- ఎంబీయూ గుర్తింపును రద్దు చేయాలని ప్రభుత్వానికి ఉన్నత విద్యా కమిషన్ సిఫారసు
- విద్యార్థుల నుంచి నిబంధనలకు విరుద్ధంగా రూ.26 కోట్లకు పైగా అదనపు వసూళ్లు
- పేరెంట్స్ అసోసియేషన్ ఫిర్యాదుతో వెలుగులోకి వచ్చిన అక్రమాలు
- కమిషన్ ఆదేశాలపై హైకోర్టును ఆశ్రయించిన యూనివర్సిటీ యాజమాన్యం
- ప్రస్తుత విద్యార్థులను ఎస్వీ యూనివర్సిటీకి బదిలీ చేయాలని ప్రభుత్వానికి సూచన
తిరుపతిలోని ప్రముఖ విద్యాసంస్థ మోహన్బాబు యూనివర్సిటీ (ఎంబీయూ) భవిష్యత్తు ప్రశ్నార్థకంగా మారింది. విద్యార్థుల నుంచి నిబంధనలకు విరుద్ధంగా భారీగా అదనపు ఫీజులు వసూలు చేసినట్లు తేలడంతో, వర్సిటీ గుర్తింపును రద్దు చేయాలని ఆంధ్రప్రదేశ్ ఉన్నత విద్య నియంత్రణ, పర్యవేక్షణ కమిషన్ ప్రభుత్వానికి సంచలన సిఫారసు చేసింది. ఈ మేరకు మంగళవారం కీలక ఉత్తర్వులు జారీ చేసింది.
విద్యార్థుల నుంచి రూ.26 కోట్లకు పైగా అదనపు వసూళ్లు..
ప్రభుత్వం నిర్దేశించిన ఫీజుల కంటే ఏకంగా రూ. 26.17 కోట్లు అదనంగా విద్యార్థుల నుంచి వసూలు చేసినట్లు కమిషన్ తన విచారణలో గుర్తించింది. యూనివర్సిటీ గుర్తింపును తక్షణమే ఉపసంహరించుకోవాలని యూజీసీ, ఏఐసీటీఈ వంటి జాతీయ సంస్థలకు సైతం ప్రతిపాదించింది. దీంతో యూనివర్సిటీ మనుగడపై నీలినీడలు కమ్ముకున్నాయి.
పేరెంట్స్ అసోసియేషన్ ఫిర్యాదుతో వెలుగులోకి అక్రమాలు..
ఈ వ్యవహారంపై 2024 అక్టోబరులో ఏపీ పేరెంట్స్ అసోసియేషన్ ఫిర్యాదు చేయడంతో అక్రమాలు వెలుగులోకి వచ్చాయి. డే-స్కాలర్ల నుంచి కూడా మెస్ ఛార్జీలు వసూలు చేస్తున్నారని, హాజరు తక్కువగా ఉందని చెప్పి అదనంగా డబ్బులు గుంజుతున్నారని ఫిర్యాదులో పేర్కొన్నారు. ముఖ్యమంత్రి కార్యాలయం ఆదేశాలతో రంగంలోకి దిగిన ఉన్నత విద్యా కమిషన్, ప్రత్యేక కమిటీతో విచారణ జరిపింది.
వర్సిటీ యాజమాన్యం వాదన ఇదీ..
తమ వాదన వినిపించిన యూనివర్సిటీ యాజమాన్యం, విద్యార్థులే స్వచ్ఛందంగా అదనపు ఫీజులు చెల్లించారని చెప్పడం గమనార్హం. అయితే ఈ వాదనను కమిషన్ తోసిపుచ్చింది. వసూలు చేసిన రూ.26.17 కోట్లను 15 రోజుల్లోగా విద్యార్థులకు తిరిగి చెల్లించాలని, రూ.15 లక్షల జరిమానా కట్టాలని గతంలోనే ఆదేశించింది. యాజమాన్యం జరిమానా చెల్లించినప్పటికీ, ఫీజుల వాపసు ఆదేశాలను పట్టించుకోలేదు.
కమిషన్ ఆదేశాలపై హైకోర్టును ఆశ్రయించిన ఎంబీయూ..
ఈ నేపథ్యంలో కమిషన్ ఆదేశాలపై ఎంబీయూ యాజమాన్యం హైకోర్టును ఆశ్రయించింది. ఫీజుల వాపసు, గుర్తింపు రద్దు సిఫారసును న్యాయస్థానంలో సవాలు చేసింది. మరోవైపు, ప్రస్తుతం యూనివర్సిటీలో చదువుతున్న విద్యార్థుల భవిష్యత్తును దృష్టిలో ఉంచుకుని, వారిని సమీపంలోని శ్రీవెంకటేశ్వర యూనివర్సిటీకి తాత్కాలికంగా అనుబంధం చేయాలని కమిషన్ ప్రభుత్వానికి సూచించింది. వర్సిటీ ఆర్థిక అక్రమాలపై ఆదాయపు పన్ను శాఖతో విచారణ జరిపించాలని కూడా సిఫారసు చేసింది. ప్రభుత్వం తీసుకోబోయే నిర్ణయంపైనే ఎంబీయూ భవితవ్యం ఆధారపడి ఉంది.
