హైద్రాబాద్ లో అంబులెన్స్ చోరీ …
పోలీసులను ముప్పు తిప్పలు పెట్టిన దొంగ
చివరకు టేకుమట్ల వద్ద పోలీసులకు దొరికి పోయిన దొంగ
హైద్రాబాద్ -విజయవాడ హైవే పై ఛేజింగ్ దృశ్యాలు వైరల్
తెలంగాణ రాష్ట్ర రాజధాని హైదరాబాద్లో షాకింగ్ ఇన్సిడెంట్ చోటు చేసుకుంది. కారు, బైక్ ఎత్తుకెళ్తే కిక్కే లేదనుకున్నాడో.. మరీ ఇంకేమనుకున్నాడో కానీ ఏకంగా అత్యవసర సేవలు అందించే అంబులెన్స్నే చోరీ చేశాడు ఓ విచిత్ర దొంగ..!!
పోలీసులను ముప్పు తిప్పలు పెట్టి చివరకు దొరికిపోయాడు. ఈ ఘటనకు సంబంధించి పోలీసుల వివరాల ప్రకారం.. హైదరాబాద్ శివారు హైయత్ నగర్లోని ఓ ప్రైవేట్ ఆసుపత్రి ముందు ఉన్న అంబులెన్స్పై కన్నేశాడో దొంగ. ఇంకేముంది.. ఎవరూ చూడని సమయంలో అంబులెన్స్ తీసుకుని పరార్ అయ్యాడు.
అంబులెన్స్ సైరన్ మోగిస్తూ అతి వేగంగా హైదరాబాద్-విజయవాడ హైవేపై అంబులెన్స్ను పరుగులు పెట్టించాడు. గమనించిన ఆసుపత్రి సిబ్బంది పోలీసులకు సమాచారం అందించారు. వెంటనే అప్రమత్తమైన పోలీసులు దొంగను వెంబడించారు. ఈ క్రమంలోనే చిట్యాల పోలీసులకు సమాచారం అందించారు. దీంతో చిట్యాల పోలీసులు దొంగను పట్టుకునేందుకు హైవే పై అడ్డంగా నిలబడ్డారు. పోలీసులను చూసి కూడా ఏ మాత్రం జంకని దొంగ.. ఏకంగా పోలీసును ఢీకొట్టి వెళ్లాడు. ఈ ఘటనలో జాన్ రెడ్డి అనే పోలీసు తీవ్రంగా గాయపడ్డాడు. చిట్యాల పోలీసుల నుండి తప్పించుకున్న దొంగ కేతేపల్లి మండలం కొర్లపహాడ్ టోల్‌ప్లాజా వద్ద టోల్ గేటును ఢీకొట్టి అలాగే ముందుకు పోయాడు. విషయం తెలుసుకున్న టేకుమట్ల పోలీసులు దొంగను పట్టుకునేందుకు పకడ్బందీ ప్లాన్ వేశారు. హైవేపై ఏకంగా కనీసం బైక్ కూడా పట్టే అంత గ్యాప్ వదలకుండా లారీలను అడ్డుపెట్టారు.
ఇక, గత్యంతరం లేని పరిస్థితిలో దొంగ అంబులెన్స్ను ఆపేశాడు. వెంటనే పోలీసులు టేకుమట్ల వద్ద దొంగను అదుపులోకి తీసుకుని అంబులెన్స్ను స్వాధీనం చేసుకున్నారు. పోలీసులను ముప్పు తిప్పలను పెట్టిన ఈ దొంగకు మానసిక పరిస్థితి సరిగ్గా లేనట్లు తెలుస్తోంది. ఏదేమైనా.. దొంగను పట్టుకోవడం కోసం విజయవాడ హైవే పై జరిగిన ఈ ఛేజింగ్ దృశ్యాలు సోషల్ మీడియాలో వైరల్గా మారాయి. సినిమాల్లో చూపించే మాదిరిగా విజయవాడ హైవేపై ఛేజింగ్ జరిగిందంటూ నెటిజెన్లు కామెంట్స్ చేస్తున్నారు.
