• కొంతకాలంగా తీవ్ర అనారోగ్యంతో బాధపడుతున్న ధర్మేంద్ర
• ఇటీవల బీచ్ కాండీ ఆసుపత్రిలో చికిత్స తీసుకున్న ధర్మేంద్ర
• డిశ్చార్జ్ తర్వాత ఇంట్లో వైద్యుల పర్యవేక్షణలో ఉన్న బాలీవుడ్ నటుడు

బాలీవుడ్ ప్రముఖ నటుడు ధర్మేంద్ర (89) కన్నుమూశారు. కొంతకాలంగా తీవ్ర అనారోగ్యంతో బాధపడుతున్న ఆయన నేడు తుదిశ్వాస విడిచారు. ఇటీవల ఆయన ముంబైలోని బ్రీచ్ కాండీ ఆసుపత్రిలో చికిత్స కూడా తీసుకున్నారు. డిశ్చార్జ్ అయ్యాక ఇంట్లో వైద్యుల పర్యవేక్షణలో ఉన్నారు. 300కు పైగా చిత్రాల్లో నటించిన ఆయన యాక్షన్ కింగ్‌గా, బాలీవుడ్ హీ-మ్యాన్‌గా గుర్తింపు పొందారు.

భారతీయ చిత్ర పరిశ్రమలో అత్యంత విజయవంతమైన నటులలో ధర్మేంద్ర ఒకరు. ఆరు దశాబ్దాలకు పైగా కెరీర్‌లో అనేక బ్లాక్‌బస్టర్ చిత్రాలు వచ్చాయి. ధర్మేంద్రకు ఇద్దరు భార్యలు కాగా, ఒకరు ప్రకాశ్ కౌర్, మరొకరు హేమమాలిని. ఆయనకు ఆరుగురు పిల్లలు ఉన్నారు.

ఆయన సూపర్ హిట్ చిత్రాల్లో షోలే, ధరమ్ వీర్, సీతా ఔర్ గీతా, చుప్కే చుప్కే, గజబ్, దో దిశాయే, ఆంఖే, షికార్, ఆయా సావన్ ఝూమ్ కే, జీవన్ మృత్యు, మేరా గావ్ మేరా దేశ్, యాదోం కీ బారాత్ సహా మరెన్నో ఉన్నాయి. 1935 డిసెంబర్ 5వ తేదీన జన్మించిన ధర్మేంద్ర అసలు పేరు ధరమ్ సింగ్ డియోల్. సన్నీ డియోల్, బాబీ డియోల్, ఇషా డియోల్ ఆయన సంతానమే.

1960లో ‘దిల్ బీ తేరా హమ్ బీ తేరా’తో ధర్మేంద్ర నటుడిగా చిత్ర పరిశ్రమలోకి అడుగు పెట్టారు. ఆయన చివరి చిత్రం ‘ఇక్కీస్’ త్వరలో విడుదల కానుంది. చిత్ర పరిశ్రమకు ఆయన చేసిన సేవలకు గాను కేంద్ర ప్రభుత్వం 2012లో పద్మభూషణ్‌తో సత్కరించింది. ధర్మేంద్ర రాజకీయాల్లోనూ రాణించారు. 2004లో బికనీర్ నుంచి బీజేపీ ఎంపీగా గెలుపొందారు.

ధర్మేంద్ర తొలి సినిమా పారితోషికం ఎంతో తెలుసా…?

• టాలెంట్ హంట్ ద్వారా సినీ రంగంలోకి అడుగుపెట్టిన పంజాబీ వాలా
• తొలి పారితోషికంగా కేవలం 51 రూపాయలు అందుకున్న వైనం
• తొలినాళ్లలో ఆశ్రయం, భోజనం కల్పించి ఆదుకున్న దర్శకుడు అర్జున్ హింగోరానీ
• పద్మభూషణ్ పురస్కారంతో సత్కారం పొందిన బహుముఖ నటుడు

భారతీయ సినీ రంగంలో తనకంటూ ఒక ప్రత్యేక అధ్యాయాన్ని లిఖించుకున్న లెజెండరీ నటుడు, బాలీవుడ్ ‘హీ-మ్యాన్’ ధర్మేంద్ర (89) సోమవారం కన్నుమూశారు. కొంతకాలంగా శ్వాసకోశ సమస్యలతో బాధపడుతున్న ఆయన, ముంబైలోని బ్రీచ్ క్యాండీ ఆసుపత్రిలో చికిత్స పొందుతూ తుదిశ్వాస విడిచారు. ఆయన మరణవార్తతో యావత్ సినీ పరిశ్రమ విషాదంలో మునిగిపోయింది. ఆమిర్ ఖాన్, అభిషేక్ బచ్చన్ వంటి ప్రముఖులు విలే పార్లేలోని శ్మశానవాటికకు చేరుకుని ఆయనకు నివాళులు అర్పించారు.

