ఇమ్రాన్ ఖాన్‌ దేశం విడిచి వెళ్లాలంటూ నోటీసులు

బాలీవుడ్ నటుడు ఇమ్రాన్ ఖాన్‌కు నోటీసులు జారీ
రాజకీయ నిరసనలో పాల్గొన్నందుకు నోటీసులు
ఈ నోటీసులను బాంబే హైకోర్టులో సవాలు చేయనున్న ఇమ్రాన్ ఖాన్
అక్టోబర్ 28లోగా దేశం విడిచి వెళ్లాలని నోటీసులో ఆదేశం

ప్రముఖ బాలీవుడ్ నటుడు, ఆమిర్ ఖాన్ మేనల్లుడు ఇమ్రాన్ ఖాన్‌కు ఫారినర్స్ రీజినల్ రిజిస్ట్రేషన్ ఆఫీస్ (ఎఫ్ఆర్ఆర్ఓ) “లీవ్ ఇండియా” నోటీసు జారీ చేసింది. రాజకీయ నిరసనలో పాల్గొన్నారనే కారణంతో, 2026 అక్టోబర్ 28లోగా దేశం విడిచి వెళ్లాలని ఆ నోటీసులో ఆదేశించింది. ఈ నోటీసును సవాలు చేస్తూ ఇమ్రాన్ ఖాన్ బాంబే హైకోర్టును ఆశ్రయించేందుకు సిద్ధమయ్యారు.

అసలేం జరిగింది?

అమెరికా పౌరుడైన ఇమ్రాన్ ఖాన్, ఓవర్సీస్ సిటిజన్ ఆఫ్ ఇండియా (ఓసీఐ) కార్డుదారుడిగా భారత్‌లో నివసిస్తున్నారు. ఈ నెల అక్టోబర్ 10న ముంబైలోని ఆగస్ట్ క్రాంతి మైదాన్‌లో కేంద్ర ఎన్నికల సంఘం ప్రధాన కమిషనర్ జ్ఞానేశ్ కుమార్ రాజీనామా చేయాలని డిమాండ్ చేస్తూ జరిగిన నిరసన కార్యక్రమంలో ఆయన పాల్గొన్నారు. ఆ సందర్భంగా పోలీసులు ఆయన్ను, మరికొందరిని అదుపులోకి తీసుకుని, ఆ తర్వాత విడుదల చేశారు.

ఈ ఘటనపై బీజేపీ నేత కిరిట్ సోమయ్య తీవ్రంగా స్పందించారు. భారత పౌరుడు కాని ఇమ్రాన్ ఖాన్, ఓసీఐ హోదాలో ఉండి రాజకీయ నిరసనలో పాల్గొనడం ఇమ్మిగ్రేషన్, ఫారినర్స్ చట్టాలను ఉల్లంఘించడమేనని ఆయన ఫిర్యాదు చేశారు. ఈ ఫిర్యాదు ఆధారంగా ఎఫ్ఆర్ఆర్ఓ అధికారులు ఇమ్రాన్‌కు “లీవ్ ఇండియా నోటీస్” జారీ చేశారు.

హైకోర్టులో పిటిషన్

ఈ నోటీసులు చట్టవిరుద్ధమని ఇమ్రాన్ ఖాన్ తరఫు న్యాయవాదులు వాదిస్తున్నారు. ఆయన తరపున ఎంజీఎం లీగల్ సంస్థకు చెందిన జుల్ఫికర్ మెమన్, పర్వేజ్ మెమన్, చిరాగ్ నాయక్ బాంబే హైకోర్టులో పిటిషన్ దాఖలు చేసేందుకు ఏర్పాట్లు చేస్తున్నారు. రేపు ఈ పిటిషన్ రిజిస్టర్ అయ్యే అవకాశం ఉంది. జస్టిస్ మహేశ్ చంద్ర త్రిపాఠి నేతృత్వంలోని డివిజన్ బెంచ్ ముందు ఈ పిటిషన్‌‍‌ను అత్యవసర విచారణకు తీసుకురావాలని వారు ప్రయత్నిస్తున్నారు.

ఓసీఐ నిబంధనలు రాజకీయ నిరసనల్లో పాల్గొనడాన్ని నిషేధించలేదని, అసలు ఏ నిబంధనలను ఉల్లంఘించారో కూడా ఈ నోటీసులో స్పష్టంగా పేర్కొనలేదని ఇమ్రాన్ ఖాన్ తరపు న్యాయవాదులు చెబుతున్నారు. ఓసీఐ కార్డుదారులకు ఓటు హక్కు, ఎన్నికల్లో పోటీ చేసే హక్కు లేనప్పటికీ, శాంతియుత నిరసనల్లో పాల్గొనే హక్కుపై ఈ కేసు ద్వారా స్పష్టత వచ్చే అవకాశం ఉంది.

Save or share this story as a newspaper-style Epaper Clip: