• వెనెజువెలా రాజధాని కారకాస్‌లో భారీ పేలుళ్లు
• ఇది అమెరికా సైనిక దాడేనని ఆరోపించిన మదురో ప్రభుత్వం
• దేశంలో జాతీయ అత్యవసర పరిస్థితి విధింపు
• ట్రంప్ ఆదేశాలతోనే దాడులని పేర్కొన్న అమెరికా మీడియా
• వెనెజువెలా గగనతలంలో విమానాలపై అమెరికా నిషేధం

వెనెజువెలాలో శనివారం తెల్లవారుజామున తీవ్ర ఉద్రిక్తత చోటుచేసుకుంది. రాజధాని కారకాస్‌తో పాటు పలు నగరాల్లో భారీ పేలుళ్లు సంభవించాయి. ఇది అమెరికా జరిపిన సైనిక దాడేనని వెనెజువెలా అధ్యక్షుడు నికోలస్ మదురో ప్రభుత్వం తీవ్రంగా ఆరోపించింది. దేశవ్యాప్తంగా జాతీయ అత్యవసర పరిస్థితి (నేషనల్ ఎమర్జెన్సీ) విధిస్తున్నట్లు ప్రకటించింది.

స్థానిక కాలమానం ప్రకారం తెల్లవారుజామున 2 గంటల సమయంలో కారకాస్‌లో కనీసం ఏడు భారీ పేలుళ్ల శబ్దాలు వినిపించాయి. యుద్ధ విమానాలు తక్కువ ఎత్తులో ప్రయాణించినట్లు స్థానికులు తెలిపారు. కారకాస్‌లోని లా కార్లోటా సైనిక వైమానిక స్థావరం, ఫ్యూర్టే టియునా మిలిటరీ బేస్‌తో పాటు మిరాండా, లా గౌయిరా, అరాగువా రాష్ట్రాల్లోని సైనిక, పౌర లక్ష్యాలపై దాడులు జరిగాయని వెనెజువెలా ప్రభుత్వం పేర్కొంది.

“మా దేశంలోని చమురు, ఖనిజ వనరులను స్వాధీనం చేసుకోవాలనే దురుద్దేశంతోనే అమెరికా ఈ దురాక్రమణకు పాల్పడింది. మా రాజకీయ స్వాతంత్ర్యాన్ని బలవంతంగా దెబ్బతీయాలని చూస్తున్నారు, కానీ అది ఎప్పటికీ జరగదు,” అని మదురో ప్రభుత్వం ఒక ప్రకటనలో తీవ్రంగా ఖండించింది.

ఈ దాడులపై అమెరికా ప్రభుత్వం నుంచి (వైట్‌హౌస్, పెంటగాన్) ఎలాంటి అధికారిక ప్రకటన వెలువడలేదు. అయితే, అధ్యక్షుడు డొనాల్డ్ ట్రంప్ ఆదేశాల మేరకే వెనెజువెలాలోని కొన్ని ప్రాంతాలపై దాడులు జరుగుతున్నాయని పేరు చెప్పడానికి ఇష్టపడని అమెరికా అధికారులు కొన్ని మీడియా సంస్థలకు తెలిపినట్లు అంతర్జాతీయ వార్తా కథనాలు వెలువడుతున్నాయి. మరోవైపు, “కొనసాగుతున్న సైనిక కార్యకలాపాల” కారణంగా వెనెజువెలా గగనతలంలో తమ వాణిజ్య విమానాల రాకపోకలను అమెరికా ఫెడరల్ ఏవియేషన్ అడ్మినిస్ట్రేషన్ (FAA) నిషేధించింది.

ఈ ఘటనపై పొరుగు దేశమైన కొలంబియా అధ్యక్షుడు గుస్తావో పెట్రో స్పందించారు. కారకాస్‌పై మిస్సైళ్లతో బాంబు దాడులు జరుగుతున్నాయని, ఐక్యరాజ్యసమితి వెంటనే అత్యవసరంగా సమావేశం కావాలని ఆయన సోషల్ మీడియా వేదికగా పిలుపునిచ్చారు. డ్రగ్స్ అక్రమ రవాణాకు మదురో ప్రభుత్వం సహకరిస్తోందని ఆరోపిస్తూ అమెరికా గత కొన్ని నెలలుగా తీవ్ర ఒత్తిడి తీసుకువస్తున్న నేపథ్యంలో ఈ దాడులు జరగడం గమనార్హం. ప్రస్తుతం వెనెజువెలాలో యుద్ధ వాతావరణం నెలకొంది. దాడుల్లో జరిగిన నష్టం, మృతుల వివరాలపై ఇంకా స్పష్టత రాలేదు.

