ఇవాళ్టి ఐపీఎల్ వేలంలో ఇప్పటివరకు అత్యధిక ధర పొందిన ఆటగాడు ఇషాన్ కిషన్. ఈ టీమిండియా యువ వికెట్ కీపర్ బ్యాట్స్ మన్ కోసం వేలంలో హోరాహోరీ నెలకొంది. ఎంతో పొదుపుగా డబ్బు ఖర్చు చేస్తుందని పేరున్న సన్ రైజర్స్ హైదరాబాద్ యాజమాన్యం కూడా ఇషాన్ కిషన్ కోసం ఓ దశలో రూ.14 కోట్ల వరకు వచ్చింది. అయితే ముంబయి ఇండియన్స్ అందరికంటే ఎక్కువగా రూ.15.25 కోట్లకు ఇషాన్ కిషన్ ను దక్కించుకుంది.

విధ్వంసక ఇన్నింగ్స్ లు ఆడడంలో దిట్టగా ఇషాన్ కిషన్ పేరు తెచ్చుకున్నాడు. ఇటీవల నిలకడగా ఆడుతున్న ఆటగాళ్లలో కిషన్ కూడా ఉన్నాడు. అందుకే అతడికి అంత ధర పలికిందని క్రికెట్ విశ్లేషకులు భావిస్తున్నారు.

ఇక శ్రీలంక మిస్టరీ స్పిన్నర్ వనిందు హసరంగ ఈ వేలంలో భారీ ధర సొంతం చేసుకున్నాడు. హసరంగను రూ.10.75 కోట్లతో రాయల్ చాలెంజర్స్ బెంగళూరు సొంతం చేసుకుంది. స్పిన్ ఆడడంలో దిట్టలుగా పేరుగాంచిన టీమిండియా బ్యాట్స్ మెన్ సైతం గత లంక పర్యటనలో హసరంగ బౌలింగ్ ఎదుర్కోవడంలో తడబడ్డారు. బౌలింగ్ లో వైవిధ్యం, కచ్చితత్వం, బ్యాట్స్ మన్ ఎవరైనాగానీ నిబ్బరంగా బంతులు విసిరే తత్వం హసరంగను కొద్దికాలంలోనే ఐసీసీ ర్యాంకుల్లోనూ అగ్రస్థానంలో నిలిపాయి.

ఇక సన్ రైజర్స్ హైదరాబాద్ ఫ్రాంచైజీ నేటి వేలంలో ఓ ఆల్ రౌండర్ కోసం భారీగా వెచ్చించింది. ఆ ఆల్ రౌండర్ ఎవరో కాదు… వాషింగ్టన్ సుందర్. ఇటీవలకాలంలో భారత విజయాల్లో తరచుగా వినిపిస్తున్న పేరు ఇతడిదే. ఆస్ట్రేలియా పర్యటన నుంచి జట్టులో కొనసాగుతున్న సుందర్ బ్యాట్స్ మన్ గానూ, బౌలర్ గానూ జట్టుకు ఉపయోగపడుతున్నాడు. తమిళనాడుకు చెందిన వాషింగ్టన్ సుందర్ ను సన్ రైజర్స్ హైదరాబాద్ ఫ్రాంచైజీ నేటి వేలంలో రూ.8.75 కోట్ల ధరకు చేజిక్కించుకుంది.

ఐపీఎల్ 15వ సీజన్ కోసం ఆటగాళ్ల వేలం ఉత్సాహంగా సాగుతోంది. కొందరు సీనియర్ ఆటగాళ్లను కొనేందుకు ఎవరూ ముందుకు రాకపోగా, మరికొందరు ఆటగాళ్లు మాత్రం వేలంలో భారీ ధర పలికారు. ఈసారి జాక్ పాట్ కొట్టిన ఆటగాళ్లలో వెస్టిండీస్ ఆల్ రౌండర్ జాసన్ హోల్డర్ కూడా ఉన్నాడు.

హోల్డర్ గత సీజన్ లో సన్ రైజర్స్ హైదరాబాద్ కు ప్రాతినిధ్యం వహించాడు. అప్పట్లో హైదరాబాద్ ఫ్రాంచైజీ హోల్డర్ ను కేవలం రూ.75 లక్షలతో సొంతం చేసుకుంది. ఈసారి వేలానికి వచ్చిన హోల్డర్ కోట్లు కొల్లగొట్టాడు. ఇవాళ్టి వేలంలో ఈ పొడగరి ఆల్ రౌండర్ కోసం పలు ఫ్రాంచైజీలు పోటీపడగా, చివరికి రూ.8.75 కోట్లతో అతడిని కొత్త ఫ్రాంచైజీ లక్నో సూపర్ జెయింట్స్ ఎగరేసుకెళ్లింది.

బంతితోనూ, బ్యాట్ తోనూ సత్తా చాటే హోల్డర్ కోసం రాజస్థాన్ రాయల్స్, ముంబయి ఇండియన్స్ కూడా ఆసక్తి చూపించాయి. చివరి వరకు పోటీపడినా లక్నో సూపర్ జెయింట్స్ అతడిని అదిరిపోయే ధరకు కైవసం చేసుకుంది. హోల్డర్ ఐపీఎల్ లో 26 మ్యాచ్ లు ఆడి 35 వికెట్లు తీశాడు. టీమిండియాతో తాజా వన్డే సిరీస్ లోనూ హోల్డర్ రాణించాడు.

కాగా, ఆసీస్ ఆటగాడు, సన్ రైజర్స్ మాజీ సారథి డేవిడ్ వార్నర్ కు ఈ వేలంలో రూ.6.25 కోట్ల ధర పలికింది. వార్నర్ ను ఢిల్లీ క్యాపిటల్స్ జట్టు కొనుగోలు చేసింది. దీనిపై భారత మాజీ ఆటగాడు వసీం జాఫర్ సోషల్ మీడియాలో కాస్తంత హాస్య ధోరణిలో స్పందించాడు. మరీ ఇంత తక్కువ ధరా? అంటూ విస్మయం వ్యక్తం చేశాడు.

“ఢిల్లీ ప్రజలు బేరం ఆడడంలో మొనగాళ్లని అందరికీ తెలిసిందే. కానీ వార్నర్ అంతటివాడ్ని కేవలం రూ.6.25 కోట్లకు కొనుగోలు చేయడం సరోజిని నగర్ మార్కెట్లో బేరం ఆడినట్టుగానే అనిపించింది” అంటూ వసీం జాఫర్ ట్వీట్ చేశాడు.