప్రశ్నించారు.

నేను పార్టీ మారుతానని సంజయ్‌కి ఏమైనా చెప్పానా అని ఆగ్రహం వ్యక్తం చేశారు. నేను ఏ పార్టీలో ఉన్నానో సంజయ్ కుమార్‌కు తెలియడం లేదా అని ఎద్దేవా చేశారు. అసలు తనకు పార్టీ వీడాలనే ఆలోచన కల్పించింది సంజయ్ కుమార్ కాదా అని అన్నారు. గతంలో కేసీఆర్‌తోనూ తాను కలిసి పనిచేశానని, కానీ సంజయ్ కుమార్ కాంగ్రెస్ పార్టీ వ్యవహారాల్లో జోక్యం చేసుకోవడమేమిటని ప్రశ్నించారు. అసలు సంజయ్ కుమార్ ఏ పార్టీలో ఉన్నారో తెలియదు కానీ ఆయనతో కలిసి ఎలా పనిచేస్తామని అన్నారు.

కాంగ్రెస్ పార్టీతో నాలుగు దశాబ్దాల అనుబంధం తెంచుకోవడం మామూలు విషయం కాదని అన్నారు. సంజయ్ చేసేదంత చేస్తూ శ్రీరంగ నీతులు చెబుతున్నారని విమర్శించారు. ఆయన మాట్లాడే మాటలు వింటుంటే ఆశ్చర్యం వేస్తోందని అన్నారు. అభివృద్ధి కోసం ముఖ్యమంత్రి, ప్రభుత్వంతో కలిసి పని చేస్తానని సంజయ్ కుమార్ చెబుతున్నారని, అందులో తప్పులేదని, కానీ కాంగ్రెస్ వ్యవహారాల్లో జోక్యం ఎందుకు చేసుకుంటున్నారో చెప్పాలని నిలదీశారు.

20 నెలలుగా సంజయ్ కుమార్ నియోజకవర్గంలో చేసిన అభివృద్ధి ఏమిటో అర్థం కావడం లేదని అన్నారు. పార్టీ మార్పు అంశం గురించి మాట్లాడుతూ, తాను ఏ నిర్ణయం తీసుకున్నా రాజ్యాంగబద్ధంగా తీసుకుంటానని స్పష్టం చేశారు. ఇప్పటి వరకు నేను కాంగ్రెస్ పార్టీలోనే ఉన్నానని, అలాగే కొనసాగాలని భావిస్తున్నానని తెలిపారు. కానీ ఈ బంధం తెగిపోతే ఎవరేం చేయగలరని అన్నారు. కానీ ఎక్కడ ఉన్నా అంకితభావంతో పనిచేస్తానని అన్నారు.