- భూముల వేలంపై ప్రభుత్వానికి షాకిచ్చిన రేవంత్
- -అవినీతిపై విచారణ చేపట్టాలని సీబీఐకి ఫిర్యాదు
- -కేసీఆర్ కుటుంబం భూమాఫియాగా మారిందని ఆరోపణ
కోకాపేట భూముల అమ్మకంలో కేసీఆర్ కుటుంబం దోపిడీని పార్లమెంట్‌ దృష్టికి తీసుకెళ్లడంతో పాటు కేంద్ర హోంశాఖ, సీబీఐకి ఫిర్యాదు చేస్తున్నట్లు టీపీసీసీ చీఫ్ రేవంత్ రెడ్డి మీడియాకు వెల్లడించారు.
తెలంగాణ ప్రభుత్వం ఇటీవల వేలం ద్వారా అమ్మిన భూముల వ్యవహారం సీబీఐకి చేరింది. కోకాపేట్‌, ఖానామెట్‌ భూముల అమ్మకాల్లో జరిగిన అవినీతిపై విచారణ చేపట్టాలంటూ టీపీసీసీ అధ్యక్షుడు రేవంత్రెడ్డి సీబీఐ డైరెక్టర్‌కు ఫిర్యాదు చేశారు. ప్రభుత్వ భూములను అనుకూలమైన వారికి కట్టబెట్టారని ఆరోపించిన ఆయన రాష్ట్ర ఖజానాకు రూ.1000-1500 కోట్ల నష్టం జరిగిందని ఫిర్యాదులో పేర్కొన్నారు. దీంతో భూముల అమ్మకంపై తక్షణమే విచారణ జరిపించాలని సీబీఐ డైరెక్టర్‌ను కోరారు.
అనంతరం మీడియాతో మాట్లాడిన రేవంత్ రెడ్డి… కోకాపేట్‌, ఖానామెట్‌ భూముల్లో కేసీఆర్ కుటుంబం గోల్‌మాల్‌కు పాల్పడిందని ఆరోపించారు. కేసీఆర్ కుటుంబసభ్యులు ఇప్పటికే రాష్ట్రంలో ఇసుల మాఫియా, మద్యం మాఫికా నడుపుతున్నారని, తాజాగా వారి కన్ను భూములపైనా పడిందన్నారు. కోకాపేటలో తక్కువ ధరకు భూముల కొన్న ఐదు సంస్థలను వదిలిపెట్టబోమని, తమ వద్ద లెక్కా, పత్రాలు అన్నీ ఆధారాలతో ఉన్నాయని, వాటిని సీబీఐకి సమర్పించామని పేర్కొన్నారు.
అక్రమంగా కొల్లగొట్టిన భూములను తిరిగి గుంజుకుని, వేలం వేయిస్తామని రేవంత్ రెడ్డి స్పష్టం చేశారు. కోకాపేట భూముల అమ్మకంలో దోపిడీని పార్లమెంట్‌ దృష్టికి తీసుకెళ్లడంతో పాటు కేంద్ర హోంశాఖ, సీబీఐకి ఫిర్యాదు చేస్తున్నట్లు వెల్లడించారు. మై హోం రామేశ్వర్రావుతో పాటు సీఎస్‌ సోమేశ్‌కుమార్‌, సీనియర్ ఐఏఎస్లు జయేశ్ రంజన్, అర్వింద్ కుమారులు ఈ అక్రమాలకు అండగా నిలుస్తున్నారని రేవంత్ ఆరోపించారు. కాపేట భూముల అమ్మకాలకు రాష్ట్రంలో ఈ ప్రొక్యూర్‌మెంట్‌ సంస్థ ఉండగా.. కేంద్ర ప్రభుత్వ రంగ సంస్థ ఎంఎస్‌పీసీ ద్వారా టెండర్లు పిలవాల్సిన అవసరం ఏం ఉందని నిలదీశారు.
టెండర్లలో ఎవరెవరు బిడ్లు దాఖలు చేశారు? వారి పేర్లను ప్రభుత్వం ఎందుకు వెల్లడించడం లేదని రేవంత్ నిలదీశారు. టెండర్లలో పాల్గొనే సంస్థల సమర్థతను టెక్నికల్‌ బిడ్లలో చూడకపోతే దావూద్‌ ఇబ్రహీం వంటి వారూ భూములు కొనుక్కునే ప్రమాదం ఉంటుందన్నారు. కోకాపేట, ఖానామేట్‌లో తక్కువ ధరలకు అమ్మిన భూములన్నీ కేసీఆర్ బినామీలు, సన్నిహితులు, బంధువులే సొంతం చేసుకున్నారని రేవంత్రెడ్డి ఆరోపించారు. ఈ వేలంలో రామేశ్వర్ రావు కంపెనీలు 18 ఎకరాలు కొన్నారని, సిద్దిపేట కలెక్టర్ వెంకట్ రామిరెడ్డి సంస్థ రాజ పుష్ప 7 ఎకరాలు కొనుగోలు చేసిందని తెలిపారు. దీనిద్వారా ఆక్వాస్పెస్ సంస్థ రూ. 390 కోట్లు, రాజపుష్ప సంస్థ రూ.138 కోట్లు లాభం గడించాయయని, రూ.3 వేల కోట్లు రావాల్సిన భూములను.. రూ.2 వేల కోట్లకే పరిమితం చేశారని సీబీఐకి ఇచ్చిన లేఖలో రేవంత్ వివరించారు.
ప్రస్తుతం అమ్మిన భూముల్లో 50 అంతస్తుల భవనాలకు అనుమతి ఇవ్వబోతోందని, తెలంగాణ రాష్ట్ర ప్రభుత్వ ఖజానాకు రూ.వెయ్యి కోట్ల లూటీ జరిగిందని ఆరోపించారు. రాజ పుష్ప సంస్థ నిబంధనల విధంగా రియల్ ఎస్టేట్ వ్యాపారం చేస్తోందని రేవంత్రెడ్డి మండిపడ్డారు. సీఎం కేసీఆర్ దోపిడీ పరాకాష్టకు చేరుకుందని, ఆయన్ని జైలుకు పంపుతామని ప్రగల్భాలు చేస్తున్న బీజేపీ నేతలు బండి సంజయ్, కిషన్రెడ్డి దీనిపై ఎలా స్పందిస్తారని ఆయన ప్రశ్నించారు.
