అవును బారాబర్ మాది కుటుంబ పాలనే …రాష్ట్ర ప్రజలంతా కేటీఆర్ కుటుంబసభ్యులే …అసెంబ్లీ లో కేటీఆర్
మా కుటుంబం కాబట్టే అందరికి అన్ని ఇస్తున్నాం
రోజుకు మూడు వేషాలు మార్చితే ఉపయోగం ఉండదు
గవర్నర్ ప్రసంగానికి ధన్యవాదాలు తెలిపే తీర్మానంపై చర్చ
నాటి ఉద్యమనాయకుడే నేడు దేశంలో ఉత్తమ పాలకుడని కితాబు
డైలాగులు కొడితే ఉపయోగం లేదన్న కేటీఆర్
అపోహలన్నీ పటాపంచలు చేశామని వెల్లడి
మాది కుటుంబపాలన …కుటుంబపాలన అంటున్నారు … అవును బారాబర్ మాది కుటుంబ పాలనే …రాష్ట్ర ప్రజలంతా కేటీఆర్ కుటుంబసభ్యులే …అసెంబ్లీ లో కేటీఆర్….అందరికి అన్ని ఇస్తున్నాం …ఒక తండ్రిగా , ఒక తాతగా ,ఒక మేనమామగా ప్రజలంతా నావాళ్లు అని భావించి అన్ని చేస్తున్న కేసీఆర్ ది కచ్చితంగా కుటుంబపాలనే అని మంత్రి కేటీఆర్ తనదైన శైలిలో శాశనసభవేదికగా చెప్పారు . తెలంగాణ అసెంబ్లీ సమావేశాలు కొనసాగుతున్నాయి. గవర్నర్ ప్రసంగానికి ధన్యవాదాలు తెలిపే తీర్మానంపై చర్చ సందర్భంగా మంత్రి కేటీఆర్ మాట్లాడుతూ, నాటి ఉద్యమ నాయకుడే నేడు దేశంలోనే ఉత్తమ పాలకుడని అన్ని రకాల సంస్థలు చెబుతున్నాయని సీఎం కేసీఆర్ ను ప్రస్తుతించారు. కేసీఆర్ పాలనే తెలంగాణ రాష్ట్రానికి, రాష్ట్ర ప్రయోజనాలకు శ్రీరామరక్ష అని గర్వంగా చెప్పుకోగలమని అన్నారు.
ఈ ఎనిమిదిన్నరేళ్లలో తెలంగాణకు కరెంటు కష్టం లేదు… తాగునీటి తన్నులాట లేదు, పేకాట క్లబ్బు లేదు, గుడుంబా గబ్బు లేదు, ఇంటి పర్మిషన్ కు ఇబ్బంది లేదు, ఉగ్రవాదుల ఊసు లేదు, బాంబు పేలుళ్ల భయం లేదు, మతఘర్షణల ముచ్చటే లేదు, కర్ఫ్యూల కలకలం అంతకన్నా లేదు, గంగా జమునా తెహజీబ్ కు ఢోకా లేదు, పరిశ్రమలకు పవర్ హాలీడే లేదు, పెట్టుబడిదారులకు పైరవీకారుల బెడద లేదు, ఉపాధి అవకాశాలకు, కష్టించేవాళ్లకు తెలంగాణలో కొదవ లేదు, ప్రభుత్వంలో పైరవీకారులకు అడ్రెస్ లేదు, పథకాల కోసం ఆఫీసులు చుట్టూ తిరగాల్సిన అవసరం లేదు, సుస్తీ చేస్తే ఏమవుతుందో అనే ఆలోచన బస్తీల్లో లేదు, మంచం పట్టిన మన్యం అనే వార్తలు లేవు, పిల్లల చదువులపై తల్లిదండ్రులకు బెంగ లేదు, అభివృద్ధి పనులకు ఆటంకం లేదు, సంక్షేమంలో మన ప్రభుత్వానికి తిరుగులేదు, తెలంగాణ మోడల్ కు ఈ దేశంలో సాటి మరొకటి లేదు…. అందుకే దేశం చూపు తెలంగాణ వైపు, దేశ ప్రజల చూపు కేసీఆర్ నాయకత్వం వైపు ఉంది అంటూ వివరించారు.
