మహారాష్ట్ర సీఎం సమక్షంలో ఆయుధాలు సరెండర్ చేసిన మల్లోజుల..
ఫడ్నవిస్ చేతుల మీదగా 6 కోట్ల రివార్డ్ చెక్కులు అందుకున్న మల్లోజుల
ఆయనతోపాటు సరెండర్ అయినా 61 రివార్డ్ చెక్కుల అందజేత
మల్లోజుల నిర్ణయాన్ని స్వాగతిస్తున్నమ్మన్న ఫడ్నవిస్
దేశంలో మావోయిజానికి చేతులేదని స్పష్టికరణ
మావోయిస్టు పార్టీ అగ్రనేత మల్లోజుల వేణుగోపాల్ అలియాస్ అభయ్ ఆయుధాలను వీడి జనజీవన స్రవంతిలోకి వచ్చారు. మహారాష్ట్ర పోలీసుల ఎదుట మంగళవారం మల్లోజుల లొంగిపోయారు. ఈ నేపథ్యంలో మహారాష్ట్ర ముఖ్యమంత్రి దేవేంద్ర ఫడ్నీవీస్ సమక్షంలో బుధవారం మల్లోజుల సహా మావోయిస్టులు తమ ఆయుధాలు సరెండర్ చేశారు,
బుధవారం మల్లోజులతో పాటు మరో 61 మంది ఆయుధాలను విడిచిపెట్టారు. ప్రభుత్వం నిర్వహించిన కార్యక్రమంలో తమ ఆయుధాలను పోలీసులకు అందించారు. ఇక, మల్లోజులపై దాదాపూ ఆరు కోట్ల రివార్డు ఉండటంతో(ఆరు రాష్ట్రాల్లో కోటి చొప్పున) ముఖ్యమంత్రి ఫడ్నవీస్.. రివార్డును ఆయనకు అప్పగించారు. తెలంగాణ, మహారాష్ట్ర, ఛత్తీస్గఢ్, ఒడిశాలో మోస్ట్వాంటెడ్గా మల్లోజులు ఉన్నారు. ఈ సందర్భంగా మల్లోజులను మీడియా ముందు ప్రవేశపెట్టారు. అనంతరం, మహారాష్ట్ర సీఎం దేవేంద్ర ఫడ్నవీస్ మాట్లాడుతూ ..’మల్లోజుల నిర్ణయాన్ని స్వాగతిస్తున్నాం. దేశంలో మావోయిజానికి చోటులేదు. నక్సల్ ఫ్రీ భారత్ నిర్మిస్తాం’ అని చెప్పుకొచ్చారు.
సుక్మాలో మావోయిస్టులకు గట్టి ఎదురుదెబ్బ.. రూ. 50 లక్షల రివార్డు ఉన్న 27 మంది లొంగుబాటు
- ఛత్తీస్గఢ్లోని సుక్మా జిల్లాలో భారీగా లొంగిపోయిన మావోయిస్టులు
- పోలీసుల ఎదుట లొంగిపోయిన వారిలో 27 మంది క్రియాశీలక సభ్యులు
- లొంగిపోయిన వారిలో 10 మంది మహిళలు, 17 మంది పురుషులు
- వీరిపై మొత్తం రూ. 50 లక్షల రివార్డు ఉన్నట్లు వెల్లడి
- ప్రభుత్వ లొంగుబాటు విధానాల వల్లే ఈ మార్పు అని అధికారుల ప్రకటన
ఛత్తీస్గఢ్లో వామపక్ష తీవ్రవాద నిర్మూలన ప్రయత్నాల్లో భాగంగా భద్రతా బలగాలకు భారీ విజయం లభించింది. సుక్మా జిల్లాలో బుధవారం ఏకంగా 27 మంది క్రియాశీలక మావోయిస్టులు పోలీసుల ఎదుట లొంగిపోయారు. లొంగిపోయిన వారిలో నిషేధిత సీపీఐ (మావోయిస్ట్) సంస్థకు చెందిన అత్యంత ప్రమాదకరమైన పీపుల్స్ లిబరేషన్ గెరిల్లా ఆర్మీ (పీఎల్జీఏ) బెటాలియన్-01కు చెందిన ఇద్దరు కీలక సభ్యులు కూడా ఉండటం గమనార్హం.
అధికారిక వర్గాల సమాచారం ప్రకారం, లొంగిపోయిన మావోయిస్టులందరిపైనా ఉన్న మొత్తం రివార్డు విలువ రూ. 50 లక్షలు. వీరిలో ఒకరిపై రూ. 10 లక్షలు, ముగ్గురిపై తలా రూ. 8 లక్షలు, మరొకరిపై రూ. 9 లక్షలు, ఇద్దరిపై రూ. 2 లక్షల చొప్పున, మరో తొమ్మిది మందిపై తలా లక్ష రూపాయల రివార్డు ఉంది. మొత్తం లొంగిపోయిన వారిలో 10 మంది మహిళలు, 17 మంది పురుషులు ఉన్నారు. బస్తర్ ప్రాంతంలో అనేక హింసాత్మక ఘటనల్లో కీలక పాత్ర పోషించిన ఈ సభ్యులు చాలా కాలంగా భద్రతా బలగాల రాడార్లో ఉన్నారు.
ఛత్తీస్గఢ్ ప్రభుత్వం అమలు చేస్తున్న ‘నవసంకల్ప్ లొంగుబాటు విధానం’, ‘నియత్ నెల్లా నార్’ వంటి పథకాల ప్రభావం మారుమూల ప్రాంతాల్లో స్పష్టంగా కనిపిస్తోందని పోలీసు అధికారులు తెలిపారు. భద్రతా బలగాల నిరంతర ఒత్తిడి, ప్రభుత్వ పునరావాస కార్యక్రమాలతో ప్రభావితమై వీరంతా జనజీవన స్రవంతిలోకి వచ్చినట్లు తెలుస్తోంది. ఈ పరిణామం ఇతర క్రియాశీలక మావోయిస్టులకు బలమైన సందేశం పంపుతుందని, మరిన్ని లొంగుబాట్లకు దారితీస్తుందని అధికారులు ఆశాభావం వ్యక్తం చేశారు.
ఈ లొంగుబాటును జిల్లా యంత్రాంగం “విధ్వంసంపై చర్చల విజయం”గా అభివర్ణించింది. లొంగిపోయిన మావోయిస్టులందరికీ ప్రభుత్వ పునరావాస విధానం కింద సహాయం అందించి, తిరిగి సాధారణ జీవితంలోకి తీసుకురావడానికి చర్యలు తీసుకుంటామని అధికారులు వెల్లడించారు. ఈ ఘటనతో మావోయిస్టుల కార్యాచరణ సామర్థ్యం మరింత బలహీనపడి, ప్రాంతంలో శాంతి స్థాపనకు మార్గం సుగమం అవుతుందని భావిస్తున్నారు.
