చండీ, రుద్ర, రాజశ్యామల, సుదర్శన సహిత శ్రీలక్ష్మీ మహాయాగంలో పాల్గొన్న జగన్
- విజయవాడలోని మునిసిపల్ స్టేడియంలో యాగం
- ఉదయం 5 గంటలకు ప్రారంభమైన యాగ కార్యక్రమాలు
- యజ్ఞ సంకల్పం తీసుకున్న జగన్
- మళ్ళీ అధికారం కోసమేనా జగన్ యజ్ఞ సంకల్పం …?
ఏపీ సీఎం జగన్ ఓట్ల రాజకీయాలు మొదలు పెట్టారా అంటే అవుననే అంటున్నారు విశ్లేషకులు . క్రిస్టియన్ అయిన జగన్ హిందువుగా మారాడా…? అంటే మారాడని ప్రచారం జరుగుతుంది. అయితే ఆయన మాత్రం అన్ని మతాలకు సమాన ప్రాతినిధ్యం ఇస్తుంటారనే పేరుంది …అయినప్పటికీ ఆయన హిందూ మతం ప్రకారం యజ్ఞం చేయడం చర్చనీయాంశంగా మారింది .
రాష్ట్రం సస్యశ్యామలంగా ఉండాలని, ప్రజలంతా కల్యాణ సౌభాగ్యాలతో వర్ధిల్లాలని కాంక్షిస్తూ దేశాదాయశాఖ ఆధ్వర్యంలో అష్టోత్తర శత కుండాత్మక చండీ, రుద్ర, రాజశ్యామల, సుదర్శన సహిత శ్రీలక్ష్మీ మహాయాగం ప్రారంభమయింది. విజయవాడ బందరు రోడ్డులోని ఇందిరాగాంధీ మునిసిపల్ స్టేడియంలో నిర్వహిస్తున్న ఈ యజ్ఞంలో ముఖ్యమంత్రి జగన్ పాల్గొన్నారు. ఉదయం 5 గంటలకు మంగళ వాయిద్యాలు, వేదస్వస్తి, గోపూజ, విఘ్నేశ్వర, విశ్వక్సేనల పూజలు, పుణ్యాహవచనం తదితర కార్యక్రమాలతో ప్రారంభమయింది. జగన్ యజ్ఞ సంకల్పం తీసుకున్న తర్వాత మహాయజ్ఞం ప్రారంభమయింది. గోశాల వద్ద ముఖ్యమంత్రి ప్రత్యేక పూజలు నిర్వహించారు. అనంతరం అఖండ దీపారాధనలో పాల్గొన్నారు.
ఈ నెల 17వ తేదీ వరకు 6 రోజుల పాటు మహాయజ్ఞం కొనసాగనుంది. నాలుగు ప్రధాన యాగశాలల్లో ఒక్కో యాగశాలలో 27 కుండాల చెప్పున మొత్తం 108 కుండాలలో యాగ కార్యక్రమాలు జరగుతున్నాయి. భక్తులు వీక్షించేలా యాగశాలల చుట్టూ 4 క్యూలైన్లను ఏర్పాటు చేశారు. వీటిలో ఒక క్యూ లైన్ ను వీఐపీల కోసం ఏర్పాటు చేశారు. చివరి రోజున విశాఖ శ్రీశారదా పీఠాధిపతి స్వరూపానందేంద్ర, పీఠం ఉత్తరాధికారి స్వాత్మానందేంద్ర అన్యయంతో మహా పూర్ణాహుతితో యజ్ఞం ముగుస్తుంది.
