2024 సార్వ‌త్రిక ఎన్నిక‌ల్లో కాంగ్రెస్ పార్టీ విజ‌య‌మే లక్ష్యంగా ఆ పార్టీ అగ్ర నేత రాహుల్ గాంధీ త‌ల‌పెట్టిన‌ భార‌త్ జోడో యాత్ర బుధ‌వారం సాయ‌త్రం ప్రారంభం అయ్యింది. బుధ‌వారం సాయంత్రం 5 గంట‌ల‌కు త‌మిళ‌నాడులోని క‌న్యాకుమారిలో రాహుల్ త‌న యాత్ర‌ను ప్రారంభించారు. త‌న ముందు పార్టీ సేవా ద‌ళ్‌ శ్రేణులు క‌దం తొక్కుతూ సాగ‌గా… రాహుల్ గాంధీ త‌న సుదీర్ఘ యాత్ర‌ను ప్రారంభించారు.

దాదాపుగా 150 రోజుల పాటు సాగ‌నున్న ఈ యాత్ర‌ 3,570 కిలోమీట‌ర్ల మేర కొన‌సాగ‌నుంది. క‌న్యాకుమారిలో మొద‌లైన ఈ యాత్ర క‌శ్మీర్‌లో ముగియ‌నుంది. దేశంలోని మెజారిటీ రాష్ట్రాల మీదుగా ఈ యాత్ర సాగేలా కాంగ్రెస్ పార్టీ రూట్ మ్యాప్ సిద్ధం చేసింది. రాహుల్ గాంధీ యాత్ర చేప‌ట్టడంతో కాంగ్రెస్ పార్టీ శ్రేణుల్లో ఉత్సాహం వ్య‌క్త‌మ‌వుతోంది.

కాంగ్రెస్ పార్టీ అగ్ర నేత భార‌త్ జోడో యాత్ర పేరిట బుధవారం ప్రారంభించిన పాద యాత్ర‌కు డీఎంకే అధినేత‌, త‌మిళ‌నాడు ముఖ్య‌మంత్రి ఎంకే స్టాలిన్ మ‌ద్ద‌తు ప‌లికారు. త‌మిళ‌నాడులోని క‌న్యాకుమారి నుంచి రాహుల్ త‌న యాత్ర‌ను బుధ‌వారం ప్రారంభించిన సంగ‌తి తెలిసిందే. ఈ యాత్ర వ‌ద్ద‌కు వ‌చ్చిన స్టాలిన్‌… రాహుల్‌కు అభినంద‌న‌లు తెలిపారు. ఈ సంద‌ర్భంగా రాహుల్ గాంధీని స‌న్మానించిన స్టాలిన్‌… ప‌లు అంశాల‌పై ఆయ‌న‌తో చ‌ర్చించారు.