ఉగ్రరూపం దాల్చిన గోదావరి.. పరిస్థితిను పరిశీలించిన మంత్రి పువ్వాడ అజయ్ కుమార్ 53 అడుగులకు చేరిన నీటిమట్టం.. మూడో ప్రమాద హెచ్చరిక జారీ చేసిన అధికారులు స్వయంగా పరిస్థితిని పర్యవేక్షించి, సమీక్షించిన మంత్రి పువ్వాడ అజయ్ కుమార్.

ఎగువ నుంచి వస్తున్న వరదలతో పాటు రాష్ట్రంలో కురుస్తున్న వర్షాలతో గోదావరి ఉగ్రరూపం దాల్చింది. భద్రాచలం వద్ద గోదావరి నది ప్రవాహ ఉద్ధృతి కొనసాగుతూ 53 అడుగులు దాటింది దీంతో మూడో ప్రమాద హెచ్చరిక ను అధికారులు జారీ చేశారు.

భద్రాచలం వద్ద గోదావరి నది నీటి ప్రవాహాన్ని రాష్ట్ర రవాణా శాఖ మంత్రి పువ్వాడ అజయ్ కుమార్ స్వయంగా పరిశీలించారు. ఎప్పటికప్పుడు అధికార యంత్రాంగాన్ని అప్రమత్తం చేస్తూ అధికారులతో మంత్రి అజయ్ సమీక్షించారు.

గత రెండు రోజులుగా వర్షాలు, వరదల పరిస్థితిని పర్యవేక్షిస్తూ ప్రజలకు, అధికారులకు మంత్రి పువ్వాడ అజయ్ కుమార్ సూచనలు చేస్తున్నారు.

గోదావరి వద్ద మూడో ప్రమాద హెచ్చరిక సైతం జారీ చేసిన నేపథ్యంలో నిరంతరం అప్రమత్తంగా ఉండాలన్నారు. లోతట్టు ప్రాంతాల ప్రజలకు ఎలాంటి నష్టం జరగకుండా చర్యలు తీసుకోవాలని విద్యుత్ సౌకర్యం, ఇతర మౌళిక సదుపాయాల విషయంలో ప్రజలకు ఎలాంటి ఇబ్బందులు రాకుండా సత్వర కార్యచరణ రూపొందించాలని సూచించారు.

కాలువలు, చెరువులు, కుంట‌లు, చెక్ డ్యామ్స్ వ‌ద్ద కూడా ర‌క్ష‌ణ చ‌ర్య‌లు తీసుకోవాల‌న్నారు. రెవెన్యూ, పంచాయ‌తీరాజ్‌, ఇరిగేష‌న్, విద్యుత్, పోలీసు, ఆరోగ్య శాఖ అధికారులు క్షేత్ర‌స్థాయిలో స‌మ‌న్వ‌యంతో ప‌ని చేయాల‌ని చెప్పారు. అత్య‌వ‌స‌ర‌మైతేనే ప్ర‌జ‌లు బ‌య‌ట‌కు రావాల‌ని మంత్రి పువ్వాడ అజయ్ కుమార్ కోరారు.