తెలంగాణ కాంగ్రెస్ లో ప్రస్తుతం వైఎస్సార్టీపీ అధ్యక్షురాలు షర్మిల హాట్ టాపిక్ గా మారారు. ఆమె కాంగ్రెస్ లో చేరబోతున్నారనే చర్చ పెద్ద ఎత్తున సాగుతోంది. మరోవైపు షర్మిలపై టీపీసీసీ అధ్యక్షుడు రేవంత్ రెడ్డితో పాటు పలువురు కాంగ్రెస్ నేతలు విమర్శలు గుప్పిస్తున్న సంగతి విదితమే.

ఈ నేపథ్యంలో కాంగ్రెస్ ఎంపీ కోమటిరెడ్డి వెంకటరెడ్డికి కర్ణాటక డిప్యూటీ సీఎం డీకే శివకుమార్ ఓ విషయాన్ని స్పష్టం చేశారు. షర్మిలను పార్టీలో చేర్చుకోవడానికి పార్టీ హైకమాండ్ సానుకూలంగా ఉందని డీకే తెలిపారు. ఇదే సమయంలో నేతల అభ్యంతరాలపై కూడా ఆలోచిస్తున్నట్టు చెప్పారు. డీకేను కోమటిరెడ్డి బెంగళూరులో కలిశారు. ప్రస్తుత రాజకీయ పరిస్థితులపై వీరిద్దరూ దాదాపు 40 నిమిషాల సేపు చర్చించారు. ఈ సందర్భంగానే షర్మిల విషయంలో డీకే క్లారిటీ ఇచ్చారు. మరోవైపు ఇటీవలే డీకే శివకుమార్ ను షర్మిల కలిసిన సంగతి తెలిసిందే.

గత కొన్నిరోజులుగా మీడియా చానళ్లలో వైఎస్సార్టీపీని కాంగ్రెస్ పార్టీలో విలీనం చేస్తున్నారన్న వార్తలు కనిపిస్తున్నాయి. ఈ నేపథ్యంలో, వైఎస్సార్టీపీ అధ్యక్షురాలు షర్మిల ఆసక్తికర వ్యాఖ్యలు చేశారు. 

వైఎస్ షర్మిల రెడ్డి తన చివరి శ్వాస వరకు తెలంగాణ బిడ్డగా, తెలంగాణ కొరకు పోరాడుతూనే ఉంటుందని స్పష్టం చేశారు. ఊహాజనిత కథలు కల్పిస్తూ, తనకు, తెలంగాణ ప్రజలకు మధ్య అగాధాన్ని సృష్టించేందుకు విఫలయత్నాలు జరుగుతున్నాయని షర్మిల ఆరోపించారు. 

“పని లేని, పస లేని దార్శనికులకు నేను చేప్పేది ఒక్కటే. నా రాజకీయ భవిష్యత్ మీద పెట్టే దృష్టిని, సమయాన్ని కేసీఆర్ పాలనపై పెట్టండి. అన్ని విధాలుగా కేసీఆర్ సర్కారు పాలనలో సర్వనాశనమైపోతున్న తెలంగాణ భవిత మీద పెట్టండి. కేసీఆర్ కుటుంబం అవినీతిని ఎండగట్టండి. నా భవిష్యత్తు తెలంగాణలోనే… నా ఆరాటం, నా పోరాటం తెలంగాణ కోసమే. జై తెలంగాణ” అని పోస్టు పెట్టారు. 

అయితే పార్టీ విలీనం ఒట్టి మాటే అని గానీ, పార్టీని కొనసాగిస్తానని గానీ షర్మిల తన పోస్టులో ఎక్కడా పేర్కొనలేదు.