- కేసీఆర్‌కు గుడి కట్టిన టీఆర్ఎస్ కార్యకర్త రవీందర్
- -పార్టీ పట్టించుకోకపోవంతో గుడి అమ్మేస్తానంటూ ప్రకటన
- -వైరల్‌గా మారిన ఫేస్‌బుక్ పోస్టు
కేసీఆర్ గుడిని అమ్మబడును.. తాజాగా సోషల్‌మీడియాలో ఈ ప్రకటన వైరల్‌గా మారింది. కేసీఆర్‌ను దేవుడిగా భావిస్తూ గుడి కట్టిన కార్యకర్తే టీఆర్ఎస్‌లో ఎదురవుతున్న అవమానాలను తట్టుకోలేక ఆ గుడిని అమ్మకానికి పెడుతూ సోషల్‌మీడియాలో పోస్టు పెట్టాడు. మంచిర్యాల జిల్లా దండేపల్లికి చెందిన గుండ రవీందర్ స్వరాష్ట్రం కోసం తపించి ఉద్యమాలు, నిరసనలు, ఆందోళనలు, దీక్షలు చేశారు. 30కిపైగా బైండోవర్ కేసుల్లో పోలీస్‌ స్టేషన్ల చుట్టు తిరిగారు. 2010 నుంచి టీఆర్ఎస్‌లో కొనసాగుతున్న ఆయన కేసీఆర్‌కు వీరభక్తుడు. ఆ అభిమానంతోనే సుమారు రూ.3లక్షల సొంత డబ్బుతో కేసీఆర్‌తో పాటు తెలంగాణ తల్లి, ప్రొఫెసర్ జయశంకర్ సార్ విగ్రహాలను తన ఇంటి ముందు నిర్మించారు.
అయితే పార్టీ కోసం ఎంత కష్టపడుతున్నా కనీస గుర్తింపు, ప్రాధాన్యత దక్కకపోవడంతో రవీందర్ ఆవేదన చెందేవారు. గ్రామంలో ఆయన నిర్వహిస్తున్న కేబుల్ నెట్‌వర్క్‌ను వేరేవారు లాగేసుకోవడం జీవనాధారం పోయింది. దీంతో తనకు న్యాయం చేయాలంటూ పార్టీ నేతలు, ప్రజాప్రతినిధులకు ఎన్నిసార్లు మొర పెట్టుకున్నా ఎవరూ పట్టించుకోలేదు. సీఎం కేసీఆర్, మంత్రి కేటీఆర్‌ను కలిసేందుకు ప్రగతి భవన్ చుట్టూ తిరిగినా ఫలితం లేకుండా పోయింది. దీంతో చాలాసార్లు తెలంగాణ తల్లి విగ్రహం ముందు, తాను కట్టిన కేసీఆర్ గుడి ముందు ధర్నా చేసినా ఎవరూ పట్టించుకోలేదు. పార్టీ తీరుతో విసిగిపోయిన ఆయన ఈ ఏడాది జనవరి 12న టీఆర్ఎస్‌కు రాజీనామా చేసి బీజేపీలో చేరారు.
అప్పటి నుంచి కేసీఆర్ గుడికి ముసుగు వేసిన రవీందర్ పూజలు చేయడం ఆపేశారు. తాజాగా ఆ గుడిని, విగ్రహాన్ని విక్రయించేందుకు సిద్ధమైన ఆయన… దీనికి సంబంధించి ఫేస్‌బుక్‌లో పోస్ట్ పెట్టారు. ఈ పోస్ట్ చూసిన కొందరు టీఆర్ఎస్ నేతలు గుడిని ఎందుకు అమ్మేస్తున్నావని నిలదీస్తుండగా, మరికొందరు మంచిపని చేస్తున్నావని అభినందిస్తున్నావంటూ అభినందిస్తున్నారని రవీందర్ తెలిపారు. కేసీఆర్ గుడిని కొనుగోలు చేసేందుకు ఎవరూ రాకపోతే తానే స్వయంగా కూల్చేస్తానని ఆయన చెబుతున్నారు.
