హైదరాబాదు బంజారాహిల్స్ లోని పుడింగ్ మింక్ పబ్ పై పోలీసులు దాడి చేయగా, డ్రగ్స్ పట్టుబడడం తీవ్ర కలకలం రేపుతోంది. ఈ కేసులో టాలీవుడ్ ప్రముఖులు పట్టుబడడం తెలిసిందే. అయితే, పబ్ కేసు వ్యవహారంలో తన కుమారుడు అరవింద్ పేరు వినిపించడంపై కాంగ్రెస్ మాజీ ఎంపీ అంజన్ కుమార్ యాదవ్ స్పందించారు.

తన కుమారుడు స్నేహితులతో కలిసి పుట్టినరోజు వేడుకలకు వెళ్లాడని వెల్లడించారు. బర్త్ డే పార్టీకి వెళితే తప్పుడు ఆరోపణలు చేస్తున్నారని మండిపడ్డారు. కొన్ని ఫైవ్ స్టార్ హోటళ్లలో పబ్బులు ఉంటున్నాయని, బర్త్ డే వేడుకలకు ఫైవ్ స్టార్ హోటళ్లకు వెళితే, పబ్బులపై దాడుల సందర్భంగా బర్త్ డే వేడుకలకు వెళ్లిన వాళ్లను కూడా తీసుకెళుతున్నారని మండిపడ్డారు. రాజకీయంగా ఎదుగుతుండడంతో ఓర్వలేక తమపై దుష్ప్రచారం చేస్తున్నారని ఆరోపించారు. తమ కుటుంబానికి ఇప్పటిదాకా ఎలాంటి చెడ్డపేరు లేదని అంజన్ కుమార్ యాదవ్ స్పష్టం చేశారు. హైదరాబాదు నగరంలో ఉన్న పబ్ లను మూసివేయాలని, లిక్కర్ బ్యాన్‌‌ చేయాలని డిమాండ్ చేశారు. పబ్ వ్యవహారంలో వాస్తవాలు తేల్చాలని కోరారు.

డ్రగ్స్ వ్యవహారంపై సినీ నటి హేమ స్పందించారు. కేసులో అనవసరంగా తన పేరును ప్రస్తావిస్తున్నారని ఆమె అభ్యంతరం చెప్పారు. ఏ సంబంధం లేని తనను ఎందుకు బదనాం చేస్తున్నారని ఆమె ప్రశ్నించారు. బంజారాహిల్స్ లోని రాడిసన్ బ్లూ ప్లాజా హోటల్ లో ఉన్న పుడింగ్ అండ్ మింక్ పబ్ లో పోలీసులు దాడులు చేసిన సంగతి తెలిసిందే.

రాహుల్ సిప్లిగంజ్, సినీ నటి నిహారిక సహా పలువురు ప్రముఖులను అదుపులోకి తీసుకున్న పోలీసులు.. మళ్లీ విడిచిపెట్టిన సంగతి తెలిసిందే. అయితే, ఆ పబ్ కు తాను వెళ్లనేలేదని, కానీ, కొన్ని మీడియా సంస్థలు పనిగట్టుకుని తనపై అభాండాలు వేస్తూ పేరును ప్రసారం చేస్తున్నాయని హేమ ఆరోపించారు. ప్రముఖులను వదిలేసి తనపై నిందలు మోపడమేంటని ప్రశ్నించారు. ఈ మేరకు ఆమె ఇవాళ బంజారాహిల్స్ పోలీసులకు ఫిర్యాదు చేశారు.