అంతరిక్షం నుంచి సూర్యగ్రహణం ఎలా ఉంటుందో కళ్లకు కట్టే అద్భుతమైన చిత్రాలను అమెరికా అంతరిక్ష పరిశోధన సంస్థ నాసా విడుదల చేసింది. చంద్రుడిపైకి మనుషులను పంపించే లక్ష్యంతో ఇటీవల నిర్వహించిన ‘ఆర్టెమిస్-2’ మిషన్ ఈ అపురూప దృశ్యాలను బంధించింది. భూమిపై చంద్రుడి నీడ (ఛాయ) ఒక పెద్ద నల్లటి మచ్చలా కదులుతున్నట్లు చూపిస్తున్న ఈ ఫొటోలు ప్రస్తుతం సోషల్ మీడియాలో వైరల్ అవుతున్నాయి.
ఈ చిత్రాలను చూస్తుంటే హాలీవుడ్ సైన్స్ ఫిక్షన్ సినిమాలోని గ్రాఫిక్స్ను చూస్తున్నట్లుందని నెటిజన్లు విస్మయం వ్యక్తం చేస్తున్నారు. గ్రహణ సమయంలో భూమి అంచుల వెంబడి ప్రసరిస్తున్న కాంతి, మేఘాల మధ్య నుంచి కనిపిస్తున్న రంగులు మరో గ్రహాన్ని చూస్తున్న అనుభూతిని కలిగిస్తున్నాయని శాస్త్రవేత్తలు సైతం ఆశ్చర్యపోతున్నారు.
మానవులను చంద్రుడిపైకి తీసుకెళ్లే బృహత్తర ప్రయోగంలో ఆర్టెమిస్-2 మిషన్ అత్యంత కీలకమైనది. ఇందులో భాగంగా వ్యోమగాములు చంద్రుడి చుట్టూ ప్రయాణించి భూమికి తిరిగి వస్తారు. ఈ మిషన్లో అమర్చిన అత్యాధునిక కెమెరాల ద్వారా ఈ చిత్రాలను తీశారు. ఇవి కేవలం అద్భుత దృశ్యాలు మాత్రమే కాదని, గ్రహణ సమయంలో భూ వాతావరణంలో జరిగే మార్పులు, కాంతి ప్రసరణ వంటి అంశాలపై అధ్యయనం చేసేందుకు శాస్త్రవేత్తలకు ఎంతగానో ఉపయోగపడతాయని నాసా తెలిపింది.
వేల కిలోమీటర్ల ఎత్తు నుంచి తీసిన ఈ ఫొటోలు సాంకేతిక విజయాన్ని చాటడమే కాకుండా, విశ్వంలోని అద్భుతాలను సరికొత్త కోణంలో వీక్షించే అవకాశాన్ని కల్పించాయని నాసా ప్రతినిధులు పేర్కొన్నారు.
