- గార్లాండ్లో ఓ దుకాణంలో కాల్పులు జరిపిన దుండగుడు
- డెన్వర్లోని ఓ వాణిజ్య ప్రదేశంలో మరో ఘటన
- మృతుల్లో పోలీసు అధికారి, ఇద్దరు మహిళలు
అమెరికాలో తుపాకి మళ్లీ గర్జించింది. డల్లాస్, డెన్వర్లలో జరిగిన కాల్పుల ఘటనల్లో 8 మంది ప్రాణాలు కోల్పోయారు. డల్లాస్లో ఓ దుండగుడు జరిపిన కాల్పుల్లో ముగ్గురు వ్యక్తులు మరణించగా, మరొకరు చావుబతుకుల మధ్య కొట్టుమిట్టాడుతున్నారు. నగర శివారులోని గార్లాండ్ లో ఉన్న ఓ దుకాణంలోకి వచ్చిన దుండగుడు పికప్ ట్రక్లో బయటకువెళ్లి.. మళ్లీ వెంటనే తిరిగి వచ్చి కాల్పులు జరిపాడు. ఆ వెంటనే అదే ట్రక్లో పరారయ్యాడు.
డెన్వర్ సమీపంలో జరిగిన మరో ఘటనలో పోలీసు అధికారి సహా ఐదుగురు ప్రాణాలు కోల్పోయారు. నగర సమీపంలోని ఓ వాణిజ్య ప్రదేశానికి కారులో వచ్చిన నిందితుడు కాల్పులు జరిపాడు. ఈ సందర్భంగా పోలీసులు, నిందితుడికి మధ్య ఎదురు కాల్పులు జరిగాయి. మృతి చెందిన వారిలో ఇద్దరు మహిళలు కూడా ఉన్నట్టు పోలీసులు తెలిపారు.
