- మత్తు చాక్లెట్లు ఇచ్చి ఏడాదిన్నరగా తోటి విద్యార్థి అఘాయిత్యం
- ఫొటోలు, వీడియోలతో బెదిరించి లైంగిక దాడి
- బాధితురాలు ఆత్మహత్యాయత్నం చేయడంతో ఇద్దరిపై కేసు నమోదు
- ఫిర్యాదు చేసినా కాలేజీ యాజమాన్యం చర్యలు తీసుకోలేదని ఆరోపణ
హైదరాబాద్ బాచుపల్లిలోని ఓ ప్రముఖ ఇంజనీరింగ్ కళాశాలలో దారుణమైన సంఘటన వెలుగులోకి వచ్చింది. ప్రేమ పేరుతో దగ్గరైన తోటి విద్యార్థి, మత్తు చాక్లెట్లు ఇచ్చి ఏడాదిన్నర పాటు ఒక విద్యార్థినిపై పలుమార్లు అత్యాచారానికి పాల్పడ్డాడు. అతడి స్నేహితుడు కూడా లైంగిక వేధింపులకు పాల్పడటంతో బాధితురాలి ఫిర్యాదు మేరకు పోలీసులు ఇద్దరిపై కేసు నమోదు చేశారు.
పోలీసుల కథనం ప్రకారం బాచుపల్లిలోని ఇంజనీరింగ్ కాలేజీలో చివరి సంవత్సరం చదువుతున్న సిర్రా ఆశిష్ తనయ్ అదే కాలేజీ యువతితో స్నేహం పేరుతో దగ్గరయ్యాడు. ప్రేమ పేరుతో మాయమాటలు చెప్పి, తరగతి గదులు, హోటళ్లు, ఓయో రూమ్లకు తీసుకెళ్లి పలుమార్లు లైంగిక దాడికి పాల్పడ్డాడు. నిందితుడు డార్క్ వెబ్ నుంచి చాక్లెట్ల రూపంలో మత్తుమందులు తెప్పించి, వాటిని గర్భనిరోధక మాత్రలని చెప్పి యువతికి ఇచ్చేవాడు. ఈ మాత్రలు వేసుకున్న తర్వాత ఆమె గంటల తరబడి మత్తులో ఉండేదని, ఆ సమయంలో అత్యాచారం చేసేవాడని పోలీసులు తెలిపారు.
అంతేకాకుండా, ఏకాంతంగా ఉన్నప్పుడు తీసిన ఫొటోలు, వీడియోలను సోషల్ మీడియాలో పెడతానని, తల్లిదండ్రులకు పంపుతానని బెదిరిస్తూ బ్లాక్మెయిల్ చేశాడు. ఈ విషయం గురించి ఆశిష్ తన స్నేహితుడైన ప్రవీణ్కు చెప్పడంతో, అతడు కూడా బాధితురాలిని వేధించడం మొదలుపెట్టాడు. గత ఏడాది ఫిబ్రవరిలో మాట్లాడాలనే నెపంతో గండిమైసమ్మ సమీపంలోని ఓ హోటల్కు తీసుకెళ్లి అత్యాచారయత్నం చేయగా, ఆమె అక్కడి నుంచి తప్పించుకుంది.
ఇద్దరి వేధింపులు భరించలేక మనోవేదనకు గురైన యువతి శనివారం ఆత్మహత్యాయత్నం చేసింది. అంతకుముందే తల్లిదండ్రులు కాలేజీ యాజమాన్యానికి ఫిర్యాదు చేసినా వారు ఎలాంటి చర్యలు తీసుకోలేదని తెలిసింది. యువతి ఆత్మహత్యాయత్నంతో తల్లిదండ్రులు బాచుపల్లి పోలీసులను ఆశ్రయించగా, వారు కేసు నమోదు చేసి దర్యాప్తు చేపట్టారు.
