- యూట్యూబ్ ఇంటర్వ్యూ కారణంగా మాజీ నక్సలైట్ హత్య
- రాజన్న సిరిసిల్ల జిల్లాలో వెలుగుచూసిన ఘటన
- తండ్రిని చంపాడన్న ప్రతీకారంతో యువకుడి దాడి
- హత్య తర్వాత పోలీసులకు లొంగిపోయిన నిందితుడు
ఓ యూట్యూబ్ ఛానెల్కు ఇచ్చిన ఇంటర్వ్యూ ఒక మాజీ నక్సలైట్ ప్రాణాలను బలిగొంది. తన తండ్రిని చంపింది అతడేనని ఇంటర్వ్యూ ద్వారా తెలుసుకున్న ఓ యువకుడు, పగతో రగిలిపోయి ఆయన్ను దారుణంగా హత్య చేశాడు. ఈ ఘటన రాజన్న సిరిసిల్ల జిల్లా వేములవాడ అర్బన్ మండలం పరిధిలో కలకలం రేపింది.
వివరాల్లోకి వెళితే, తంగళ్లపల్లి మండలం గండిలచ్చపేటకు చెందిన బల్లెపు సిద్దయ్య అలియాస్ నర్సయ్య గతంలో నక్సలైట్గా పనిచేశారు. కొద్ది కాలం క్రితం ఆయన ఓ యూట్యూబ్ ఛానెల్కు ఇంటర్వ్యూ ఇచ్చారు. అందులో తాను అజ్ఞాతంలో ఉన్నప్పుడు పలువురిని హతమార్చినట్లు, పేర్లతో పాటు వెల్లడించారు. ఈ ఇంటర్వ్యూను జగిత్యాల జిల్లాకు చెందిన సంతోష్ అనే యువకుడు చూశాడు. తన తండ్రిని చంపింది నర్సయ్యేనని ఆ వీడియో ద్వారా నిర్ధారించుకున్నాడు.
దీంతో నర్సయ్యపై ప్రతీకారం తీర్చుకోవాలని నిర్ణయించుకున్నాడు. పథకం ప్రకారం, నర్సయ్యను వేములవాడ అర్బన్ మండలం అగ్రహారం గుట్టల్లోకి పిలిపించి దారుణంగా హతమార్చాడు. అనంతరం నిందితుడు సంతోష్ నేరుగా జగిత్యాల పోలీసుల ఎదుట లొంగిపోయాడు. ఈ ఘటనపై కేసు నమోదు చేసుకున్న పోలీసులు దర్యాప్తు చేస్తున్నారు. కేవలం ఒక ఇంటర్వ్యూ పాత పగను రగిల్చి హత్యకు దారితీయడం స్థానికంగా చర్చనీయాంశంగా మారింది.
