బీబీసీ కార్యాలయాల్లో ఆదాయపన్ను శాఖ అధికారులు మంగళవారం ఉదయం నుంచి చేస్తున్న సర్వే కొనసాగుతోంది. ఢిల్లీ, ముంబైలలోని కార్యాలయాల్లో ఏక కాలంలో నిన్న ఉదయం 11 గంటల నుంచి ఈ సర్వే జరుగుతోంది. ఇందులో భాగంగా కార్యాలయాల్లోని అన్ని రకాల ఎలక్ట్రానిక్ ఎక్విప్ మెంట్, డేటాను ఐటీ అధికారులు స్వాధీనం చేసుకున్నారు. ఉద్యోగులకు సంబంధించిన మొబైల్ ఫోన్లను సైతం స్వాధీనం చేసుకున్నారు. 

ఇప్పుడు స్వాధీనం చేసుకున్న పరికరాల నుంచి కీలక సమాచారాన్ని రాబట్టే పనిలో అధికారులు ఉన్నారు. అంతర్జాతీయ పన్ను, బీబీసీ సబ్సిడరీల బదిలీ ధరపై అధికారులు దృష్టి పెట్టారు. ముఖ్యంగా షెల్ కంపెనీ, ఫండ్ ట్రాన్స్ ఫర్, ఫారీన్ ట్రాన్స్ ఫర్ అనే కీవర్డ్స్ తో వారు తమ వద్దనున్న పరికరాల నుంచి డేటాను పొందే పనిలో ఉన్నట్టు విశ్వసనీయ వర్గాలు వెల్లడించాయి. పన్నుల ఎగవేత కోణాన్ని వెలికితీసే ప్రయత్నంలో అధికారులు ఉన్నట్టు తెలుస్తోంది.

ఆదాయపన్ను శాఖ గతంలోనూ బీబీసీకి నోటీసులు జారీ చేసింది. నిబంధనలకు వ్యతిరేకంగా తన లాభాలను బీబీసీ గణనీయంగా విదేశాలకు మళ్లించినట్టు ఐటీ శాఖ అనుమానిస్తోంది. వ్యాపార కార్యకలాపాలకు సంబంధించిన డాక్యుమెంట్లను కూడా గుర్తించే పనిలో అధికారులు ఉన్నారు.  ఇది సర్వే మాత్రమేనని, ఫోన్లను తిరిగి ఉద్యోగులకు ఇచ్చేయనున్నట్టు అధికారులు ప్రకటించారు.

ఈ నేపథ్యంలో ఇప్పటికే ఉద్యోగులకు మెయిల్ పంపిన బీబీసీ.. తాజాగా మరో లేఖను పంపింది. అవసరమైన వారు.. అంటే బ్రాడ్ కాస్ట్ డిపార్ట్ మెంట్ లో పనిచేసే వారు మినహా మిగతా వారు ఆఫీసుకు రానక్కర్లేదని చెప్పింది. ఇంటి వద్ద నుంచే పనిచేయాలని మెయిల్ లో సూచించింది.

ఐటీ అధికారుల సోదాలకు సహకరించాలని మరోమారు సూచించింది. జీతానికి సంబంధించిన వివరాలను అడిగితే చెప్పాలని పేర్కొంది. అయితే, వ్యక్తిగత ఆదాయ వివరాలు అడిగినా చెప్పాల్సిన అవసరంలేదని సూచించినట్లు తెలుస్తోంది. కాగా, పన్ను ఎగవేతకు పాల్పడిందనే అనుమానంతోనే బీబీసీ ఆఫీసుల్లో సర్వే చేస్తున్నట్లు ఐటీ అధికారులు మంగళవారం వెల్లడించారు.

పలు అంశాలకు సంబంధించి సంస్థ లెక్కల్లో చూపించిన ఖర్చులపై సందేహాలు ఉన్నాయని అన్నారు. వాటిని నివృత్తి చేసుకోవడానికి బీబీసీ అకౌంట్స్ బుక్స్ ను, బ్యాలెన్స్ షీట్ తదితర అకౌంట్స్ వెరిఫికేషన్ చేస్తున్నట్లు తెలిపారు. ఇవి సోదాలు కాదని, సర్వే మాత్రమేనని ఐటీ వర్గాలు స్పష్టం చేశాయి.