ఎయిర్ పోర్టు నుంచి ఒకే కారులో ప్రయాణించిన పుతిన్, మోదీ
- రెండు రోజుల పర్యటన నిమిత్తం ఢిల్లీకి చేరుకున్న రష్యా అధ్యక్షుడు పుతిన్
- విమానాశ్రయానికి స్వయంగా వెళ్లి స్వాగతం పలికిన ప్రధాని మోదీ
- ఇరువురు నేతలు ఒకే కారులో ప్రయాణించి స్నేహబంధాన్ని చాటుకున్న వైనం
- రక్షణ, వాణిజ్యం, ఇంధన రంగాలపై జరగనున్న కీలక చర్చలు
- ఉక్రెయిన్ యుద్ధం తర్వాత పుతిన్ భారత్లో పర్యటించడం ఇదే ప్రథమం
అంతర్జాతీయంగా మారుతున్న రాజకీయ సమీకరణాలు, పశ్చిమ దేశాల ఒత్తిడుల నడుమ రష్యా అధ్యక్షుడు వ్లాదిమిర్ పుతిన్, భారత ప్రధాని నరేంద్ర మోదీ తమ మధ్య ఉన్న అసాధారణమైన స్నేహబంధాన్ని, బలమైన నమ్మకాన్ని మరోసారి ప్రపంచానికి చాటిచెప్పారు. రెండు రోజుల అధికారిక పర్యటన కోసం గురువారం ఢిల్లీకి చేరుకున్న పుతిన్కు ప్రధాని మోదీ స్వయంగా విమానాశ్రయానికి వెళ్లి స్వాగతం పలికారు. ప్రొటోకాల్ను పక్కనపెట్టి మోదీ చూపిన ఈ ప్రత్యేక చొరవ, ఇరు దేశాల మధ్య ఉన్న సంబంధాల లోతుకు అద్దం పట్టింది. విమానం దిగిన వెంటనే ఇరువురు నేతలు ఆత్మీయంగా ఆలింగనం చేసుకున్నారు. అనంతరం, ఇద్దరూ ఒకే వాహనంలో విమానాశ్రయం నుంచి బయలుదేరి వెళ్లారు. ఈ దృశ్యం, కేవలం ఒక సాధారణ ప్రయాణం కాదు.. వ్యూహాత్మక భాగస్వామ్యానికి మించి ఇరువురు నేతల మధ్య ఉన్న వ్యక్తిగత అనుబంధానికి, పరస్పర విశ్వాసానికి నిలువుటద్దంగా నిలిచింది.
ఢిల్లీ విమానాశ్రయంలో ఏర్పాటు చేసిన సాంస్కృతిక ప్రదర్శనను ఇరువురు నేతలు కాసేపు తిలకించి, కళాకారులను అభినందించారు. అనంతరం, పుతిన్ గౌరవార్థం ప్రధాని మోదీ తన నివాసంలో ప్రత్యేక విందు ఏర్పాటు చేశారు. గతేడాది మాస్కో పర్యటనలో మోదీకి పుతిన్ ఇదే తరహాలో ఆతిథ్యం ఇవ్వగా, ఇప్పుడు మోదీ ఆ స్నేహాన్ని రెట్టింపు చేస్తూ ఘనమైన ఆతిథ్యం ఇస్తున్నారు. 2022లో ఉక్రెయిన్తో రష్యా యుద్ధం మొదలైన తర్వాత పుతిన్ భారత్లో పర్యటించడం ఇదే తొలిసారి కావడంతో ఈ పర్యటనకు అంతర్జాతీయంగా అత్యంత ప్రాధాన్యత ఏర్పడింది. భారత్పై అమెరికా పలు ఆంక్షలు విధించిన తరుణంలో ఈ భేటీ జరగడం గమనార్హం.
శుక్రవారం జరగనున్న 23వ భారత్-రష్యా వార్షిక శిఖరాగ్ర సదస్సులో ఇరు దేశాల మధ్య రక్షణ సహకారాన్ని మరింత బలోపేతం చేసుకోవడం, వాణిజ్యం, ఇంధన భాగస్వామ్యం వంటి కీలక అంశాలపై చర్చించనున్నారు. పర్యటనలో భాగంగా పుతిన్కు రాష్ట్రపతి భవన్లో అధికారిక స్వాగతం లభించనుంది. ఆ తర్వాత హైదరాబాద్ హౌస్లో ప్రధాని మోదీతో ఉన్నత స్థాయి చర్చలు జరుపుతారు. అనంతరం మహాత్మా గాంధీ స్మారకం వద్ద నివాళులు అర్పిస్తారు.
