- లీకేజీ వెనుక సమన్వయంతో కూడిన కుట్ర జరిగిందని పోలీసుల అనుమానం
- క్రిమినల్ కుట్ర అభియోగాలను జోడించి ఎఫ్ఐఆర్ నమోదు
- పబ్లిషర్ పెంగ్విన్ రాండమ్ హౌస్కు నోటీసుల జారీ
భారత మాజీ సైన్యాధ్యక్షుడు జనరల్ (రిటైర్డ్) ఎంఎం నరవణె రాసిన ‘ఫోర్ స్టార్స్ ఆఫ్ డెస్టినీ’ పుస్తకం లీకేజీ వ్యవహారం కొత్త మలుపు తీసుకుంది. ప్రభుత్వ అనుమతి పొందకముందే ఈ పుస్తకాన్ని ప్రపంచ మార్కెట్లలోకి విడుదల చేయడం వెనుక సమన్వయంతో కూడిన కుట్ర జరిగిందని ఢిల్లీ పోలీసులు ప్రాథమికంగా అనుమానిస్తున్నారు. రక్షణ మంత్రిత్వ శాఖ క్లియరెన్స్ను తప్పించేందుకే ఈ ప్రయత్నం జరిగిందని దర్యాప్తు వర్గాలు భావిస్తున్నాయి.
ఈ వివాదంపై ఢిల్లీ పోలీసు స్పెషల్ సెల్ ఇప్పటికే ఎఫ్ఐఆర్ నమోదు చేసి దర్యాప్తు చేస్తోంది. తాజాగా ఈ కేసులో క్రిమినల్ కుట్ర అభియోగాలను కూడా జోడించింది. పుస్తకాన్ని ఇంకా అధికారికంగా ప్రచురించనప్పటికీ, దాని పీడీఎఫ్ కాపీ ఆన్లైన్లో, ముఖ్యంగా అమెరికా, యూకే, కెనడా, ఆస్ట్రేలియా వంటి దేశాల్లో ఎలా సర్క్యులేట్ అయిందనే దానిపై పోలీసులు దృష్టి సారించారు. విచారణలో భాగంగా పుస్తక ప్రచురణ సంస్థ పెంగ్విన్ రాండమ్ హౌస్ ఇండియా (PRHI) కార్యాలయానికి వెళ్లి, వారికి నోటీసులు జారీ చేశారు.
లోక్సభలో కాంగ్రెస్ ఎంపీ రాహుల్ గాంధీ ఫిబ్రవరి 2న ఈ పుస్తకంలోని కొన్ని భాగాలను ప్రస్తావించేందుకు ప్రయత్నించడంతో ఈ వివాదం మొదలైంది. ప్రచురితం కాని పుస్తకాన్ని ఉటంకించడం నిబంధనలకు విరుద్ధమని అధికార పక్షం అభ్యంతరం వ్యక్తం చేసింది. మరోవైపు, పుస్తకం ఇంకా తమ వద్ద ప్రచురణ కాలేదని, సర్క్యులేషన్లో ఉన్న కాపీలు కాపీరైట్ ఉల్లంఘన కిందకు వస్తాయని ప్రచురణ సంస్థ స్పష్టం చేసింది. ఈ ప్రకటనను జనరల్ నరవణె కూడా సోషల్ మీడియాలో షేర్ చేశారు. ఈ పరిణామాల నేపథ్యంలో, సైనిక సిబ్బంది పుస్తకాలు రాసే విషయంలో రక్షణ మంత్రిత్వ శాఖ కొత్త మార్గదర్శకాలను రూపొందిస్తున్నట్లు సమాచారం.
