- దౌత్యసిబ్బంది సంఖ్య తగ్గించాలని భారత్ పట్టుపట్టడంపై ప్రధాని జస్టిన్ ట్రూడో అభ్యంతరం
- దౌత్యసిబ్బంది తగ్గింపుతో వీసా, కాన్సులార్ సేవలకు అంతరాయం ఏర్పడిందని వెల్లడి
- ఫలితంగా, ఇరు దేశాల్లో లక్షలాది మంది ఇబ్బందుల పాలవుతున్నారన్న ట్రూడో
కెనడా ప్రధాని జస్టిన్ ట్రూడో మరోసారి భారత్‌పై తన అక్కసు వెళ్లబోసుకున్నారు. భారత్ చర్యలు ఇరు దేశాల్లోని లక్షలాది మందిని ఇక్కట్లపాలు చేస్తున్నాయని ఆరోపించారు. కెనడా దౌత్యవేత్తల ఉపసంహరణ అనంతరం శుక్రవారం ఆయన మీడియాతో మాట్లాడారు. దౌత్యవేత్తల తరలింపుతో భారత్‌లో కెనడా వీసా, కాన్సులార్ సేవలకు అంతరాయం ఏర్పడి పర్యాటక, వాణిజ్య రంగాల్లో అడ్డంకులు ఎదురవుతున్నాయని చెప్పారు. కెనడాలో చదువుకుంటున్న భారతీయ విద్యార్థులూ సమస్యల పాలవుతారని అన్నారు.
‘‘దౌత్యసంబంధాల ప్రాథమిక నిబంధనలకు విరుద్ధంగా భారత్ వ్యవహరిస్తోంది. ఇరు దేశాల్లో ఉంటున్న లక్షలాది మందిని ఇక్కట్ల పాలు చేస్తోంది. కెనడాలో భారత మూలాలున్న అనేక మంది పౌరుల గురించి నాకు ఆందోళనగా ఉంది’’ అని జస్టిన్ ట్రూడో పేర్కొన్నారు.
కెనడా జనాభాలో దాదాపు 5 శాతం..అంటే సుమారు 20 లక్షల మంది భారత సంతతి వారు ఉన్నారు. అంతేకాకుండా, కెనడాలో చదువుకుంటున్న అంతర్జాతీయ విద్యార్థుల్లో భారతీయులు సుమారు 40 శాతం మంది ఉన్నారు.
సిక్కు వేర్పాటువాది, కెనడా పౌరుడు హర్‌దీప్ సింగ్ నిజ్జర్ హత్య వెనక భారత సీక్రెట్ ఏజెంట్లు ఉన్నారన్న ప్రధాని ట్రూడో ఆరోపణ ఇరు దేశాల మధ్య వివాదాన్ని రాజేసిన విషయం తెలిసిందే. కెనడాపై ఆగ్రహానికి గురైన భారత్ తమ దేశంలో కెనడా దౌత్యసిబ్బంది సంఖ్య తగ్గించుకోవాలని ఆదేశించింది. ఈ మేరకు 41 మంది దౌత్యవేత్తలను కెనడా గురువారం వెనక్కు పిలిపించుకుంది. వీరిలో కెనడా వలసల శాఖకు చెందిన 27 మంది సిబ్బంది కూడా ఉండటంతో భారత్‌లో కెనడా కాన్సులార్ సేవలకు అంతరాయం ఏర్పడింది. న్యూఢిల్లీలోని కెనడా హైకమిషన్ మినహా ఇతర దౌత్యకార్యాలయాల్లో వీసా ప్రాసెసింగ్, కాన్సులార్ సేవలను తాత్కాలికంగా నిలిపివేస్తున్నట్టు కెనడా ప్రకటించింది. దీని ఫలితంగా వీసాల జారీలో జాప్యం జరుగుతుందని కూడా కెనడా వలసల శాఖ పేర్కొంది.
భారత్‌తో దౌత్యవేత్తల వివాదం.. కెనడాకు మద్దతుగా అమెరికా
21-10-2023 Sat 07:13 | International
- భారత్ ఆదేశాలతో తన దౌత్యవేత్తలను వెనక్కు పిలిపించుకున్న కెనడా ప్రభుత్వం
- ఈ ఘటనపై కెనడాకు మద్దతుగా నిలిచిన అమెరికా
- దౌత్యవేత్తల ఉపసంహరణకు పట్టుపట్టొద్దంటూ భారత్‌కు సూచన
భారత్, కెనడా మధ్య ఉద్రిక్తతలు మరింత ముదిరిన వేళ అగ్రరాజ్యం అమెరికా కెనడాకు మద్దతుగా నిలిచింది. భారత్‌లో కెనడా దౌత్యవేత్తల సంఖ్య తగ్గించాలంటూ ఒత్తిడి చేయొద్దని భారత్‌ను కోరింది. గురువారం భారత్‌లోని తన 41 మంది దౌత్యవేత్తలను కెనడా వెనక్కు పిలిపించుకున్న విషయం తెలిసిందే. దౌత్యవేత్తల సంఖ్య తగ్గించుకోవాలంటూ భారత్ విధించిన డెడ్‌లైన్ ముగియడంతో వారిని వెనక్కు రప్పించింది.
ఈ పరిణామంపై అమెరికా తాజాగా స్పందించింది. ‘‘దౌత్యసిబ్బంది సంఖ్య తగ్గించుకోవాలన్న భారత్ డిమాండ్ మేరకు కెనడా దౌత్యవేత్తల తరలింపు మాకు ఆందోళన కలిగిస్తోంది’’ అని అమెరికా విదేశాంగ శాఖ ప్రతినిధి మ్యాథ్యూ మిల్లర్ పేర్కొన్నారు.
సిక్కు వేర్పాటువాది, కెనడా పౌరుడు హర్‌దీప్ సింగ్ నిజ్జర్ హత్య వెనక భారత సీక్రెట్ ఏజెంట్ల హస్తం ఉందని కెనడా ప్రధాని జస్టిన్ ట్రూడో ఆరోపించడంతో ఇరు దేశాల మధ్య దౌత్య వివాదం మొదలైన విషయం తెలిసిందే.
