హైద‌రాబాద్‌ అపోలో ఆసుప‌త్రికి ష‌ర్మిల‌.. కాసేప‌ట్లో జ‌గ‌న్‌, చంద్ర‌బాబు కూడా

ఆంధ్ర‌ప్ర‌దేశ్ మంత్రి మేకపాటి గౌతమ్ రెడ్డి గుండెపోటుతో హైద‌రాబాద్‌లోని అపోలో ఆసుప‌త్రిలో హఠాన్మరణం చెందిన విష‌యం తెలిసిందే. ఆయ‌న మృతి వార్త తెలుసుకున్న ప్ర‌ముఖులు అపోలో ఆసుప‌త్రికి త‌ర‌లి వ‌స్తున్నారు. ఇప్ప‌టికే అపోలో ఆసుప‌త్రికి చేరుకున్న వైఎస్సార్‌టీపీ అధినేత్రి ష‌ర్మిల ఆయ‌న పార్ధివ దేహానికి నివాళులు అర్పించారు. అలాగే, ఆసుప‌త్రి వ‌ద్ద‌కు టీడీపీ నేత సోమిరెడ్డి చంద్ర‌మోహ‌న్ రెడ్డి చేరుకున్నారు.

మ‌రోవైపు, త‌న కార్యక్ర‌మాల‌న్నింటినీ వాయిదా వేసుకున్న ఏపీ సీఎం జ‌గ‌న్ తాడేప‌ల్లి నుంచి హైద‌రాబాద్ చేరుకుని అపోలో ఆసుప‌త్రికి వెళ్లి మేక‌పాటి గౌతం రెడ్డి పార్ధివ దేహాన్ని సంద‌ర్శిస్తారు. అలాగే, టీడీపీ అధినేత చంద్ర‌బాబు నాయుడు కూడా కాసేప‌ట్లో అపోలో ఆసుప‌త్రికి వెళ్ల‌నున్నారు.

‘ఆంధ్రప్రదేశ్ రాష్ట్ర ఐటీ, పరిశ్రమల శాఖ మంత్రి, వైసీపీ నేత మేకపాటి గౌతమ్‌ రెడ్డి హఠాన్మరణ వార్త దిగ్భ్రాంతికి గురిచేసింది. ఆయన ఆత్మకు శాంతి చేకూరాలని భగవంతుని ప్రార్థిస్తూ… వారి కుటుంబ సభ్యులకు నా ప్రగాఢ సానుభూతిని తెలియజేస్తున్నాను’ అని చంద్ర‌బాబు నాయుడు ట్వీట్ చేశారు.

గౌతమ్ రెడ్డి మరణం ఎంతో బాధను కలిగిస్తోంది: జగన్, కేవీపీ రామచంద్రరావు

ఆంధ్రప్రదేశ్ ఐటీ శాఖ, పరిశ్రమల శాఖ మంత్రి మేకపాటి గౌతమ్ రెడ్డి హఠాన్మరణం అందరినీ దిగ్భాంతికి గురి చేస్తోంది. ఆయన మృతి పట్ల ఏపీ సీఎం జగన్ తీవ్ర ఆవేదనను వ్యక్తం చేశారు. తనకు తొలినాళ్ల నుంచి సుపరిచితుడైన యువ నేత గౌతమ్ రెడ్డి అని జగన్ అన్నారు. గౌతమ్ మృతి ఎంతో బాధను కలిగిస్తోందని చెప్పారు. యువ మంత్రివర్గ సహచరుడిని కోల్పోవడం చెప్పలేనంత ఆవేదనను కలిగించిందన్నారు. ఆయన కుటుంబ సభ్యులకు ప్రగాఢ సానుభూతిని తెలియజేశారు. ముందు నుంచి కూడా జగన్ తో గౌతమ్ రెడ్డికి అనుబంధం ఉంది.

