• ఒకే పిల్లర్‌పై రెండు నిర్మాణాలు వద్దంటున్న హైదరాబాద్ మెట్రో రైల్
• ప్రయాణికుల ఇబ్బందులు, నిర్వహణ ఖర్చులే ప్రధాన కారణాలు
• విప్రో జంక్షన్, మందమల్లమ్మ చౌరస్తాలో ప్రతిపాదనలకు తిరస్కరణ
• భారీగా పెరగనున్న భూసేకరణ వ్యయం, ప్రాజెక్టుల ఆలస్యం

నగరంలో ట్రాఫిక్ సమస్యను అధిగమించడంతో పాటు, నిర్మాణ వ్యయాన్ని గణనీయంగా తగ్గించేందుకు ప్రతిపాదించిన డబుల్ డెక్కర్ వంతెనల ప్రాజెక్టుకు బ్రేక్ పడింది. ఒకే పిల్లర్‌పై వాహనాల కోసం ఫ్లైఓవర్, దానిపైన మెట్రో రైల్ కారిడార్ నిర్మించాలన్న ఆలోచనను హైదరాబాద్ మెట్రో రైల్ లిమిటెడ్ (హెచ్‌ఎంఆర్ఎల్) తీవ్రంగా వ్యతిరేకిస్తోంది. ఈ తరహా నిర్మాణాలు ఆచరణలో ప్రయోజనకరంగా ఉండవని, ప్రయాణికులకు ఇబ్బందులు తప్పవని స్పష్టం చేస్తోంది.

భూసేకరణ వ్యయం, ప్రాజెక్టుల ఆలస్యాన్ని నివారించేందుకు ప్రభుత్వం మెట్రో కారిడార్లు ఉన్న మార్గాల్లో డబుల్ డెక్కర్ వంతెనల నిర్మాణాన్ని పరిశీలించాలని ఆదేశించింది. దీనిలో భాగంగా విప్రో జంక్షన్, మందమల్లమ్మ చౌరస్తా – టీకేఆర్ కాలేజీ మార్గంలో ఈ తరహా నిర్మాణాలు చేపట్టాలని జీహెచ్ఎంసీ భావించింది. అయితే, ఈ ప్రతిపాదనలను హెచ్‌ఎంఆర్ఎల్ తిరస్కరించింది. నాగ్‌పూర్, జైపూర్ వంటి నగరాల్లో ఇలాంటి వంతెనల వల్ల ప్రజలు ఇబ్బందులు పడుతున్నారని మెట్రో అధికారులు తమ సమావేశాల్లో పేర్కొన్నట్లు సమాచారం.

డబుల్ డెక్కర్ నిర్మాణాల్లో మెట్రో స్టేషన్లు చాలా ఎత్తులో నిర్మించాల్సి వస్తుందని, అంత ఎత్తుకు ప్రయాణికులు రాకపోకలు సాగించడం కష్టమవుతుందని హెచ్‌ఎంఆర్ఎల్ వివరిస్తోంది. అంతేకాకుండా, నిర్వహణ ఖర్చులు కూడా పెరుగుతాయని చెబుతోంది. ఈ కారణాల రీత్యా డబుల్ డెక్కర్ మోడల్ ఆచరణ సాధ్యం కాదని తేల్చిచెప్పింది.

హెచ్‌ఎంఆర్ఎల్ నిర్ణయంతో ఇకపై ఫ్లైఓవర్లు, మెట్రో కారిడార్లను వేర్వేరుగానే నిర్మించనున్నారు. దీనివల్ల రహదారులను 150 నుంచి 200 అడుగుల వరకు విస్తరించాల్సి ఉంటుంది. నగరంలో ప్రాజెక్టుల వ్యయంలో దాదాపు 40-50 శాతం భూసేకరణకే సరిపోతున్న తరుణంలో, ఈ నిర్ణయం వల్ల ప్రభుత్వ ఖజానాపై మరింత భారం పడనుంది. ఖర్చును, సమయాన్ని ఆదా చేస్తుందనుకున్న డబుల్ డెక్కర్ వంతెనల ప్రణాళిక ప్రస్తుతానికి పక్కకు వెళ్లినట్లే కనిపిస్తోంది.

About The Author

Ram Narayana

See author's posts