- భారత్‌లో అంతర్జాతీయ వార్తా సంస్థ రాయిటర్స్ ఎక్స్ ఖాతా నిలిపివేత
- తాము ఎలాంటి ఆదేశాలు ఇవ్వలేదని స్పష్టం చేసిన కేంద్ర ప్రభుత్వం
- పాత ఆదేశాల కారణంగా ఎక్స్ పొరపాటున ఈ చర్య తీసుకున్నట్లు అనుమానం
- ఖాతాను పునరుద్ధరించాలని ఎక్స్‌ను కోరినట్లు తెలిపిన అధికారులు
- మే 7న జాతీయ భద్రత దృష్ట్యా ఇచ్చిన ఆదేశాలు ఇప్పుడు అమలు చేసినట్లు అంచనా
- యథావిధిగా పనిచేస్తున్న రాయిటర్స్ అనుబంధ ఖాతాలు
అంతర్జాతీయ వార్తా సంస్థ ‘రాయిటర్స్’కు చెందిన ఎక్స్ ఖాతాను భారత్‌లో నిలిపివేయడంపై నెలకొన్న గందరగోళంపై కేంద్ర ప్రభుత్వం స్పష్టత ఇచ్చింది. రాయిటర్స్ ఖాతాను నిలిపివేయాలని తాము ప్రస్తుతం ఎలాంటి ఆదేశాలు జారీ చేయలేదని, ఈ సమస్యను పరిష్కరించేందుకు ఎక్స్‌తో కలిసి పనిచేస్తున్నామని అధికారిక ప్రతినిధి ఒకరు ఆదివారం తెలిపారు. భారత్‌లో రాయిటర్స్ ఎక్స్ ఖాతాను తెరిచేందుకు ప్రయత్నించిన వినియోగదారులకు “చట్టపరమైన ఆదేశాలకు అనుగుణంగా ఈ ఖాతా నిలిపివేయబడింది” అనే సందేశం కనిపించడంతో పత్రికా స్వేచ్ఛపై ఆందోళనలు వ్యక్తమయ్యాయి. తమ ఖాతా ఎందుకు బ్లాక్ అయిందో తెలుసుకునేందుకు ప్రయత్నిస్తున్నామని రాయిటర్స్ కూడా తొలుత పేర్కొంది.
అయితే, ఈ వ్యవహారంపై ఆరా తీయగా అసలు విషయం వెలుగులోకి వచ్చింది. అధికారుల కథనం ప్రకారం, పాకిస్థాన్ ప్రేరేపిత ఉగ్రవాదులు పహల్గామ్‌లో 26 మంది భారత పర్యాటకులను హతమార్చిన ఘటన తర్వాత, జాతీయ భద్రతలో భాగంగా చేపట్టిన ‘ఆపరేషన్ సిందూర్’ సందర్భంగా మే 7న రాయిటర్స్ ఖాతాను నిలిపివేయాలని ఒక అభ్యర్థన వెళ్లింది. ఆ సమయంలో జాతీయ భద్రత కారణాలతో వందల ఖాతాలను నిలిపివేసినప్పటికీ, రాయిటర్స్ ఖాతాపై మాత్రం ఎలాంటి చర్యలూ తీసుకోలేదు. అయితే, ఎలాన్ మస్క్‌కు చెందిన ఎక్స్ సంస్థ, రెండు నెలల క్రితం నాటి ఆ పాత ఆదేశాలను పొరపాటున ఇప్పుడు అమలు చేసి ఉండవచ్చని అధికారులు భావిస్తున్నారు. “ఆ ఆదేశాలకు ఇప్పుడు ప్రాసంగికత లేదు. ఖాతాను ఎందుకు నిలిపివేశారో వివరించాలని, తక్షణమే ఆంక్షలను ఎత్తివేయాలని మేము ఎక్స్ సంస్థను కోరాము” అని ఒక సీనియర్ అధికారి వెల్లడించారు. రాయిటర్స్ ప్రధాన, వరల్డ్ ఖాతాలు నిలిచిపోయినప్పటికీ, రాయిటర్స్ టెక్ న్యూస్, ఫ్యాక్ట్ చెక్, ఆసియా, చైనా వంటి ఇతర అనుబంధ ఖాతాలు మాత్రం భారత్‌లో యథావిధిగా అందుబాటులో ఉన్నాయి. ఈ విషయంపై రాయిటర్స్ సంస్థ ఇంతవరకు బహిరంగంగా ఎలాంటి ప్రకటన చేయలేదు.
Save or share this story as a newspaper-style Epaper Clip:
About The Author
