- దేశ ప్రయోజనాల విషయంలో రాజీపడే ప్రసక్తే లేదన్న ప్రధాని
- అహ్మదాబాద్ బహిరంగ సభలో మాట్లాడిన ప్రధాని మోదీ
- దీర్ఘకాలంగా పాలించిన కాంగ్రెస్ పార్టీ భారత్ను విదేశీ దిగుమతులపై ఆధారపడేలా చేసిందన్న మోదీ
దేశ ప్రయోజనాల విషయంలో రాజీపడే ప్రసక్తే లేదని ప్రధాని నరేంద్ర మోదీ స్పష్టం చేశారు. రైతులు, పశుపోషకులు, చిన్న తరహా పరిశ్రమల ప్రయోజనాలను కాపాడేందుకు ప్రభుత్వం కట్టుబడి ఉందని ఆయన తెలిపారు. భారత్పై అమెరికా విధించిన అదనపు దిగుమతి సుంకాలను అమలు చేసే గడువు సమీపిస్తున్న తరుణంలో ప్రధాని ఈ కీలక వ్యాఖ్యలు చేశారు.
గుజరాత్ పర్యటనలో భాగంగా అహ్మదాబాద్లో నిన్న నిర్వహించిన బహిరంగ సభలో ఆయన మాట్లాడుతూ, “ఈ విషయంలో ఒత్తిడి పెరగొచ్చు. కానీ దేశ ప్రయోజనాల కోసం ఆ ఒత్తిడిని భరిస్తాం. దీర్ఘకాలంగా పాలించిన కాంగ్రెస్ పార్టీ భారత్ను విదేశీ దిగుమతులపై ఆధారపడేలా చేసింది. కానీ మనం స్వదేశీ మార్గంలో ముందుకెళ్తున్నాం” అని అన్నారు.
భారత్ దిగుమతులపై అమెరికా అధ్యక్షుడు డొనాల్డ్ ట్రంప్ ఇప్పటికే 25 శాతం సుంకాలు విధించిన సంగతి తెలిసిందే. తాజాగా మరో 25 శాతం అదనంగా విధించనున్నట్లు ప్రకటించారు. ఇవి ఈ నెల 27 నుంచి అమల్లోకి రానున్నాయి.
వైట్హౌస్ వాణిజ్య సలహాదారు పీటర్ నవారో ఇటీవల మాట్లాడుతూ, ఈ గడువును పొడిగించే అవకాశం లేదని పేర్కొన్నారు. భారత్ ఇప్పటికే ఈ అదనపు సుంకాలను ‘అన్యాయమైనవి, అనుచితమైనవి’గా పేర్కొంటూ ఖండించింది.
ప్రధాని మోదీ తన ప్రసంగంలో స్వదేశీ భావనను గుర్తు చేస్తూ శ్రీకృష్ణుడి సుదర్శన చక్రం మరియు మహాత్మా గాంధీ చరఖా ఉద్యమాన్ని ఉదహరించారు. అంతేకాదు, దేశ శౌర్యాన్ని చాటిచెప్పిన ‘ఆపరేషన్ సిందూర్’ను ప్రస్తావించారు.
ట్రంప్ సుంకాల నుంచి గట్టెక్కేందుకు భారత్ యత్నాలు.. రంగంలోకి దిగిన రెండో లాబీయింగ్ సంస్థ!
- ట్రంప్ ప్రభుత్వంతో సంబంధాలున్న లాబీయింగ్ సంస్థ నియామకం
- ‘మెర్క్యురీ పబ్లిక్ అఫైర్స్’కు మూడు నెలలకు 2,25,000 డాలర్ల ఒప్పందం
- ఇప్పటికే మరో సంస్థకు 1.8 మిలియన్ డాలర్లు చెల్లిస్తున్న భారత్
అమెరికా అధ్యక్షుడు డొనాల్డ్ ట్రంప్ విధించిన కఠినమైన సుంకాల నుంచి బయటపడేందుకు భారత ప్రభుత్వం తీవ్రంగా ప్రయత్నిస్తోంది. భారత ఎగుమతులపై 50 శాతం వరకు సుంకాలు విధించేందుకు సమయం దగ్గర పడుతున్న తరుణంలో, వాషింగ్టన్లోని భారత రాయబార కార్యాలయం దిద్దుబాటు చర్యలకు ఉపక్రమించింది. ఇందులో భాగంగా ట్రంప్ ప్రభుత్వంతో సన్నిహిత సంబంధాలున్న రెండో లాబీయింగ్ సంస్థను రంగంలోకి దించింది.
ఈ మేరకు ‘మెర్క్యురీ పబ్లిక్ అఫైర్స్’ అనే సంస్థతో భారత రాయబార కార్యాలయం ఒప్పందం కుదుర్చుకున్నట్లు ‘పొలిటికో’ నివేదిక వెల్లడించింది. అమెరికా ప్రభుత్వంతో సంబంధాలను మెరుగుపరుచుకోవడంలో సహాయపడేందుకు ఈ సంస్థను నియమించుకున్నట్టు న్యాయ శాఖకు సమర్పించిన పత్రాల్లో పేర్కొన్నారు. ఈ ఒప్పందం ప్రకారం, ఆగస్టు మధ్య నుంచి నవంబర్ మధ్య వరకు మూడు నెలల కాలానికి గాను మెర్క్యురీ సంస్థకు భారత్ ప్రతినెలా 75,000 డాలర్లు (సుమారు రూ. 63 లక్షలు) చెల్లించనుంది. మొత్తం మీద ఈ ఒప్పందం విలువ 2,25,000 డాలర్లు.
భారత ఎగుమతులపై ఇప్పటికే 25 శాతం సుంకం విధించిన అమెరికా… రష్యా నుంచి చమురు కొనుగోలు చేస్తున్నందుకు దీనికి అదనంగా మరో 25 శాతం సుంకాన్ని విధించింది. ఈ అదనపు సుంకాలు రేపటి నుంచి అమల్లోకి రానున్నాయి. ఈ నేపథ్యంలోనే భారత్ లాబీయింగ్ ప్రయత్నాలను ముమ్మరం చేసింది. ట్రంప్ ఎన్నికల ప్రచార బృందంలో కమ్యూనికేషన్స్ డైరెక్టర్గా పనిచేసిన బ్రయాన్ లాంజా వంటి కీలక వ్యక్తులు మెర్క్యురీ సంస్థలో ఉండటం గమనార్హం.
అయితే, కొత్త సుంకాలు అనుకున్న ప్రకారమే అమలవుతాయని వైట్హౌస్ వాణిజ్య సలహాదారు పీటర్ నవారో గత వారం స్పష్టం చేశారు. “రక్తపాతంలో తమ పాత్రను గుర్తించేందుకు భారత్ ఇష్టపడటం లేదు” అని ఆయన వ్యాఖ్యానించారు.
ఇదిలా ఉండగా, ట్రంప్ మాజీ సలహాదారు జాసన్ మిల్లర్కు చెందిన ఎస్హెచ్డబ్ల్యూ పార్ట్నర్స్ ఎల్ఎల్సి సంస్థకు భారత్ ఇప్పటికే 1.8 మిలియన్ డాలర్లు చెల్లించేందుకు ఒప్పందం కుదుర్చుకోవడం తెలిసిందే. ఇప్పుడు మెర్క్యురీని కూడా నియమించుకోవడంతో, సుంకాల ప్రభావాన్ని తగ్గించుకునేందుకు భారత్ ఎంతగా ప్రయత్నిస్తోందో అర్థమవుతోంది.