ఈ పర్యటనలో ఇరు దేశాల మధ్య పలు కీలక ఒప్పందాలు కుదరనున్నాయి. 2030 వరకు వ్యూహాత్మక ఆర్థిక సహకార అభివృద్ధి కార్యక్రమంపై ఒక ఒప్పందం, భారతీయ కార్మికులు రష్యాకు వెళ్లేందుకు వీలు కల్పించే మరో ఒప్పందంపై సంతకాలు చేసే అవకాశం ఉంది. దీంతో పాటు, యూరేషియన్ ఎకనామిక్ యూనియన్తో భారత్ ప్రతిపాదిస్తున్న స్వేచ్ఛా వాణిజ్య ఒప్పందం (FTA)పైనా చర్చలు జరగనున్నాయి. రష్యా అధ్యక్ష సలహాదారు యూరి ఉషకోవ్ మాట్లాడుతూ, మోదీ-పుతిన్ మధ్య జరిగే ప్రైవేట్ డిన్నర్ ఈ పర్యటనలో అత్యంత కీలకమైన ఘట్టమని పేర్కొన్నారు.
సదస్సు అనంతరం, రాష్ట్రపతి ద్రౌపది ముర్ము ఇచ్చే అధికారిక విందులో పుతిన్ పాల్గొంటారు. అలాగే, రష్యా ప్రభుత్వ ప్రసార సంస్థ ‘ఆర్టీ’ (RT) కొత్త ఇండియా ఛానెల్ను కూడా పుతిన్ ప్రారంభించనున్నారు. ఈ పర్యటన ఇరు దేశాల మధ్య ఉన్న ‘ప్రత్యేక మరియు విశేషాధికార వ్యూహాత్మక భాగస్వామ్యాన్ని’ సమీక్షించుకోవడానికి, దానిని మరింత ఉన్నత స్థాయికి తీసుకెళ్లడానికి ఒక అవకాశమని భారత విదేశాంగ శాఖ ఒక ప్రకటనలో తెలిపింది. రష్యా భారత్కు చిరకాల మిత్రదేశమని, ఇరు దేశాల సంబంధాలు భారత విదేశాంగ విధానంలో ఒక కీలక స్తంభమని స్పష్టం చేసింది.
భారత్కు చేరుకున్న రష్యా అధ్యక్షుడు పుతిన్… స్వయంగా స్వాగతం పలికిన ప్రధాని మోదీ
- ఢిల్లీ సమీపంలోని పాలం ఎయిర్ స్టేషన్లో దిగిన పుతిన్
- పుతిన్, మోదీ ఆత్మీయ ఆలింగనం
- 23వ వార్షిక శిఖరాగ్ర భేటీ భాగంగా సమావేశం కానున్న మోదీ, పుతిన్
రష్యా అధ్యక్షుడు వ్లాదిమిర్ పుతిన్ రెండు రోజుల భారత పర్యటన నిమిత్తం నేడు సాయంత్రం ఢిల్లీకి చేరుకున్నారు. ఆయన పాలం ఎయిర్ స్టేషన్లో దిగగా, ప్రధానమంత్రి నరేంద్ర మోదీ ఆయనకు సాదరంగా స్వాగతం పలికారు. పుతిన్, మోదీ ఆత్మీయంగా ఆలింగనం చేసుకున్నారు. రష్యా-ఉక్రెయిన్ యుద్ధం ప్రారంభమైన తర్వాత పుతిన్ మన దేశానికి రావడం ఇదే తొలిసారి. ఇరుదేశాల 23వ వార్షిక శిఖరాగ్ర సమావేశంలో భాగంగా ఇరువురు దేశాధినేతలు సమావేశం కానున్నారు.
