• ట్రైబ్యునళ్ల చట్టంపై విచారణ వాయిదా కోరిన కేంద్రం
• కేంద్రం అభ్యర్థనపై సుప్రీంకోర్టు తీవ్ర అసంతృప్తి
• నా పదవీ విరమణ తర్వాత విచారణ కావాలా అని నిలదీసిన సీజేఐ
• పదేపదే వాయిదాలు కోరడంపై ధర్మాసనం ఆగ్రహం
• అటార్నీ జనరల్‌కు సోమవారం చివరి అవకాశం
• ఆ రోజు హాజరుకాకపోతే కేసు ముగిస్తామని స్పష్టీకరణ

ట్రైబ్యునళ్ల సంస్కరణల చట్టం-2021 రాజ్యాంగబద్ధతకు సంబంధించిన కేసులో విచారణను వాయిదా వేయాలని కోరిన కేంద్ర ప్రభుత్వంపై సుప్రీంకోర్టు తీవ్ర అసంతృప్తి వ్యక్తం చేసింది. కేంద్రం వైఖరి ఎంతమాత్రం ఆమోదయోగ్యం కాదని, ఇది అసమంజసమని ప్రధాన న్యాయమూర్తి (సీజేఐ) జస్టిస్ బీఆర్ గవాయ్ నేతృత్వంలోని ధర్మాసనం ఘాటుగా వ్యాఖ్యానించింది.

ఈ కేసుపై తుది విచారణ శుక్రవారం జరగాల్సి ఉండగా, అటార్నీ జనరల్ (ఏజీ) ఆర్. వెంకటరమణి అంతర్జాతీయ మధ్యవర్తిత్వ కేసుల్లో బిజీగా ఉన్నందున వాయిదా వేయాలని అదనపు సొలిసిటర్ జనరల్ ఐశ్వర్య భాటి గురువారం కోరారు. దీనిపై సీజేఐ తీవ్రంగా స్పందించారు. “మేం ఆయనకు ఇప్పటికే చాలా సమయం ఇచ్చాం. రెండుసార్లు వాదనలు వినిపించేందుకు అవకాశం కల్పించాం. ఈ నెల 23న నేను పదవీ విరమణ చేస్తున్నాను. ఒకవేళ ఈ కేసు విచారణ 24వ తేదీ తర్వాత జరగాలని మీరు కోరుకుంటున్నారా? అలాంటి ఉద్దేశం ఉంటే నిజాయితీగా చెప్పండి” అని జస్టిస్ గవాయ్ నిలదీశారు.

ఈ కేసు విచారణను సోమవారానికి వాయిదా వేయాలని ఐశ్వర్య కోరగా, సీజేఐ మరింత అసహనం వ్యక్తం చేశారు. “అలాగైతే మేం తీర్పు ఎప్పుడు రాయాలి? ప్రతిరోజూ ఆయన మధ్యవర్తిత్వంతో బిజీగా ఉన్నారని చెబుతారు. చివరి నిమిషంలో వచ్చి కేసును విస్తృత ధర్మాసనానికి బదిలీ చేయాలని అడుగుతారు” అని వ్యాఖ్యానించారు. ఈ నెల 3న జరిగిన విచారణలోనూ ఏజీ ఐదుగురు సభ్యుల ధర్మాసనం విచారణ జరపాలని కోరడాన్ని సీజేఐ తప్పుబట్టిన విషయం తెలిసిందే. ఇది ధర్మాసనాన్ని తప్పించుకునే ఎత్తుగడగా కనిపిస్తోందని అప్పుడు వ్యాఖ్యానించారు.

కేంద్రం తరఫున మరో న్యాయనిపుణుడు ఎందుకు వాదనలు వినిపించరని ధర్మాసనం ప్రశ్నించింది. శుక్రవారం తుది వాదనలు వింటామని, అటార్నీ జనరల్‌కు సోమవారం వాదనలు వినిపించేందుకు చివరి అవకాశం ఇస్తున్నామని స్పష్టం చేసింది. “ఆ రోజు కూడా ఆయన రాకపోతే, మేం కేసు విచారణను ముగించేస్తాం” అని సీజేఐ గట్టిగా హెచ్చరించారు.

About The Author

Ram Narayana

See author's posts