వెనెజులా అధ్యక్షుడ్ని, ఆయన భార్యను అదుపులోకి తీసుకున్నాం: ట్రంప్ సంచలన ప్రకటన

• వెనెజులాపై అమెరికా భారీ సైనిక దాడి!
• అధ్యక్షుడు మదురో, ఆయన భార్యను దేశం బయటికి తరలించామని ట్రంప్ వెల్లడి
• రాజధాని కారకాస్‌లో వరుస పేలుళ్లతో ప్రజల భయాందోళన
• ఇది అమెరికా దురాక్రమణేనని వెనెజులా ప్రభుత్వం ఆరోపణ
• దేశంలో జాతీయ అత్యవసర పరిస్థితిని ప్రకటించిన మదురో సర్కార్

అంతర్జాతీయ రాజకీయాల్లో తీవ్ర ప్రకంపనలు సృష్టిస్తూ వెనెజులాపై అమెరికా భారీ సైనిక దాడికి పాల్పడినట్లు తెలుస్తోంది. వెనెజులా అధ్యక్షుడు నికోలస్ మదురో, ఆయన భార్యను బంధించి, దేశం బయటకు తరలించామని అమెరికా అధ్యక్షుడు డొనాల్డ్ ట్రంప్ సంచలన ప్రకటన చేశారు. శనివారం తెల్లవారుజామున వెనిజువెలా రాజధాని కారకాస్‌లో భారీ పేలుళ్లు సంభవించిన నేపథ్యంలో ట్రంప్ వ్యాఖ్యలు ప్రపంచవ్యాప్తంగా కలకలం రేపాయి.

తన సోషల్ మీడియా ప్లాట్‌ఫామ్ ‘ట్రూత్ సోషల్’ వేదికగా ట్రంప్ ఈ విషయాన్ని వెల్లడించారు. “అమెరికా సంయుక్త రాష్ట్రాలు వెనెజులాపై, ఆ దేశ నేత నికోలస్ మదురోపై విజయవంతంగా భారీ సైనిక చర్యను చేపట్టాయి. మదురోను, ఆయన భార్యను బంధించి, దేశం వెలుపలకు తరలించాం” అని ట్రంప్ తన పోస్ట్‌లో పేర్కొన్నారు. అమెరికా చట్ట సంస్థల సహకారంతో ఈ ఆపరేషన్ నిర్వహించామని, మరిన్ని వివరాలను ఫ్లోరిడాలోని మార్-ఎ-లాగోలో ఉదయం 11 గంటలకు (స్థానిక కాలమానం ప్రకారం) జరిగే మీడియా సమావేశంలో వెల్లడిస్తామని తెలిపారు. అమెరికా సైన్యంలోని అత్యంత కీలకమైన ‘డెల్టా ఫోర్స్’ ఈ ఆపరేషన్‌ను నిర్వహించినట్లు అమెరికన్ మీడియా వర్గాలు పేర్కొన్నాయి.

మరోవైపు, ఈ దాడిని వెనిజువెలా ప్రభుత్వం తీవ్రంగా ఖండించింది. ఇది అమెరికా పాల్పడిన అత్యంత తీవ్రమైన సైనిక దురాక్రమణ అని మండిపడింది. తమ దేశంలోని చమురు, ఖనిజ సంపద వంటి వ్యూహాత్మక వనరులను స్వాధీనం చేసుకోవడానికే అమెరికా ఈ దుశ్చర్యకు పాల్పడిందని ఆరోపించింది. శనివారం తెల్లవారుజామున 2 గంటల సమయంలో కారకాస్‌లో కనీసం ఏడు భారీ పేలుళ్లు సంభవించాయని, ఆకాశంలో యుద్ధ విమానాల శబ్దాలు వినిపించాయని స్థానికులు తెలిపారు. ఈ ఘటనలతో ప్రజలు భయంతో ఇళ్ల నుంచి బయటకు పరుగులు తీశారు. కారకాస్‌లోని లా కార్లోటా సైనిక విమానాశ్రయం, ఫోర్ట్ టియునా సైనిక స్థావరం సమీపంలో దట్టమైన పొగలు కమ్ముకున్న వీడియోలు సోషల్ మీడియాలో వైరల్ అయ్యాయి.

భారీ పేలుళ్ల నేపథ్యంలో అధ్యక్షుడు నికోలస్ మదురో ప్రభుత్వం దేశంలో జాతీయ అత్యవసర పరిస్థితిని ప్రకటించింది. పేలుళ్ల కారణంగా కారకాస్‌లోని కొన్ని ప్రాంతాల్లో విద్యుత్ సరఫరా, టెలికమ్యూనికేషన్ సేవలకు అంతరాయం ఏర్పడింది.

