- జిమ్ల ముసుగులో యువతులకు వల
- ఫిట్నెస్ సెంటర్లలో అకృత్యాలు
- అన్ని రాష్ట్రాలు, కేంద్రానికి నోటీసులు జారీ చేసిన ఎన్ హెచ్ఆర్సీ
- యూపీలోని మీర్జాపూర్లో 50 మందికి పైగా బాధితులని ఫిర్యాదు
- జిమ్ల నిబంధనలపై నివేదిక కోరిన మానవ హక్కుల కమిషన్
దేశవ్యాప్తంగా ఉన్న జిమ్లు, ఫిట్నెస్ సెంటర్ల ముసుగులో యువతులపై లైంగిక దోపిడీ, బలవంతపు మతమార్పిడులు జరుగుతున్నాయన్న తీవ్రమైన ఆరోపణలపై జాతీయ మానవ హక్కుల కమిషన్ (ఎన్ హెచ్ఆర్సీ) తీవ్రంగా స్పందించింది. ఈ వ్యవహారంపై సమగ్ర నివేదికలు ఇవ్వాలని కోరుతూ అన్ని రాష్ట్రాలు, కేంద్ర పాలిత ప్రాంతాల ప్రధాన కార్యదర్శులకు, కేంద్ర క్రీడలు-యువజన వ్యవహారాల మంత్రిత్వ శాఖకు, స్పోర్ట్స్ అథారిటీ ఆఫ్ ఇండియా (SAI)కు నోటీసులు జారీ చేసింది. ఈ ఆరోపణలు నిజమైతే, బాధితుల మానవ హక్కులకు తీవ్ర భంగం వాటిల్లినట్లేనని కమిషన్ అభిప్రాయపడింది.
ఉత్తరప్రదేశ్లోని మీర్జాపూర్లో ఓ జిమ్ కేంద్రంగా భారీ దోపిడీ రాకెట్ పనిచేస్తోందని, యువతులే లక్ష్యంగా ఈ దారుణాలు జరుగుతున్నాయని ఓ ఫిర్యాదుదారుడు ఎన్ హెచ్ఆర్సీని ఆశ్రయించారు.
మీడియా కథనాల ప్రకారం, ఈ ముఠా వలలో దాదాపు 50 మందికి పైగా యువతులు చిక్కుకున్నారని, ఈ రాకెట్లో ఏకంగా ఓ పోలీసు అధికారికి ప్రత్యక్ష ప్రమేయం ఉందని ఫిర్యాదులో పేర్కొన్నారు. చట్టాన్ని రక్షించాల్సిన పోలీసు అధికారి ప్రమేయం ఉండటం అధికార దుర్వినియోగానికి, శాంతిభద్రతల వైఫల్యానికి, ప్రజల నమ్మకాన్ని దెబ్బతీయడానికి నిదర్శనమని ఫిర్యాదుదారుడు ఆవేదన వ్యక్తం చేశారు. ఇది మహిళల భద్రతకు, మత స్వేచ్ఛకు తీవ్ర విఘాతం కలిగిస్తుందని తెలిపారు. ఫిట్నెస్ కేంద్రాల ముసుగులో వ్యవస్థీకృత నేర ముఠాలు పనిచేస్తున్నాయనడానికి ఈ ఘటనే నిదర్శనమని ఆరోపించారు.
ఈ ఘటనపై స్వతంత్ర దర్యాప్తు జరిపించాలని, బాధితులకు రక్షణ కల్పించి పునరావాసం కల్పించాలని, నిందితుడైన పోలీసు అధికారిపై కఠిన చర్యలు తీసుకోవాలని ఫిర్యాదుదారుడు కోరారు. భవిష్యత్తులో ఇలాంటి ఘటనలు పునరావృతం కాకుండా దేశవ్యాప్తంగా జిమ్లు, ఫిట్నెస్ సెంటర్ల కోసం కఠినమైన నియంత్రణ మార్గదర్శకాలు రూపొందించాలని విజ్ఞప్తి చేశారు.
ఈ ఫిర్యాదును ఎన్ హెచ్ఆర్సీ సభ్యులు ప్రియాంక్ కనూంగో నేతృత్వంలోని బెంచ్ సుమోటోగా స్వీకరించింది. మానవ హక్కుల పరిరక్షణ చట్టం-1993లోని సెక్షన్ 12 ప్రకారం చర్యలు చేపట్టింది. తమ పరిధిలోని జిమ్లు, ఫిట్నెస్ సెంటర్ల ఏర్పాటు, నిర్వహణకు సంబంధించి ప్రస్తుతం ఉన్న మార్గదర్శకాలు, రిజిస్ట్రేషన్ నిబంధనలు, ప్రమాణాలపై నివేదిక సమర్పించాలని అన్ని రాష్ట్రాల ప్రధాన కార్యదర్శులను ఆదేశించింది.
దేశంలో జిమ్ల కోసం ఏమైనా జాతీయ విధానాలు ఉన్నాయా అనే వివరాలు ఇవ్వాలని కేంద్ర క్రీడా మంత్రిత్వ శాఖను, లైసెన్సింగ్ అవసరాలపై సమాచారం ఇవ్వాలని స్పోర్ట్స్ అథారిటీ ఆఫ్ ఇండియా డైరెక్టర్ జనరల్ను కోరింది. ప్రత్యేకంగా మీర్జాపూర్ ఘటనపై లోతైన విచారణ జరిపి నివేదిక ఇవ్వాలని అక్కడి జిల్లా మేజిస్ట్రేట్, ఎస్పీని ఆదేశించింది. సంబంధిత అధికారులు రెండు వారాల్లోగా తమ నివేదికలను సమర్పించాలని స్పష్టం చేసింది.