విమానాశ్రయంలో కళాకారుల నృత్యాలతో సంప్రదాయబద్ధంగా స్వాగతం పలికారు. పుతిన్ గౌరవార్థం రాత్రి ప్రధానమంత్రి విందు ఇవ్వనున్నారు. రేపు ఉదయం 11 గంటలకు రాష్ట్రపతి భవన్లో అధికారిక స్వాగతం పలకనున్నారు. అలాగే, 23వ భారత్-రష్యా వార్షిక శిఖరాగ్ర సమావేశంలో పాల్గొంటారు. ఈ సందర్భంగా అణువిద్యుత్తో సహా పలు రంగాల్లో రెండు దేశాల మధ్య కీలక ఒప్పందాలు జరుగనున్నాయి.
భారత్ లో పుతిన్ పర్యటన వేళ దుమారం రేపిన బ్లూమ్బెర్గ్ కథనం
- రష్యాతో కొత్త అణు జలాంతర్గామి లీజు ఒప్పందం లేదన్న కేంద్రం
- బ్లూమ్బెర్గ్ కథనాన్ని తప్పుబడుతూ పీఐబీ ఫ్యాక్ట్-చెక్
- 2019లోనే ఒప్పందం జరిగిందని స్పష్టత
- పుతిన్ భారత పర్యటన నేపథ్యంలో తెరపైకి వచ్చిన వార్తలు
రష్యాతో 2 బిలియన్ డాలర్ల విలువైన అణు జలాంతర్గామిని లీజుకు తీసుకునేందుకు భారత్ కొత్త ఒప్పందం కుదుర్చుకుందంటూ వచ్చిన వార్తలను కేంద్ర ప్రభుత్వం తీవ్రంగా ఖండించింది. ఈ కథనం పూర్తిగా తప్పుదోవ పట్టించేలా ఉందని ప్రెస్ ఇన్ఫర్మేషన్ బ్యూరో (పీఐబీ) గురువారం స్పష్టం చేసింది. ఇరు దేశాల మధ్య కొత్తగా ఎలాంటి ఒప్పందం జరగలేదని తేల్చి చెప్పింది.
రష్యా అధ్యక్షుడు వ్లాదిమిర్ పుతిన్ రెండు రోజుల భారత పర్యటనకు రానున్న నేపథ్యంలో ప్రముఖ వార్తా సంస్థ బ్లూమ్బెర్గ్ ఈ కథనాన్ని ప్రచురించింది. దీనిపై ‘ఎక్స్’ వేదికగా పీఐబీ ఫ్యాక్ట్-చెక్ పోస్ట్ విడుదల చేసింది. ప్రస్తుతం ప్రస్తావనలో ఉన్న జలాంతర్గామి లీజు ఒప్పందం దాదాపు ఆరేళ్ల క్రితం, అంటే 2019లోనే జరిగిందని వివరించింది. ఒప్పందం ప్రకారం, ఈ సబ్మెరైన్ 2028 నాటికి భారత్కు అందనుందని తెలిపింది.
భారత్, రష్యాల మధ్య 78 ఏళ్లుగా బలమైన, స్థిరమైన సంబంధాలు ఉన్నాయని ప్రభుత్వ వర్గాలు పేర్కొన్నాయి. ముఖ్యంగా రక్షణ భాగస్వామ్యం ఇరు దేశాల స్నేహంలో కీలక పాత్ర పోషిస్తోందని తెలిపాయి. గతంలో కేవలం కొనుగోలుదారు-విక్రయదారు సంబంధం నుంచి ఇప్పుడు సంయుక్త పరిశోధన, అభివృద్ధి, ఉత్పత్తి స్థాయికి ఈ బంధం ఎదిగిందని వివరించాయి.
టీ-90 ట్యాంకులు, సు-30 ఎంకేఐ యుద్ధ విమానాలు భారత్లోనే అసెంబుల్ అవుతున్నాయని, బ్రహ్మోస్ వంటి క్షిపణులను సంయుక్తంగా అభివృద్ధి చేస్తున్నాయని గుర్తుచేశాయి. పుతిన్ పర్యటనలో వాణిజ్యం, రవాణా కారిడార్ల వంటి అంశాలపై కూడా చర్చలు జరగనున్నాయి.
విదేశీ పర్యటనల్లో పుతిన్ ఏం తింటారు?.. ఆసక్తికర విషయాలు!