1935లో పంజాబ్‌లో జన్మించిన ధర్మేంద్ర, 1950ల చివర్లో ఫిల్మ్‌ఫేర్ మ్యాగజైన్ నిర్వహించిన జాతీయ స్థాయి టాలెంట్ హంట్ ద్వారా వెలుగులోకి వచ్చారు. ఎందరో యువకులతో పోటీపడి విజేతగా నిలిచి, సినీ రంగంలోకి అడుగుపెట్టారు. అందమైన రూపం, సహజమైన నటనతో అనతికాలంలోనే ప్రేక్షకుల హృదయాలను గెలుచుకున్నారు. రొమాంటిక్ హీరోగా, యాక్షన్ స్టార్‌గా, కామెడీ నటుడిగా ఇలా అన్ని పాత్రలలోనూ అద్భుతంగా రాణించి బహుముఖ ప్రజ్ఞాశాలిగా పేరుగాంచారు.

అయితే, ఆయన సినీ ప్రయాణం పూలపాన్పు కాదు. తొలి సినిమాకు సంతకం చేసే సమయంలో తనకు పెద్ద మొత్తంలో అడ్వాన్స్ వస్తుందని ధర్మేంద్ర ఎంతో ఆశపడ్డారు. కనీసం 500 రూపాయలైనా ఇస్తారని ఉత్సాహంగా ఎదురుచూశారు. కానీ, నిర్మాత టి.ఎం. బిహారీ, ఆయన సహచరుడు ఠక్కర్ తమ జేబుల్లో ఉన్న డబ్బంతా తీసి కేవలం 51 రూపాయలను ఆయన చేతిలో పెట్టారు. ఈ విషయాన్ని ధర్మేంద్ర స్వయంగా 1977లో ఓ ఉర్దూ మ్యాగజైన్‌లో రాసిన వ్యాసంలో పేర్కొన్నారు. వాస్తవానికి ఆయన మొదట ‘షోలా ఔర్ షబ్నమ్’ సినిమాకు సంతకం చేసినప్పటికీ, ‘దిల్ భీ తేరా హమ్ భీ తేరే’ ముందుగా విడుదల కావడంతో అదే ఆయన తొలి చిత్రంగా నిలిచింది.

ఆ కష్టకాలంలో ఆయనకు అండగా నిలిచింది తొలి చిత్ర దర్శకుడు అర్జున్ హింగోరానీ. చేతిలో ఆ 51 రూపాయలు తప్ప ఏమీ లేని ధర్మేంద్రకు హింగోరానీ తన ఇంట్లోనే ఆశ్రయం కల్పించారు. అంతేకాదు, భోజనానికి కూడా ఏర్పాట్లు చేశారు. ఒక రెస్టారెంట్‌కు తీసుకెళ్లి, “ఈ అబ్బాయికి రోజూ రెండు బ్రెడ్ స్లైసులు, వెన్న, ఒక కప్పు టీ ఇవ్వండి. జామ్ మాత్రం వద్దు. అదనంగా తింటే డబ్బులు తీసుకోండి,” అని చెప్పి అప్పు మీద భోజనం పెట్టించారు. ఆ తర్వాత కూడా వీరి బంధం కొనసాగింది. హింగోరానీ తీసిన అనేక చిత్రాలలో, ముఖ్యంగా ‘K’ అక్షరంతో మొదలయ్యే టైటిల్స్ ఉన్న ‘కహానీ కిస్మత్ కీ’, ‘ఖేల్ కిలాడీ కా’, ‘కాతిలోం కే కాతిల్’ వంటి సినిమాల్లో ధర్మేంద్రనే హీరోగా నటించారు. కొన్ని చిత్రాల్లో ఆయన కుమారుడు సన్నీ డియోల్ కూడా నటించడం విశేషం.

