పులివెందుల కానీ, విజయవాడ కానీ.. సీఎం ఎక్కడుంటే అదే రాజధాని: మంత్రి మేకపాటి!
-సీఎం నివాసం ఉన్న చోటే రాజధాని
-శ్రీబాగ్ ఒప్పందం ప్రకారమే మూడు రాజధానుల నిర్ణయం
-జగన్ నిర్ణయానికి మేమంతా కట్టుబడి ఉన్నాం
ఇప్పటికే ఏపీ రాజధాని అంశంపై పెద్ద ఎత్తున చర్చ జరుగుతోంది. వైసీపీ ప్రభుత్వం అధికారంలోకి వచ్చిన తర్వాత మూడు రాజధానుల అంశం తెరపైకి వచ్చింది. అమరావతిని శాసన రాజధాని, కర్నూలును న్యాయ రాజధాని, వైజాగ్ ను పాలన రాజధానిగా చేస్తామని నిర్ణయం తీసుకుంది. అయితే ఏపీ ప్రభుత్వ నిర్ణయాన్ని విపక్షాలు తప్పుపడుతున్నాయి. అలాగే, మూడు రాజధానుల అంశం ప్రస్తుతం హైకోర్టులో ఉంది. అందువల్ల దీనిపై నిర్ణయం తీసుకోవడం సాధ్యం కాదు . ఒకవైపు కోర్టుల్లో కేసు ఉండగానే కేంద్రం వైజాగ్ రాజధాని అంటూ లోకసభలో ఒక ప్రశ్నకు సమాధానం చెప్పింది.దీంతో కేంద్రం వైజాగ్ రాజధానిగా అంగీకరించే విధంగా అర్థం రావడంపై పెద్ద రాద్దాంతమే జరిగింది. దీనిపై కేంద్రం వివరణ ఇచ్చింది. వైజాగ్ ఏపీ రాజధాని కాదు కాదు అంటూ తెలిపింది. అయితే ఏపీ లో అధికారంలో ఉన్న రాష్ట్ర ప్రభుత్వం మూడు రాజధానుల విషయంలో తన స్టాండ్ క్లియర్ గానే ప్రకటించింది. శాశనసభ లో తీర్మానం ద్వారా రాజధానిని ఏర్పాటు చేసుకొనే అధికారం రాష్ట్రాలకు ఉన్నందున ఆ మేరకే అసెంబ్లీ తీర్మానం ప్రకారం తాము విశాఖ ను రాజధానిగా ఎంపిక చేశామని స్పష్టం చేసింది. సీఎం ఎక్కడ ఉంటె అక్కడే రాజధాని అని పేర్కొన్నది. సీఎం పులివెందులలో ఉన్న ,లేక విజయవాడలో ఉన్న , విశాఖలో ఉన్న అదే రాజధాని అని రాజధానికి రాజ్యంగంలో సరైన నిర్వచనం లేదని కేంద్రం సైతం రాష్ట్ర హై కోర్ట్ కు అఫిడవిట్ ఇచ్చింది.
రాజధాని వ్యవహారంలో చర్చ జరుగుతుండగా ఏపీ పరిశ్రమల శాఖ మంత్రి మేకపాటి గౌతమ్ రెడ్డి సంచలన వ్యాఖ్యలు చేశారు. ముఖ్యమంత్రి ఎక్కడుంటే అదే రాజధాని అని చెప్పారు. అది పులివెందుల అయినా, విజయవాడ అయినా సీఎం ఉన్న చోటే రాజధాని అనుకోవాలని అన్నారు. సీఎం నివాసం ఎక్కడుంటే అక్కడే రాజధాని, అక్కడే సెక్రటేరియట్ అని చెప్పారు. శ్రీబాగ్ ఒప్పందం ప్రకారమే మూడు రాజధానుల నిర్ణయాన్ని ముఖ్యమంత్రి జగన్ తీసుకున్నారని అన్నారు. జగన్ నిర్ణయానికి తామంతా కట్టుబడి ఉన్నామని చెప్పారు.
