- పాక్ ఆర్మీ చీఫ్పై ఇమ్రాన్ ఖాన్ సంచలన ఆరోపణలు
- మునీర్కు ప్రతీకార స్వభావం ఉందని, తన భార్య బుష్రా బీబీని లక్ష్యంగా చేసుకున్నారని వ్యాఖ్య
- ఐఎస్ఐ చీఫ్ పదవి నుంచి తొలగించినందుకే ఈ కక్ష సాధింపు చర్యలని ఆరోపణ
పాకిస్థాన్ మాజీ ప్రధాని ఇమ్రాన్ ఖాన్, ప్రస్తుతం ఆ దేశ ఆర్మీ చీఫ్గా ఉన్న జనరల్ ఆసిం మునీర్పై తీవ్రమైన ఆరోపణలు చేశారు. మునీర్ ప్రతీకార స్వభావంతో వ్యవహరిస్తున్నారని, తాను గతంలో ఆయన్ను ఐఎస్ఐ (ఇంటర్-సర్వీసెస్ ఇంటెలిజెన్స్) చీఫ్ పదవి నుంచి తొలగించినందుకే ఇప్పుడు తన భార్య బుష్రా బీబీని లక్ష్యంగా చేసుకుని వేధిస్తున్నారని ఇమ్రాన్ ఖాన్ ఆరోపించారు. ప్రస్తుతం జైలు జీవితం గడుపుతున్న ఆయన, తన కుటుంబ సభ్యులతో పాటు పార్టీ కార్యకర్తలను కూడా అన్యాయంగా నిర్బంధించారని వాపోయారు. ఈ విషయమై ఇమ్రాన్ ఖాన్ స్పందిస్తూ “ప్రధాని హోదాలో ఉన్నప్పుడు జనరల్ మునీర్ను ఐఎస్ఐ డైరెక్టర్ జనరల్ పదవి నుంచి నేను తప్పించాను. ఆ విషయంపై మాట్లాడేందుకు నా భార్య బుష్రా బీబీని కలవాలని ఆయన మధ్యవర్తుల ద్వారా ప్రయత్నించారు. అయితే, అటువంటి విషయాల్లో తాను జోక్యం చేసుకోనని, తనను కలవద్దని నా భార్య స్పష్టంగా చెప్పారు. ఆ కోపంతోనే ఇప్పుడు ఆమెకు అన్యాయంగా 14 నెలల శిక్ష విధించి, జైలులో కూడా అమానవీయంగా ప్రవర్తిస్తున్నారు. దీని వెనుక ఆసిమ్ మునీర్ ప్రతీకార ధోరణి స్పష్టంగా కనిపిస్తోంది” అని పేర్కొన్నారు. వ్యక్తిగత కక్ష సాధింపు కోసం తన భార్యను లక్ష్యంగా చేసుకోవడం ఊహించలేనిదని ఇమ్రాన్ ఖాన్ ఆవేదన వ్యక్తం చేశారు. పాకిస్థాన్ నియంతృత్వ చీకటి రోజుల్లో కూడా ఇటువంటి ఘటనలు జరగలేదని తెలిపారు. రాజకీయాలతో ఎలాంటి సంబంధం లేని బుష్రా బీబీపై అనేక కేసులు బనాయించారని, గత నెల రోజులుగా ఆమెను కలుసుకునేందుకు కూడా తనను అనుమతించడం లేదని ఇమ్రాన్ తెలిపారు. అంతేకాకుండా, 2023 మే 9వ తేదీన (ఇమ్రాన్ ఖాన్ అరెస్టు రోజున చెలరేగిన హింస) జరిగిన ఘటనలు ‘లండన్ ప్లాన్’లో భాగంగానే చోటుచేసుకున్నాయని కూడా ఇమ్రాన్ ఖాన్ సంచలన ఆరోపణలు చేశారు. తనను, తన పార్టీని అణచివేసేందుకే ఇటువంటి కుట్రలు పన్నుతున్నారని మండిపడ్డారు.
