- ఏలూరులో రౌడీ షీటర్ల బరితెగింపు
- ఇంట్లో ఒంటరిగా ఉన్న యువతిని అర్ధరాత్రి లాక్కెళ్లిన వైనం
- బాధితురాలి ఫిర్యాదు మేరకు కేసు నమోదు
ఏలూరులో దారుణ ఘటన చోటుచేసుకుంది. ఇద్దరు రౌడీ షీటర్లు బరితెగించి, ఇంట్లో ఒంటరిగా ఉన్న ఓ యువతిని కిడ్నాప్ చేసి, అత్యాచారానికి పాల్పడ్డారు. ప్రభుత్వ కార్యాలయమైన సచివాలయాన్నే ఈ అఘాయిత్యానికి వేదికగా మార్చుకోవడం తీవ్ర కలకలం రేపుతోంది.
వివరాల్లోకి వెళితే.. ఎన్టీఆర్ జిల్లాకు చెందిన ఓ యువతి ఏలూరు టూటౌన్ పరిధిలోని తన స్నేహితురాలి ఇంట్లో ఉంటోంది. స్నేహితురాలి కుటుంబ సభ్యులు తిరుపతి వెళ్లిన విషయాన్ని స్థానిక రౌడీ షీటర్లు పులిగడ్డ జగదీశ్ బాబు, లావేటి భవాని కుమార్ పసిగట్టారు. ఇదే అదనుగా భావించి, అర్ధరాత్రి సమయంలో ఆ ఇంటిపై దాడి చేశారు. తలుపులు పగలగొట్టి లోపలికి ప్రవేశించి, యువతిని బలవంతంగా బయటకు లాక్కెళ్లారు.
అనంతరం నిందితుల్లో ఒకడైన జగదీశ్ బాబు, ఆ యువతిని సమీపంలో ఉన్న గ్రామ సచివాలయంలోకి తీసుకెళ్లి అత్యాచారానికి పాల్పడ్డాడు. ఈ విషయం ఎవరికైనా చెబితే చంపేస్తామని బాధితురాలిని తీవ్రంగా బెదిరించారు. బాధితురాలి ఫిర్యాదు మేరకు పోలీసులు నిందితులపై కేసు నమోదు చేసి దర్యాప్తు ప్రారంభించారు. రౌడీ షీటర్లు ఇంతగా బరితెగించి సచివాలయంలోనే అత్యాచారానికి పాల్పడటంపై సర్వత్ర భయాందోళనలు వ్యక్తమవుతున్నాయి.