కొలంబియాలోని అమెరికా రాయబార కార్యాలయం (వెనిజువెలా వ్యవహారాలను కూడా ఇదే కార్యాలయం పర్యవేక్షిస్తుంది) వెనెజులాకు ప్రయాణాలపై తీవ్ర హెచ్చరికలు జారీ చేసింది. అత్యంత ప్రమాదకరమైన ‘లెవెల్ 4’ ట్రావెల్ అడ్వైజరీని పునరుద్ఘాటించింది. వెనెజులాలో ఉన్న అమెరికా పౌరులు సురక్షిత ప్రాంతాల్లో తలదాచుకోవాలని, వీలైనంత త్వరగా దేశం విడిచి వెళ్లాలని సూచించింది. 2019 మార్చిలోనే కారకాస్‌లోని రాయబార కార్యాలయాన్ని మూసివేసినందున, అక్కడ తమ పౌరులకు ఎలాంటి అత్యవసర సేవలు అందించలేమని స్పష్టం చేసింది. ట్రంప్ నిర్వహించబోయే మీడియా సమావేశం తర్వాత ఈ ఘటనపై మరింత స్పష్టత వచ్చే అవకాశం ఉంది.

వెనెజులాపై అమెరికా దాడి… భగ్గుమన్న రష్యా, ఇరాన్, క్యూబా

• వెనెజులాపై అమెరికా భారీ సైనిక దాడి, అధ్యక్షుడు మదురో నిర్బంధం!
• ఇది సార్వభౌమాధికారంపై దాడిగా అభివర్ణించిన పలు దేశాలు
• అమెరికా చర్యను తీవ్రంగా ఖండించిన రష్యా, ఇరాన్, క్యూబా
• వెంటనే ఐరాస భద్రతా మండలి సమావేశం ఏర్పాటు చేయాలని డిమాండ్
• వెనెజులా ప్రజలకు తమ మద్దతు ఉంటుందని స్పష్టం చేసిన రష్యా

వెనెజులాపై అమెరికా శనివారం భారీ సైనిక దాడికి పాల్పడింది. ఈ దాడిలో ఆ దేశ అధ్యక్షుడు నికోలస్ మదురో, ఆయన భార్యను బంధించి దేశం నుంచి తరలించినట్లు అమెరికా అధ్యక్షుడు డొనాల్డ్ ట్రంప్ తన ట్రూత్ సోషల్ ఖాతాలో ప్రకటించారు. అమెరికా చేపట్టిన ఈ చర్యను రష్యా, ఇరాన్, క్యూబాతో సహా పలు దేశాలు తీవ్రంగా ఖండించాయి. ఇది వెనెజులా సార్వభౌమాధికారాన్ని, ప్రాదేశిక సమగ్రతను దారుణంగా ఉల్లంఘించడమేనని మండిపడ్డాయి.

అమెరికా చర్య తీవ్ర ఆందోళన కలిగిస్తోందని, దీనిని తీవ్రంగా ఖండిస్తున్నామని రష్యా విదేశాంగ శాఖ ఒక ప్రకటనలో తెలిపింది. “ఇలాంటి చర్యలను సమర్థించుకోవడానికి ఉపయోగించే సాకులు నిలకడలేనివి. కేవలం సైద్ధాంతిక శత్రుత్వం వల్లే ఈ దాడి జరిగింది. లాటిన్ అమెరికా శాంతి క్షేత్రంగానే ఉండాలి. వెనెజులా తన భవిష్యత్తును తానే నిర్ణయించుకునే హక్కుకు హామీ ఇవ్వాలి. వెనెజులా ప్రజలకు మా సంఘీభావం ఉంటుంది” అని రష్యా స్పష్టం చేసింది. ఈ అంశంపై తక్షణమే ఐక్యరాజ్యసమితి భద్రతా మండలి సమావేశం ఏర్పాటు చేయాలన్న వెనెజులా డిమాండ్‌కు రష్యా మద్దతు ప్రకటించింది.

మరోవైపు, క్యూబా అధ్యక్షుడు మిగ్యూల్ డియాజ్-కెనెల్ ఈ దాడిని ‘నేరపూరిత చర్య’గా అభివర్ణించారు. ఇది వెనెజులా ధైర్యవంతులైన ప్రజలపై జరుగుతున్న ‘అగ్రరాజ్య ఉగ్రవాదం’ అని ఆయన సోషల్ మీడియాలో పేర్కొన్నారు. క్యూబా విదేశాంగ మంత్రి బ్రూనో రోడ్రిగ్జ్ కూడా అమెరికా చర్యను పిరికిపంద చర్యగా ఖండించారు.

ఇరాన్ విదేశాంగ శాఖ కూడా అమెరికా దాడిని తీవ్రంగా ఖండించింది. ఇది దురాక్రమణ చర్య అని, ఐక్యరాజ్యసమితి చార్టర్ ప్రాథమిక సూత్రాలను స్పష్టంగా ఉల్లంఘించడమేనని పేర్కొంది. తన సార్వభౌమాధికారాన్ని, ప్రాదేశిక సమగ్రతను కాపాడుకునే హక్కు వెనెజులాకు ఉందని, అమెరికా ‘దండయాత్ర’ను తక్షణమే ఆపడానికి అంతర్జాతీయ సమాజం తన చట్టపరమైన, నైతిక బాధ్యతను నెరవేర్చాలని ఇరాన్ పిలుపునిచ్చింది.