థాయిలాండ్‌లోని ఓ ప్రీస్కూల్‌ వద్ద ఓ దుండగుడు విచక్షణా రహితంగా కాల్పులకు తెగబడ్డాడు. ఈ కాల్పుల ఘటనలో కనీసం 34 మంది మరణించినట్లు స్థానిక మీడియా కథనాలు పేర్కొన్నాయి. మృతుల్లో ఎక్కువ మంది స్కూల్ పిల్లలే కావడం గమనార్హం. మొత్తం 23 మంది పిల్లలు మరణించినట్లు స్థానిక మీడియా పేర్కొంది.

మృతుల్లో ఓ గర్భిణి మహిళ కూడా ఉన్నారు. ఈ మారణకాండ థాయిలాండ్‌ ఈశాన్య ప్రాంతం నాక్లాంగ్ జిల్లాలోని నాంగ్‌బు నాలంపూ ప్రావిన్స్‌లో చోటు చేసుకుంది. తుపాకీతో డే కేర్ సెంటర్‌లోకి ప్రవేశించిన దుండగుడు విచక్షణా రహితంగా కాల్పులు జరిపాడు. ఏం జరుగుతుందో తెలిసే లోపే అనేక మంది ప్రాణాలు కోల్పోయారు.

సమాచారం అందుకున్న వెంటనే అక్కడికి చేరుకున్న పోలీసులు.. అతడ్ని నిలువరించే ప్రయత్నం చేశారు. అయితే. నిందితుడు వారిపైనా కాల్పులు జరిపాడు. అనంతరం నిందితుడు పరారరయ్యాడు. కాల్పులకు పాల్పడిన అనంతరం నిందితుడు బ్యాంకాక్ రిజిస్ట్రేషన్ ఉన్న 4 డోర్ వీగో పికప్ ట్రక్ ఎక్కి పారిపోయాడు. దీంతో అతని కోసం పోలీసులు విస్తృత గాలింపు చేపట్టారు.

నిందితుడిని 34 ఏళ్ల పాన్య ఖమ్రాప్‌గా అనుమానిస్తున్నారు. నిందితుడు మాజీ పోలీసు అధికారి కావడం గమనార్హం. మాదక ద్రవ్యాలు వాడినట్లు తేలడంతో అతడ్ని ఏడాది కిందటే పోలీసు విధుల నుంచి తొలగించారు. వాస్తవానికి అతడు శుక్రవారం కోర్టుకు హాజరుకావాల్సి ఉంది.  కాగా, సాధారణంగా థాయిలాండ్ లో భారీ కాల్పుల ఘటనలు చాలా అరుదుగా జరుగుతుంటాయి. చివరిసారిగా 2020లో నఖోమా రాట్చెస్మా నగరంలో ఓ సైనికుడు కాల్పులు జరపడంతో 21 మంది ప్రాణాలు కోల్పోయారు. అనేక మంది గాయపడ్డారు.

అయితే అమెరికా తరహాలో థాయ్ లాండ్ లో విచ్చలవిడి కాల్పుల ఘటనలు చాలా అరుదు. 2020లో ఓ సైనికుడు ఓ ఆస్తి వివాదంలో ఆగ్రహం చెంది 29 మందిని కాల్చి చంపడం ఈ పర్యాటక దేశంలో సంచలనం సృష్టించింది.