జైలు నుంచి విడుదలైన బండి సంజయ్.. సీపీ రంగనాథ్ పై ఆగ్రహం!
- కేసు విషయంలో చెప్పిన మాటలన్నీ నిజమేనని పోలీస్ టోపీపై మూడు సింహాలపై ప్రమాణం చేయాలని సవాల్
- తనకు సంబంధం లేదని ప్రమాణం చేస్తానన్న బీజేపీ రాష్ట్ర అధ్యక్షుడు
- రేపటి మోదీ సభను విజయవంతం చేయాలని కార్యకర్తలకు పిలుపు
పదో తరగతి పరీక్ష లీకేజీ కేసులో అరెస్టయిన బీజేపీ తెలంగాణ అధ్యక్షుడు బండి సంజయ్ బెయిల్ పై ఈ ఉదయం కరీంనగర్ జైలు నుంచి విడుదలయ్యారు. జైలు నుంచి బయటకు వచ్చిన తర్వాత ఆయన మీడియాతో మాట్లాడుతూ.. వరంగల్ సీపీ రంగనాథ్ పై మండిపడ్డారు. ఈ కేసులో రంగనాథ్ చెప్పిన విషయాలు నిజమేనా? పోలీస్ టోపీపై ఉన్న మూడు సింహాలపై ఆయన ప్రమాణం చేయాలని సవాల్ విసిరారు.
లీకేజీ విషయంలో తనకు సంబంధం లేదని తాను ప్రమాణం చేస్తానని చెప్పారు. పేపర్ లీక్ కి, మాల్ ప్రాక్టీస్ కి తేడా తెలియదా? అని సీపీని ప్రశ్నించారు. ఆయన సంగతి తమకు తెలుసని, ఆయన ఎక్కడెక్కడ ఏం చేశారో అంతా తెలుసన్నారు. పోలీస్ వ్యవస్థను అవమానించేలా వ్యవహరిస్తున్నారని ఆగ్రహం వ్యక్తం చేశారు. సీఎం కేసీఆర్ కుటుంబంలోనే లీకు వీరులు, లిక్కర్ వీరులు ఉన్నారని ఆరోపించారు.
ఎమ్మెల్సీ కవితతో పాటు మంత్రి కేటీఆర్ కూడా జైలుకెళ్లడం ఖాయమని బండి సంజయ్ అన్నారు. టీఎస్ పీఎస్సీ పశ్నా పత్రాల లీకేజీ వ్యవహారంపై సిట్టింగ్ జడ్జీతో విచారణ చేపట్టాలని డిమాండ్ చేశారు. మంత్రి కేటీఆర్ ను పదవి నుంచి బర్తరఫ్ చేయాలన్నారు. ‘పదో తరగతి హిందీ పేపర్ ఎవరైనా లీక్ చేస్తారా? మరి, హిందీ పేపర్ లీక్ చేసింది మేమైతే.. తెలుగు పేపర్ లీక్ చేసింది ఎవరు? అసలు పరీక్షా కేంద్రానికి మొబైల్ తీసుకెళ్లింది ఎవరు? ఫొటో తీసింది ఎవరు?’ అని సంజయ్ ప్రశ్నించారు. తమకు జైలు, లాఠీ దెబ్బలు కొత్త కాదన్నారు. రేపటి మోదీ సభతో బీజేపీ బలాన్ని నిరూపిద్దామని కార్యకర్తలకు సంజయ్ పిలుపునిచ్చారు.
బండి సంజయ్‌కు బీజేపీ పెద్దల ఫోన్.. గో అహెడ్ అంటూ గ్రీన్ సిగ్నల్
పదో తరగతి ప్రశ్న పత్రం కేసులో బెయిల్‌పై విడుదలైన తెలంగాణ బీజేపీ పార్టీ అధ్యక్షుడు బండి సంజయ్‌కు బీజేపీ పెద్దలు ఫోన్ చేశారు. కేంద్ర మంత్రి అమిత్ షా, పార్టీ అధ్యక్షుడు జేపీ నడ్డా, కేంద్ర మంత్రి స్మృతి ఇరానీ ఫోన్లో మాట్లాడారు. తరుణ్ చుగ్, సునీల్ బన్సల్, పలువురు ఇతర జాతీయ నేతలు పరామర్శించారు. ఈ సందర్భంగా బీజేపీ పెద్దలు ‘‘గో అహెడ్.. హైకమాండ్ మీకు అండగా ఉంటుంది’’ అంటూ పేర్కొన్నారు. ప్రజా సమస్యలపై పోరాటం మరింత ఉద్ధృతం చేయాలని దిశా నిర్దేశం చేశారు. బీఆర్ఎస్ కుట్రలు ఛేదించాలని సంజయ్‌కు అగ్రనేతలు చెప్పినట్టు సమాచారం.
కాగా నేడు ఉదయం కరీంనగర్ జైలు నుంచి సంజయ్ బెయిల్‌పై విడుదలైన విషయం తెలిసిందే. రూ.20 వేల పూచీకత్తుతో పాటూ ఇద్దరి జమానతు సమర్పించాలని హనుమకొండ నాలుగో అదనపు మున్సిఫ్ మెజిస్ట్రేట్ ఇన్‌చార్జ్ న్యాయమూర్తి రాపోలు అనిత తీర్పు వెలువరించారు. దేశం విడిచి వెళ్లరాదని, సాక్షులను ప్రభావితం చేయకూడదని, కేసు విచారణకు సహకరించాలని షరతులు విధించారు. ఇక జైలు నుంచి బయటకు వచ్చిన సంజయ్ అధికార బీఆర్‌ఎస్‌పై పలు విమర్శలు గుప్పించారు.
