- ఆగస్టు 11న లూనా-25ని ప్రయోగించిన రష్యా
- చంద్రుడి దక్షిణ ధ్రువంపై పరిశోధనలే లక్ష్యం
- చంద్రుడిపై ల్యాండింగ్ పాయింట్ కు కొన్ని కి.మీ ఎత్తులో విఫలం
- లూనా-25 కూలిపోయిన చోటును గుర్తించిన నాసా స్పేస్ క్రాఫ్ట్
చంద్రుడి దక్షిణ ధ్రువంపై కాలుమోపేందుకు ఇటీవల రష్యా విఫలయత్నం చేసిన సంగతి తెలిసిందే. జాబిల్లికి మరోవైపున పరిశోధనల కోసం రష్యా ప్రయోగించిన లూనా-25 కుప్పకూలిపోయింది. ల్యాండింగ్ పాయింట్ కు కొన్ని కిలోమీటర్ల ఎత్తునే లూనా-25 విఫలమైంది.
ఇది కూలిపోయిన చోటును తాజాగా అమెరికా అంతరిక్ష పరిశోధన సంస్థ నాసా గుర్తించింది. దీనికి సంబంధించి లూనార్ రికానసెన్స్ ఆర్బిటర్ స్పేస్ క్రాఫ్ట్ తీసిన ఫొటోలను నాసా విడుదల చేసింది.
చంద్రుడి ఉపరితలంపై 10 మీటర్ల వెడల్పుతో ఉన్న భారీ గొయ్యి ఈ ఫొటోల్లో కనిపిస్తోంది. ఇది కొత్తగా ఏర్పడినట్టు నాసా చెబుతోంది. రష్యా లూనా-25 కూలిపోవడం వల్ల ఆ భారీ గొయ్యి ఏర్పడి ఉండొచ్చని అభిప్రాయపడింది.
