రష్యా వంటి పెద్ద దేశం తమపై దురాక్రమణకు తెగించగా, చిన్న దేశమైన ఉక్రెయిన్ ఒంటరిగానే పోరాడుతోంది. ప్రపంచదేశాలేవీ తోడు రాకపోగా, చావోరేవో తేల్చుకోవాలని ఉక్రెయిన్ దేశాధ్యక్షుడితో పాటు ఆ దేశ సైన్యం కృతనిశ్చయంతో ఉంది. ప్రాణత్యాగాలకు కూడా ఉక్రెయిన్ సైనికులు వెనుకాడడంలేదు. అందుకు నిదర్శనమే ఈ ఘటన. నల్ల సముద్రంలో ఉక్రెయిన్ కు చెందిన స్నేక్ ఐలాండ్ ఉంది. దీన్నే స్థానికంగా జ్మినిల్ ఐలాండ్ అని కూడా అంటారు.

ఈ దీవిలో ఉక్రెయిన్ కు చెందిన సైనిక స్థావరం ఉంది. తాము ఉక్రెయిన్ సైనిక స్థావరాలనే లక్ష్యంగా చేసుకుంటామని చెబుతున్న రష్యా… స్నేక్ ఐలాండ్ లోని మిలిటరీ కేంద్రంపైనా దృష్టి సారించింది. నల్ల సముద్రంలో ఓ రష్యా యుద్ధ నౌక స్నేక్ ఐలాండ్ సమీపంలో మోహరించింది. ఆ నౌక అధికారి… దీవిలో ఉన్న ఉక్రెయిన్ సైనికులకు గట్టి హెచ్చరిక పంపాడు.

“ఇది సైనిక యుద్ధ నౌక… రష్యాకు చెందిన సైనిక యుద్ధనౌక. రక్తపాతాన్ని నివారించడానికి వీలుగా మీరు మీ ఆయుధాలను కిందపడేసి మాకు లొంగిపోండి. లేకపోతే మీపై బాంబుల వర్షం కురిపిస్తాం” అని ఆ రష్యా అధికారి స్పష్టం చేశాడు. అయితే, అవతలివైపు నుంచి ఏమాత్రం లెక్కని చేయని రీతిలో దీటైన సమాధానం వచ్చింది. “రష్యా యుద్ధ నౌకా…? అయితే ఏంటి?” అంటూ ఓ బూతు మాట జోడించి ఉక్రెయిన్ సైనికుడు ఘాటుగా బదులిచ్చాడు.

అక్కడ జరిగిన సంభాషణలో ఇవే ఆఖరి మాటలు! ఆ తర్వాత రష్యా యుద్ధనౌక నిప్పుల వర్షం కురిపించగా, స్నేక్ ఐలాండ్ లో ఉన్న ఉక్రెయిన్ సైనికులు 13 మందీ వీరమరణం పొందారు. ప్రాణాలను తృణప్రాయంగా వదిలేశారే కానీ, రష్యాకు మాత్రం లొంగలేదు.

దీనిపై ఉక్రెయిన్ అధ్యక్షుడు వొలోద్మిర్ జెలెన్ స్కీ భావోద్వేగభరితంగా స్పందించారు. స్నేక్ ఐలాండ్ లోని సరిహద్దుల వద్ద మా గార్డులు అందరూ వీరోచిత మరణం పొందారు. ధైర్యంగా మృత్యువును ఆహ్వానించారే తప్ప ఓటమిని మాత్రం అంగీకరించలేదు. వారికి మరణానంతర హీరో ఆఫ్ ఉక్రెయిన్ పురస్కారాలు అందజేస్తాం అని జెలెన్ స్కీ వెల్లడించారు.

కాగా, రష్యా అధికారి, ఉక్రెయిన్ సైనికుల మధ్య జరిగిన సంభాషణ ఆడియో ఇప్పుడు సోషల్ మీడియాలో వైరల్ అవుతోంది.