‘ఫూల్ ఔర్ పత్తర్’ చిత్రంతో స్టార్‌గా ఎదిగిన ధర్మేంద్ర, ‘షోలే’లో పోషించిన వీరూ పాత్రతో చరిత్రలో నిలిచిపోయారు. ‘చుప్కే చుప్కే’తో తన కామెడీ టైమింగ్‌ను నిరూపించుకోగా, ‘యాదోంకీ బారాత్’ వంటి చిత్రాలతో యాక్షన్ హీరోగా స్థిరపడ్డారు. సినీ రంగానికి ఆయన చేసిన సేవలకు గానూ భారత ప్రభుత్వం ఆయన్ను పద్మభూషణ్ పురస్కారంతో సత్కరించింది. తన నటన, నిరాడంబరతతో కోట్లాది మంది అభిమానులను సంపాదించుకున్న ధర్మేంద్ర, భౌతికంగా దూరమైనా తన సినిమాల ద్వారా ఎప్పటికీ చిరంజీవిగా నిలిచిపోతారు.

ప్రధానమంత్రి నరేంద్ర మోదీ తీవ్ర సంతాపం

భారత సినీ దిగ్గజం, ప్రముఖ నటుడు ధర్మేంద్ర మృతి పట్ల ప్రధానమంత్రి నరేంద్ర మోదీ తీవ్ర సంతాపం వ్యక్తం చేశారు. ఆయన మరణంతో భారత చలనచిత్ర పరిశ్రమలో ఒక శకం ముగిసిందని అభివర్ణించారు. ధర్మేంద్ర కేవలం ఒక గొప్ప నటుడు మాత్రమే కాదని, ఆయన నిరాడంబరత, వినయానికి ప్రతీక అని కొనియాడారు. ఈ విచారకరమైన సమయంలో ఆయన కుటుంబసభ్యులకు, స్నేహితులకు, అసంఖ్యాక అభిమానులకు తన ప్రగాఢ సానుభూతిని తెలిపారు.

ఈ సందర్భంగా ప్రధాని మోదీ తన సంతాప సందేశాన్ని విడుదల చేశారు. “ధర్మేంద్ర జీ మరణం భారత సినిమాలో ఒక శకం ముగింపు. ఆయన ఒక ఐకానిక్ ఫిల్మ్ పర్సనాలిటీ. ప్రతి పాత్రకు తన అద్భుతమైన నటనతో జీవం పోసి, ఆకట్టుకున్నారు. ఆయన పోషించిన విభిన్న పాత్రలు అసంఖ్యాక ప్రజల హృదయాలను హత్తుకున్నాయి. ధర్మేంద్ర జీ తన నిరాడంబరత, వినయం, ఆప్యాయతతో కూడా ఎంతగానో గౌరవాభిమానాలు పొందారు. ఈ విషాద సమయంలో, నా ఆలోచనలు ఆయన కుటుంబం, స్నేహితులు, అసంఖ్యాక అభిమానులతో ఉన్నాయి. ఓం శాంతి” అని ప్రధాని పేర్కొన్నారు.

ధర్మేంద్ర తన సుదీర్ఘ సినీ ప్రస్థానంలో ఎన్నో మరపురాని పాత్రలతో ప్రేక్షకులను అలరించారని, ఆయన లేని లోటు తీర్చలేనిదని మోదీ అన్నారు. ఆయన ఆత్మకు శాంతి కలగాలని ప్రార్థించారు.

ధర్మేంద్ర మృతి పట్ల తీవ్ర విచారం వ్యక్తం చేసిన పాకిస్థాన్ మాజీ క్రికెటర్

ధర్మేంద్ర మృతి పట్ల పాకిస్థాన్ మాజీ క్రికెట్ కెప్టెన్ రషీద్ లతీఫ్ స్పందిస్తూ ఘన నివాళులు అర్పించారు. “ధర్మేంద్ర గారు ఒక లెజెండరీ హీరో. ఆయన నటించిన షోలే ఎప్పటికీ ఒక క్లాసిక్‌గా నిలిచిపోతుంది. పాకిస్థాన్‌లో కూడా ఆయనకు ఎంతో ఆదరణ ఉంది. ఆయన కుటుంబానికి నా ప్రగాఢ సానుభూతి” అని ఐఏఎన్‌ఎస్‌ వార్తాసంస్థతో అన్నారు.

