- శ్రేయస్ అయ్యర్ ఆరోగ్య పరిస్థితిపై బీసీసీఐ ప్రకటన
- ఆస్ట్రేలియాతో మూడో వన్డేలో గాయపడిన అయ్యర్
- పొత్తికడుపు గాయానికి విజయవంతంగా సర్జరీ పూర్తి
- ప్రస్తుతం ఆరోగ్యం నిలకడగా ఉందని వెల్లడి
- ఆస్ట్రేలియాతో టీ20 సిరీస్కు దూరం
- దక్షిణాఫ్రికాతో వన్డే సిరీస్కు అందుబాటులోకి వచ్చే అవకాశం
టీమిండియా మిడిలార్డర్ బ్యాటర్ శ్రేయస్ అయ్యర్ ఆరోగ్య పరిస్థితిపై భారత క్రికెట్ నియంత్రణ మండలి (బీసీసీఐ) కీలక ప్రకటన విడుదల చేసింది. ఆస్ట్రేలియాతో జరిగిన మూడో వన్డే సందర్భంగా గాయపడిన అతడికి శస్త్రచికిత్స జరిగిందని, ప్రస్తుతం అతడి ఆరోగ్యం నిలకడగా ఉందని స్పష్టం చేసింది. అయ్యర్ ఆసుపత్రిలోనే వైద్యుల పర్యవేక్షణలో ఉన్నాడని, వేగంగా కోలుకుంటున్నాడని తెలిపింది.
ఈ నెల 25న సిడ్నీలో జరిగిన వన్డేలో ఓ క్యాచ్ అందుకునే క్రమంలో అయ్యర్ పొత్తికడుపునకు బలమైన గాయమైంది. దీంతో అతడిని వెంటనే మైదానం నుంచి ఆసుపత్రికి తరలించారు. ఈ ఘటనపై బీసీసీఐ విడుదల చేసిన ప్రకటనలో “గాయాన్ని వెంటనే గుర్తించి, రక్తస్రావాన్ని అరికట్టాం. 28న తీసిన స్కానింగ్లో అతడి ఆరోగ్యం గణనీయంగా మెరుగుపడినట్లు తేలింది. శ్రేయస్ కోలుకుంటున్నాడు. సిడ్నీ, భారత నిపుణులతో కూడిన బీసీసీఐ వైద్య బృందం అతడి పరిస్థితిని నిరంతరం పర్యవేక్షిస్తుంది” అని వివరించింది.
ఈ గాయం కారణంగా, నేటి నుంచి ఆస్ట్రేలియాతో ప్రారంభమయ్యే ఐదు మ్యాచ్ల టీ20 సిరీస్కు అయ్యర్ దూరమయ్యాడు. ఇటీవలే ఆస్ట్రేలియాతో వన్డే సిరీస్కు ముందు అయ్యర్ను జట్టు వైస్-కెప్టెన్గా నియమించిన విషయం తెలిసిందే. ప్రస్తుతం టెస్టు జట్టులో చోటు దక్కించుకోలేకపోతున్న అయ్యర్, త్వరలో స్వదేశంలో దక్షిణాఫ్రికాతో జరిగే వన్డే సిరీస్ నాటికి పూర్తి ఫిట్నెస్ సాధించి జట్టులోకి వచ్చే అవకాశాలు ఉన్నాయి. భారత్లో పర్యటించనున్న దక్షిణాఫ్రికా జట్టు రెండు టెస్టులు, మూడు వన్డేలు, ఐదు టీ20ల సిరీస్ ఆడనుంది. నవంబర్ 30 నుంచి వన్డే సిరీస్ ప్రారంభం కానుంది.
