- వైట్హౌస్ వద్ద కారుతో ఓ వ్యక్తి హల్చల్
- సెక్యూరిటీ గేటును బలంగా ఢీకొట్టిన వాహనం
- డ్రైవర్ను వెంటనే అదుపులోకి తీసుకున్న అధికారులు
- వాహనాన్ని క్షుణ్ణంగా తనిఖీ చేసిన సీక్రెట్ సర్వీస్
అమెరికా అధ్యక్ష భవనం వైట్హౌస్ వద్ద మంగళవారం రాత్రి తీవ్ర కలకలం రేగింది. ఓ వ్యక్తి తన కారుతో నేరుగా వచ్చి భద్రతా గేటును ఢీకొట్టాడు. ఈ ఘటన జరిగిన సమయంలో అధ్యక్షుడు డొనాల్డ్ ట్రంప్ భవనం లోపలే ఉన్నారని, దీంతో భద్రతా సిబ్బంది ఒక్కసారిగా అప్రమత్తమయ్యారని యూఎస్ సీక్రెట్ సర్వీస్ వెల్లడించింది.
వాషింగ్టన్లోని 17వ ఈ స్ట్రీట్స్ కూడలి సమీపంలో రాత్రి సుమారు 10:30 గంటల సమయంలో ఈ సంఘటన చోటుచేసుకుంది. ఓ కారు వేగంగా దూసుకొచ్చి వైట్హౌస్ ఆవరణలోని సెక్యూరిటీ గేటును ఢీకొట్టింది. వెంటనే స్పందించిన సీక్రెట్ సర్వీస్ యూనిఫాం విభాగం అధికారులు ఆ కారు డ్రైవర్ను అదుపులోకి తీసుకున్నారు.
ఈ ఘటనతో వైట్హౌస్కు ఎలాంటి లాక్డౌన్ విధించలేదని అధికారులు స్పష్టం చేశారు. కారును క్షుణ్ణంగా తనిఖీ చేయగా, అందులో ఎటువంటి ప్రమాదకరమైన వస్తువులు లేవని నిర్ధారించుకున్నారు. ముందుజాగ్రత్త చర్యగా, వాహనాన్ని అక్కడి నుంచి టోయింగ్ చేసే వరకు సమీపంలోని రహదారిని తాత్కాలికంగా మూసివేసినట్లు అధికారులు తెలిపారు. ఈ ఘటనపై తదుపరి విచారణ జరుపుతున్నారు.
Save or share this story as a newspaper-style Epaper Clip:
About The Author
