- వైట్హౌస్ కరస్పాండెంట్స్ డిన్నర్లో అధ్యక్షుడిపై హత్యాయత్నం
- నిందితుడు కోల్ టోమస్ అలెన్ను అరెస్ట్ చేసిన భద్రతా సిబ్బంది
- దాడికి ముందు కుటుంబానికి యాంటీ-ట్రంప్ మ్యానిఫెస్టో పంపిన అలెన్
- దోషిగా తేలితే నిందితుడికి జీవిత ఖైదు విధించే అవకాశం
- నిందితుడు క్యాలిఫోర్నియా ఇన్స్టిట్యూట్ ఆఫ్ టెక్నాలజీ పూర్వ విద్యార్థి
వాషింగ్టన్లో జరిగిన వైట్హౌస్ కరస్పాండెంట్స్ డిన్నర్ సందర్భంగా అమెరికా అధ్యక్షుడు డొనాల్డ్ ట్రంప్పై హత్యాయత్నం చేసిన నిందితుడిని ఫెడరల్ కోర్టులో హాజరుపరిచారు. అధ్యక్షుడిపై హత్యాయత్నం, రెండు ఆయుధాల చట్టం ఉల్లంఘనల కింద అతడిపై అభియోగాలు నమోదు చేశారు. ఈ కేసులో దోషిగా తేలితే అతనికి జీవిత ఖైదు పడే అవకాశం ఉందని అధికారులు తెలిపారు.
శనివారం వాషింగ్టన్ హిల్టన్ హోటల్లో ఈ కార్యక్రమం జరిగింది. అధ్యక్షుడు ట్రంప్, ఉపాధ్యక్షుడు జేడీ వాన్స్తో పాటు పలువురు ఉన్నతాధికారులు, జర్నలిస్టులు హాజరయ్యారు. ఈ సమయంలో, కోల్ టోమస్ అలెన్ (31) అనే వ్యక్తి భద్రతను దాటుకుని వేదిక వైపు వెళ్తూ కాల్పులు జరిపాడు. అప్రమత్తమైన భద్రతా సిబ్బంది వెంటనే అతడిని అరెస్ట్ చేసి, అధ్యక్షుడిని, ఉపాధ్యక్షుడిని సురక్షిత ప్రాంతానికి తరలించారు.
నిందితుడు అలెన్ క్యాలిఫోర్నియా ఇనిస్టిట్యూట్ ఆఫ్ టెక్నాలజీ (క్యాల్టెక్) నుంచి మెకానికల్ ఇంజినీరింగ్లో పట్టభద్రుడయ్యాడు. అతను కంప్యూటర్ సైంటిస్ట్, పార్ట్టైమ్ టీచర్గా పనిచేస్తున్నాడు. దాడికి పది నిమిషాల ముందు, ట్రంప్కు వ్యతిరేకంగా తన కుటుంబ సభ్యులకు ఒక మ్యానిఫెస్టోను పంపాడు. అందులో తనను తాను “ఫ్రెండ్లీ ఫెడరల్ అసాసిన్” అని అభివర్ణించుకున్నాడు.
“ఇతరులపై జరుగుతున్న అణచివేతను చూస్తూ మౌనంగా ఉండటం కూడా నేరంతో సమానమే. ట్రంప్ పరిపాలనలో జరుగుతున్న నేరాలకు నేను భాగస్వామిని కాలేను” అని ఆ మ్యానిఫెస్టోలో పేర్కొన్నాడు. ట్రంప్ను “బాలల వేధింపుదారుడు, రేపిస్ట్, దేశద్రోహి” అని తీవ్ర పదజాలంతో విమర్శించాడు. కోర్టులో హాజరుపరిచినప్పుడు అలెన్ ఎలాంటి వాదనలు వినిపించలేదు. అతడికి ఎలాంటి నేర చరిత్ర లేదని, ప్రస్తుతం నిర్దోషిగానే పరిగణించాలని అతని తరపు న్యాయవాది కోర్టుకు తెలిపారు.