- భారత్ పర్యటనకు రష్యా అధ్యక్షుడు వ్లాదిమిర్ పుతిన్
- సొంత చెఫ్లు, ఆహారంతోనే విదేశీ పర్యటనలు
- ప్రతి వంటకాన్ని పరీక్షించాకే తినే కఠిన నిబంధన
- ఆడంబరాలకు దూరం.. ఇష్టంగా తినేది సింపుల్ ఫుడ్
- పిస్తా ఐస్క్రీమ్ అంటే మాత్రం పుతిన్కు మక్కువ
రష్యా అధ్యక్షుడు వ్లాదిమిర్ పుతిన్ రెండు రోజుల పర్యటన కోసం భారత్కు వస్తున్నారు. 23వ వార్షిక భారత్-రష్యా సదస్సులో భాగంగా ఇరు దేశాల మధ్య కీలక ఒప్పందాలు, చర్చలు జరగనున్నాయి. అందరి దృష్టి దౌత్యపరమైన అంశాలపై ఉండగా, తెరవెనుక మరో కీలక ఆపరేషన్ జరుగుతోంది. అదే.. పుతిన్ ఆహార భద్రత. ప్రపంచ నేతల్లో అత్యంత కట్టుదిట్టమైన ఆహార భద్రతా వ్యవస్థ కలిగిన వారిలో పుతిన్ ఒకరు.
సాధారణ ఆహారం.. అసాధారణ భద్రత!
విదేశీ పర్యటనలకు వెళ్లినప్పుడు పుతిన్.. ఆతిథ్య దేశం లేదా హోటల్ సిబ్బంది వండిన ఆహారాన్ని దాదాపుగా ముట్టుకోరు. ఆయనతో పాటే రష్యా నుంచి ప్రత్యేక చెఫ్లు, సహాయక సిబ్బంది, కొన్నిసార్లు మొబైల్ ఫుడ్ టెస్టింగ్ ల్యాబ్ కూడా వస్తుంది. వంటకు కావాల్సిన సరుకులను రష్యా నుంచే తెచ్చుకుంటారు లేదా స్థానికంగా కొన్నా వాటిని క్షుణ్ణంగా తనిఖీ చేస్తారు. వండిన ప్రతి వంటకాన్ని ఆయన తినడానికి ముందు ప్రత్యేక నిపుణులు రుచి చూసి, ఎలాంటి ప్రమాదం లేదని నిర్ధారించుకుంటారు. అధికారిక విందుల్లో పాల్గొన్నా, ఆయన తినే ఆహారాన్ని మాత్రం సొంత బృందమే వేరుగా సిద్ధం చేస్తుంది.
ఇంతటి కట్టుదిట్టమైన భద్రత ఉన్నప్పటికీ, పుతిన్ తినే ఆహారం చాలా సాధారణంగా ఉంటుంది. ఆడంబరమైన వంటకాల కన్నా పోషకాలున్న సింపుల్ ఫుడ్నే ఆయన ఇష్టపడతారు. ఉదయం పూట తేనెతో రష్యన్ కాటేజ్ చీజ్ (త్వొరొగ్) లేదా గంజి, తాజా పండ్ల రసాలు తీసుకుంటారు. మధ్యాహ్నం, రాత్రి భోజనంలో రెడ్ మీట్ కన్నా చేపలకే ఎక్కువ ప్రాధాన్యత ఇస్తారు. గొర్రె మాంసం కూడా ఇష్టపడతారు. వీటితో పాటు టమాటాలు, కీర దోస వంటి వాటితో చేసిన సలాడ్లు తీసుకుంటారు.
చక్కెర ఎక్కువగా ఉండే డెజర్ట్లు, బేకరీ పదార్థాలకు ఆయన దూరంగా ఉంటారు. అయితే, పిస్తా ఐస్క్రీమ్ అంటే మాత్రం ఆయనకు చాలా ఇష్టమని చెబుతారు. పుతిన్ ఆహారపు అలవాట్లు, ఆయన రాజకీయ ఇమేజ్కు అద్దం పడతాయి. క్రమశిక్షణ, సంప్రదాయం, భద్రతకు అత్యంత ప్రాధాన్యత ఇచ్చే ఆయన వైఖరి, ఆయన తినే ఆహారంలోనూ స్పష్టంగా కనిపిస్తుంది.