గౌతమ్ రెడ్డి మృతి పట్ల మాజీ పార్లమెంటు సభ్యులు కేవీపీ రామచంద్రరావు ఆవేదన వ్యక్తం చేశారు. గౌతమ్ రెడ్డి తనకు అత్యంత ఆప్తుడని చెప్పారు. రాజకీయాల్లో స్తబ్దుగా ఉండొద్దని, ఏపీ రాజకీయాల్లో క్రియాశీలకంగా పని చేయాలని తనను కోరేవాడని తెలిపారు. ఎంతో ఉజ్వలమైన రాజకీయ భవిష్యత్తు ఉన్న గౌతమ్ చిన్న వయసులోనే ఆకస్మిక మరణానికి గురి కావడం బాధాకరమని చెప్పారు. ఆయన ఆత్మకు శాంతి చేకూరాలని భగవంతుడిని ప్రార్థిస్తున్నానని తెలిపారు. గౌతమ్ తండ్రి రాజమోహన్ రెడ్డి కుటుంబంతో దివంగత రాజశేఖరరెడ్డికి, తనకు ఎంతో సాన్నిహిత్యం ఉందని తెలిపారు.

ఏపీ మంత్రి మేకపాటి గౌతమ్ రెడ్డి హ‌ఠాన్మ‌ర‌ణం ప‌ట్ల తెలంగాణ నేత‌ల సంతాపం
దిగ్భ్రాంతికి గుర‌య్యా: కేటీఆర్
మంచి రాజకీయ భవిష్యత్తు ఉన్న నేత
ఆయ‌న‌ మరణం కలచివేసింది: రేవంత్ రెడ్డి
వారి కుటుంబ సభ్యులకు ప్రగాఢ సానుభూతి: ష‌ర్మిల‌
గౌతమ్‌రెడ్డి భౌతికకాయానికి త‌ల‌సాని నివాళులు

ఏపీ మంత్రి, వైసీపీ నేత మేకపాటి గౌతమ్‌ రెడ్డి గారి హఠాన్మరణం చెందిన విష‌యం తెలిసిందే. గౌతమ్ రెడ్డి మృతిపట్ల తెలంగాణ నేత‌లు సంతాపం తెలిపారు. హైదరాబాద్ లోని జూబ్లీహిల్స్‌ అపోలో ఆసుప‌త్రికి వెళ్లిన తెలంగాణ‌ మంత్రి తలసాని శ్రీ‌నివాస్ యాద‌వ్… గౌతమ్‌రెడ్డి భౌతికకాయానికి నివాళులర్పించారు. గౌతమ్ రెడ్డి కుటుంబ సభ్యులకు సానుభూతి తెలిపారు.

గౌత‌మ్ రెడ్డి మృతి చెందార‌న్న వార్త తెలుసుకుని దిగ్భ్రాంతికి గుర‌యిన‌ట్లు తెలంగాణ మంత్రి కేటీఆర్ ట్వీట్ చేశారు. ఆయ‌న‌ ఆత్మ‌కు శాంతి చేకూరాల‌ని ప్రార్థిస్తున్నాన‌ని అన్నారు. ఆయ‌న కుటుంబ స‌భ్యుల‌కు కేటీఆర్ సానుభూతి తెలిపారు.

గౌతమ్ రెడ్డి మృతి పట్ల టీపీసీసీ అధ్యక్షుడు రేవంత్‌రెడ్డి సంతాపం తెలిపారు. మంచి రాజకీయ భవిష్యత్తు ఉన్న నేత మరణం కలచివేసిందని ఆయ‌న ట్వీట్ చేశారు. గౌతమ్ రెడ్డి ఆత్మకు శాంతి చేకూరాలని దేవుడిని ప్రార్థిస్తున్నాన‌ని రేవంత్‌రెడ్డి పేర్కొన్నారు.

త‌న ప్రియ మిత్రుడు మేక‌పాటి గౌతం రెడ్డి ఇక లేర‌న్న వార్త‌ దిగ్భ్రాంతికి గురిచేసిందని ష‌ర్మిల అన్నారు. ఆయన ఆత్మకు శాంతి చేకూరాలని భగవంతుని ప్రార్థిస్తున్న‌ట్లు పేర్కొన్నారు. వారి కుటుంబ సభ్యులకు ప్రగాఢ సానుభూతి తెలియజేస్తున్నానని ష‌ర్మిల‌ ట్వీట్ చేశారు.