సాఫ్ట్ వెర్ రంగంలో పొంచి ఉన్న ప్రమాదం :30 లక్షల మంది ఉద్యోగులపై వేళ్ళాడుతున్న కత్తి!
-2022 నాటికి దేశంలో 30 లక్షల సాఫ్ట్‌వేర్ ఉద్యోగాలు గల్లంతు!
-దేశీయ సాఫ్ట్‌వేర్ రంగంలో 1.6 కోట్ల మందికిపైగా ఉద్యోగులు
-90 లక్షల మంది తక్కువ నైపుణ్యం కలిగిన సేవలు
-వీరిలోనే 30 శాతం కోత
-ఇన్ఫోసిస్, టెక్ మహీంద్ర, టీసీఎస్, విప్రో వంటి సంస్థల్లో కోతకు ప్రణాళిక
వచ్చే ఏడాది నాటికి దేశంలో 30 లక్షల సాఫ్ట్‌వేర్ ఉద్యోగాలకు ఎసరు తప్పదని బ్యాంక్ ఆఫ్ అమెరికా నివేదిక వెల్లడించింది. ప్రస్తుతం దేశీయ సాఫ్ట్‌వేర్ రంగంలో 1.6 కోట్ల మందికిపైగా పనిచేస్తుండగా 2022 నాటికి తక్కువ నైపుణ్యాలు కలిగిన 30 లక్షల మందిని తగ్గించుకోవాలని ఆయా సంస్థలు భావిస్తున్నట్టు నివేదిక పేర్కొంది. ఫలితంగా ఏడాదికి దాదాపు రూ. 7.5 లక్షల కోట్లు ఆదా చేసుకోవాలని భావిస్తున్నాయని తెలిపింది. ఉద్యోగాల్లో కోతకు యాంత్రీకరణే కారణమని వివరించింది.
దేశీయ ఐటీ రంగంలో పనిచేస్తున్న 1.6 కోట్ల మందిలో 90 లక్షల మంది తక్కువ నైపుణ్యం కలిగిన సేవలు, బీపీవో ఉద్యోగాల్లో పనిచేస్తున్నట్టు నివేదిక వెల్లడించింది. వీరిలో 30 శాతం మంది (30 లక్షల మంది) 2022 నాటికి ఉద్యోగాలు కోల్పోయే అవకాశం ఉందని తెలిపింది. రోబో ప్రాసెస్ ఆటోమేషన్ ప్రభావంతో అమెరికాలో 10 లక్షలు, భారత్‌లో ఏడు లక్షల ఉద్యోగాలు గల్లంతయ్యే ప్రభావం ఉందని పేర్కొంది. ఇక ఉద్యోగులను తగ్గించుకోవాలనుకుంటున్న సంస్థల్లో టీసీఎస్, ఇన్ఫోసిస్, విప్రో, హెచ్‌సీఎల్, టెక్ మహీంద్రా, కాగ్నిజెంట్ వంటి సంస్థలు ఉన్నాయి.
ఇప్పటి వరకు సాఫ్ట్ వెర్ రంగంలో పనిచేస్తున్న వారికీ ఇబ్బంది లేదని అనుకుంటున్న తరుణంలో పిడుగులాంటి వార్త వచ్చింది. ఇప్పటికే అనేక కంపెనీ లు ఆదిశగా ఆలోచనలు చేస్తున్నట్లు సమాచారం . ఇది దేశ ఆర్థిక వ్యవస్థపై పెద్ద ప్రభావం చూపే అవకాశం ఉంది. ఇంగినీరింగ్ విద్యార్థులు తమ చదువుల్లో నైపుణ్యం పెంచుకోకపోతే కంపెనీ లు రిక్రూట్ చేసుకునే అవకాశాలే లేవని సమాచారం. …