“విజన్ ఉండగానే సరిపోదు… చిత్తశుద్ధి ఉండాలి, వాక్ శుద్ధి ఉండాలని కేసీఆర్ చెబుతుంటారు. తదేక దీక్షతో పనిచేస్తే లక్ష్యాలు నెరవేరతాయి తప్ప, ఊకదంపుడు ఉపన్యాసాలు, నోరు, నాలుక ఉన్నాయి కదా అని ఇష్టంవచ్చినట్టు మాట్లాడితే ఉపయోగం ఉండదు. వేష ఆడంబరాలు, రోజుకు మూడు డ్రెస్సులు మార్చడం, డైలాగులు కొట్టడం, వాక్ ఆడంబరాలు… వీటివల్ల ఏమీ ఒరగదు. తెలంగాణ ఏర్పడినప్పుడు నెలకొన్న అపోహలన్నీ పటాపంచలు చేశాం” అని వెల్లడించారు. ఈ సందర్భంగా కేటీఆర్ పల్లె పల్లెనా పల్లేరు మొలిచే పాలమూరులోనా అంటూ సాగే ఓ గేయాన్ని ప్రస్తావించారు.
ఏ ఒక్క వర్గాన్ని విస్మరించకుండా పాలన సాగిస్తున్నామని, తెలంగాణ అభివృద్ధి ఇవాళ దేశంలోనే చర్చనీయాంశంగా మారిందని అన్నారు. ఇవాళ పాలమూరులో 11 లక్షల ఎకరాల్లో పంటలు పండుతున్నాయంటే సంతోషంతో కడుపు నిండిపోయిందని తెలిపారు. ఈ క్రమంలోనే సేతానం ఏడుందిరా తెలంగాణ చేలన్నీ బీళ్లాయరా… అంటూ సాగే గోరటి వెంకన్న పాటను కూడా కేటీఆర్ గుర్తు చేసుకున్నారు.
పురుగుల మందే నీకు పెరుగన్నమైందా అని ఒకప్పుడు తెలంగాణలో రైతుల పరిస్థితిపై కవులు రాసుకున్నారని, కానీ అలాంటి పరిస్థితులన్నీ అధిగమించి, ఇవాళ దేశానికే అన్నం పెట్టే స్థాయికి తెలంగాణ చేరుకుందని వివరించారు.
“కేసీఆర్ పాలనలో తెలంగాణ అద్భుతరీతిలో ముందుకు పోతోంది. అటు గుజరాత్ లో పరిశ్రమలకు పవర్ హాలీడేలు ఇస్తున్నారు… అక్కడ నీటి కొరత ఉంది” అని వివరించారు. ప్రపంచంలోనే అతిపెద్ద లిఫ్ట్ ఇరిగేషన్ ప్రాజెక్టు ఎక్కడ ఉందని గూగుల్ లో కొడితే తెలంగాణలోనే ఉందని సమాధానం వస్తుందని అన్నారు. మోటార్లకు మీటర్లు పెట్టాలని కేంద్రం చెబుతోందని, మీటర్లు పెట్టేది లేదని తేల్చిచెబుతున్నామంటూ కేటీఆర్ తమ ప్రభుత్వ వైఖరిని స్పష్టం చేశారు. కేసీఆర్ ఉన్నంత వరకు మీ పప్పులు ఉడకవు అని హెచ్చరించారు.
అసెంబ్లీ లో కేటీఆర్ అద్భుత ప్రసంగం …
తెలంగాణ బడ్జెట్ సమావేశాల సందర్భంగా గవర్నర్ ప్రసంగంపై చర్చ సందర్భంగా మంత్రి కేటీఆర్ సూటిగా సుత్తి లేకుండా అద్భుత ప్రసంగం చేశారు . ఆయన మాటలను ఏ కె 47 గన్ లోనుంచి బుల్లెట్ల వర్షం కురిసినట్లు దూసుకొని పోయాయి. ఎక్కడ తడబాటుగాని ,పొరపాటుగాని లేకుండానే ప్రతిపక్షాలపై చురకలు వేస్తూనే తన మాటల తూటాలు పేల్చారు . బుల్లెట్ల వర్షం కురిసింది అన్నట్లుగా సాగింది ఆయన ప్రసంగం . స్వపక్ష ,ప్రతిపక్షాలు ఆయన ప్రసంగాన్ని శ్రద్దగా విన్నాయి. ప్రతిపక్షాలపై వేస్తున్న వ్యంగ్యబాణాలు సమయానుకూలంగా ఉండటమే గాక వారిని సైతం నవ్వులు పూయింప జేశాయి. వారికీ వాతలు పెడుతూనే తన ఫ్లో ఎక్కడ తగ్గకుండా ,విషయాన్ని తప్పకుండ ఉపన్యాసాన్ని పరుగులు పెట్టించిన తీరు అందరిని కట్టి పడేసింది . చివరికి స్పీకర్ స్థానంలో ఉన్న పోచారం శ్రీనివాస్ రెడ్డి సైతం కేటీఆర్ ఉపన్యాస శైలిని ముసిముసి నవ్వులతో వినుకుంటు ఆనందించారు .