1935లో పంజాబ్‌లో జన్మించిన ధర్మేంద్ర, 1958లో ఫిల్మ్‌ఫేర్ మ్యాగజైన్ నిర్వహించిన టాలెంట్ హంట్‌లో గెలిచి సినీ రంగ ప్రవేశం చేశారు. ‘ఫూల్ ఔర్ పత్థర్’ చిత్రంతో స్టార్‌డమ్ అందుకుని, ‘షోలే’లో వీరూ పాత్రతో దేశవ్యాప్తంగా ఎనలేని కీర్తిని సంపాదించారు. ఆరు దశాబ్దాలకు పైగా సాగిన తన కెరీర్‌లో ఎన్నో అద్భుతమైన పాత్రలతో ప్రేక్షకులను మెప్పించారు. సినీ రంగానికి ఆయన చేసిన సేవలకు గాను భారత ప్రభుత్వం ఆయన్ను పద్మభూషణ్‌తో సత్కరించింది. ఆయన మరణం భారతీయ సినిమాకు తీరని లోటు.

ధర్మేంద్ర మృతిపై తెలుగు రాష్ట్రాల సీఎంల స్పందన

• ఆయన మృతిపై తెలుగు రాష్ట్రాల ముఖ్యమంత్రుల సంతాపం
• రేవంత్ రెడ్డి, చంద్రబాబు, పవన్ కల్యాణ్ నివాళులు
• భారత సినీ పరిశ్రమకు ఇది తీరని లోటన్న నేతలు
• ధర్మేంద్రతో తమ అనుబంధాన్ని గుర్తుచేసుకున్న వెంకయ్యనాయుడు

బాలీవుడ్ సీనియర్ నటుడు ధర్మేంద్ర అస్తమించారు. ఆయన మృతి పట్ల ఆంధ్రప్రదేశ్ ముఖ్యమంత్రి చంద్రబాబు , ఉప ముఖ్యమంత్రి పవన్ కల్యాణ్, తెలంగాణ ముఖ్యమంత్రి రేవంత్ రెడ్డి సహా పలువురు ప్రముఖులు తీవ్ర సంతాపం వ్యక్తం చేశారు. భారత చలనచిత్ర పరిశ్రమ ఒక గొప్ప నటుడిని కోల్పోయిందని వారు నివాళులర్పించారు.

ఆంధ్రప్రదేశ్ ముఖ్యమంత్రి చంద్రబాబు స్పందిస్తూ, “ధర్మేంద్ర జీ మరణ వార్త నన్ను తీవ్రంగా కలచివేసింది. ఒక లెజెండరీ నటుడిగా తన మరపురాని నటనతో ఆయన కోట్లాది మంది హృదయాలను గెలుచుకున్నారు. భారత సినిమాకు ఆయన చేసిన సేవ తరతరాలు గుర్తుంచుకుంటాయి” అని పేర్కొన్నారు.

ధర్మేంద్ర మరణం తీవ్ర విచారానికి గురి చేసిందని తెలంగాణ సీఎం రేవంత్ రెడ్డి అన్నారు. భారతీయ సినిమాకు ఆయన ఒక ఐకానిక్ ఫిగర్ అని, అటువంటి బహుముఖ ప్రజ్ఞాశాలిని కోల్పోవడం సినీ పరిశ్రమకు తీరని లోటని పేర్కొన్నారు. ఆయన ఆత్మకు శాంతి చేకూరాలని ప్రార్థిస్తూ, కుటుంబ సభ్యులకు, అభిమానులకు తన ప్రగాఢ సానుభూతిని తెలిపారు.

ఏపీ ఉప ముఖ్యమంత్రి, ప్రముఖ నటుడు పవన్ కల్యాణ్ సైతం ధర్మేంద్ర మృతికి నివాళులర్పించారు. “హిందీ చిత్ర పరిశ్రమలో తొలితరం యాక్షన్ హీరోగా సినీ ప్రియులను ఆకట్టుకున్నారు. అందుకే అభిమానులు ఆయన్ను ‘యాక్షన్ కింగ్’, ‘హీ-మ్యాన్’ అని పిలుచుకున్నారు. ‘షోలే’, ‘ధరమ్ వీర్’ వంటి చిత్రాలతో ఆయన తనదైన ముద్ర వేశారు” అని పవన్ గుర్తు చేసుకున్నారు.

మాజీ ఉపరాష్ట్రపతి ఎం. వెంకయ్య నాయుడు కూడా ధర్మేంద్ర మృతికి సంతాపం తెలిపారు. ఆయనతో తనకు చాలా ఏళ్లుగా సన్నిహిత సంబంధాలు ఉన్నాయని గుర్తుచేసుకున్నారు. ఆరు దశాబ్దాల పాటు సాగిన తన కెరీర్‌తో పాటు ప్రజా జీవితంలో ఎంపీగా కూడా ధర్మేంద్ర చేసిన సేవలు చిరస్మరణీయమని కొనియాడారు.