• జగన్‌కు ప్రతిపక్ష నేత హోదా ఇవ్వాలని పేర్ని నాని డిమాండ్
• ప్రభుత్వానికి భయమెందుకని ప్రశ్న
• హోదా ఇవ్వకపోవడం వల్లే కోర్టు మెట్లెక్కామని వెల్లడి

వైసీపీ అధినేత జగన్‌కు ప్రతిపక్ష నేత హోదా కల్పించే విషయంలో ప్రభుత్వం భయపడుతోందని మాజీ మంత్రి పేర్ని నాని తీవ్రస్థాయిలో విమర్శించారు. జగన్ అడిగే ప్రశ్నలకు సమాధానం చెప్పే సత్తా ఉంటే ఆయనకు ప్రతిపక్ష హోదా ఇవ్వాలని, లేదంటే ఆ విషయాన్ని అంగీకరించాలని ఆయన సవాల్ విసిరారు.

బుధవారం మీడియాతో మాట్లాడిన పేర్ని నాని, చంద్రబాబు ప్రభుత్వం ఉద్దేశపూర్వకంగానే జగన్‌కు ప్రతిపక్ష హోదాను నిరాకరిస్తోందని ఆరోపించారు. “వైసీపీకి ప్రతిపక్ష హోదా ఇవ్వడానికి ఎందుకంత భయం? జగన్ అడిగే ప్రశ్నలకు జవాబు చెప్పలేమనే ఆందోళనతోనే ఈ నిర్ణయం తీసుకున్నారు. అందుకే మేము న్యాయపోరాటం కోసం కోర్టును ఆశ్రయించాల్సి వచ్చింది” అని ఆయన స్పష్టం చేశారు.

కూటమి పాలన తీరు ప్రజలకు ఇప్పటికే అర్థమైపోయిందని, రాష్ట్రంలో ఎన్నికలు ఎప్పుడు నిర్వహించినా విజయం వైసీపీదేనని ఆయన ధీమా వ్యక్తం చేశారు. రాబోయే ఏ ఎన్నికనైనా ఎదుర్కోవడానికి తమ పార్టీ సిద్ధంగా ఉందని పేర్ని నాని తెలిపారు.

ఇదిలా ఉండగా, తాడేపల్లిలోని పార్టీ కేంద్ర కార్యాలయంలో జగన్ అధ్యక్షతన వైసీపీ విస్తృత స్థాయి సమావేశం జరిగింది. ఈ భేటీకి పార్టీ రీజనల్ కో-ఆర్డినేటర్లు, రాష్ట్ర ప్రధాన కార్యదర్శులు, పీఏసీ సభ్యులు, జిల్లా అధ్యక్షులతో పాటు పార్లమెంటు, అసెంబ్లీ నియోజకవర్గాల సమన్వయకర్తలు హాజరయ్యారు. పార్టీ భవిష్యత్ కార్యాచరణ, ప్రజా సమస్యలపై పోరాటాలపై ఈ సమావేశంలో చర్చించినట్లు సమాచారం. 

About The Author

Ram Narayana

See author's posts