పొంగులేటి ఆర్థిక అరాచకాలు , భూకబ్జాలపై సీబీ సిఐడి విచారణ జరపాలి …తాతా మధు డిమాండ్ …
–ఈమేరకు సీఎం కేసీఆర్ ను కలిసి అన్ని ఆధారాలు ఇస్తానని వెల్లడి
–పొంగులేటి నోరు అదుపులో పెట్టుకోకపోతే తగిన గుణపాఠం తప్పదని హెచ్చరిక …
–పార్టీ అభ్యర్థులను ఓడించేందుకు ఎవరెవరికి డబ్బులు ఇచ్చావో ఆధారాలు బయటపెడతామన్న మధు
–ఆయన్ను ఏపార్టీ చేర్చుకునేందుకు సిద్ధంగా లేదని ఎద్దేవా …!
–చీమలపాడు ఘటనపై శవరాజకీయాలు చేయడం తగదని హితవు …
రాజకీయ ఉన్మాది , ఆర్థిక అరాచకవాది , భూకబ్జాదారుడు పొంగులేటి శ్రీనివాస్ రెడ్డి పై సీబీ సిఐడి విచారణ జరపాలని ఎమ్మెల్సీ బీఆర్ యస్ ఖమ్మం జిల్లా అధ్యక్షుడు తాతా మధు డిమాండ్ చేశారు . ఈమేరకు రాష్ట్ర ప్రభుత్వ అధినేత సీఎం కేసీఆర్ ను కలిసి ఆధారాలతో కూడిన పేపర్లు అందజేస్తానని ప్రకటించారు . మంగళవారం ఖమ్మం జిల్లా బీఆర్ యస్ కార్యాలయంలో ఏర్పాటు చేసిన మీడియా సమావేశంలో ఇటీవల పొంగులేటి సీఎం కేసీఆర్ పై చేస్తున్న అనుచిత వ్యాఖ్యలపై తీవ్రంగా మండిపడ్డారు . ఆయన చేసిన భూకబ్జాలు , దందాలు , ఆర్థిక అరాచకాలు , అన్ని ఇన్ని కావని వాటి అన్నింటిపై విచారణ జరగాలని తాను ప్రభుత్వాన్ని కోరుతున్నట్లు తెలిపారు . సీఎం కు సైతం అవినీతి మరక పూయడానికి వివిధ ఛానళ్లలో ఆయన ఇస్తున్న ఇంటర్వూ లద్వారా చెపుతున్న అబద్దాలను ప్రజలు గ్రహిస్తున్నారని అన్నారు . శ్రీనివాస్ రెడ్డి నోరు అదుపులో పెట్టుకోకపోతే తగైనా గుణపాఠం చెపుతామని హెచ్చరించారు . ఎనిమిదిన్నర సంవత్సరాలు పార్టీలో ఉండి అనేక విధాలుగా పార్టీ ద్వారా లబ్దిపొంది పార్టీపై అవాకులు చవాకులు పేలడంపై ఆగ్రహం వ్యక్తం చేశారు . పార్టీ టికెట్ ఇవ్వలేదని చెపుతున్న శ్రీనివాస్ రెడ్డి తనకు ఇంచార్జి ఇచ్చిన మధిర నియోజకవర్గాన్ని ఎందుకు గెలిపించలేకపోయారో సమాధానం చెప్పాలని డిమాండ్ చేశారు . వైరాలో సీఎం కేసీఆర్ బి ఫారం ఇచ్చిన మదన్ లాల్ ను ఎందుకు ఓడించారో చెప్పాలని అన్నారు . జిల్లాలో కొందరిని ఓడించడానికి ఎవరెవరికి ఎలా డబ్బులు ఇచ్చావో ఆధారాలతో సహా బయట పెడతామని అన్నారు . రాజకీయాల్లో కొన్ని విలువలు ఉంటాయి. వాటికి మంటగలిపిన శ్రీనివాస్ రెడ్డి దిగజారి నోటికి ఇష్టం వచ్చినట్లు మాట్లాడటం, పార్టీని సీఎం కేసీఆర్ ను బదనాం చేసే కార్యక్రమాన్ని చేపట్టడం ఎంతవరకు సబబో చెప్పాలని అన్నారు .
ఒక్కసారి ఎంపీగా అదికూడా సిపిఎం అండతో గెలిచిన నీవు ఇంతగా వీర్రా వీగితే రాష్ట్రానికే ముఖ్యమంత్రిగా చేసిన స్వర్గీయ జలగం వెంగళ రావు , ఎంత వీర్రా వీగాలని అన్నారు . అదే విధంగా జిల్లా నుంచి అనేక సార్లు చట్టసభలకు ప్రాతినిధ్యం వహించిన బోడేపూడి వెంకటేశ్వరరావు ,రజబ్ అలీ , మంచికంటి కిషన్ రావు , పువ్వాడ నాగేశ్వరరావు , రామిరెడ్డి వెంకట రెడ్డి లాంటి వారు ఏనాడైనా నాది ,నేను అని అన్నారా…? వీర్రా వీగరా…? అని ప్రశ్నించారు .
చీమలపాడు ఘటన జరగటం దురదృష్టకరం …దాన్ని కూడా రాజకీయానికి వాడుకోవడం ఏమి విజ్ఞత అని అన్నారు . దీనికి తనపైన , ఎంపీ నామ నాగేశ్వరరావు పైన , ఎమ్మెల్యే రాములు నాయక్ పైన ముద్దాయిలుగా కేసులు పెట్టాలని అనడం నీ ఛండాలపు రాజకీయాలకు నిదర్శనమన్నారు . చేతనైతే వారికీ సహాయం చేయి , మేము కూడా వారిని ఆడుకుంటున్నాం . అంతే కానీ శవ రాజకీయాలు చేయవద్దని హితవు పలికారు . అమిత్ షా పాల్గొన్న నావి ముంబై సభలో ఎండదెబ్బకు 13 చనిపోగా , 80 మంది అస్వస్థతకు గురైయ్యారని దానికి అమిత్ షా మీద కేసు పెడతారని ప్రశ్నించారు . అదే విధంగా యాదాద్రి వెళ్లి వస్తున్నా ఏపీ భక్తులు మరణిస్తే సీఎం జగన్ పై కేసులు పెడతారా అని ప్రశ్నించారు .
తన కూతురు పెళ్ళికి సీఎం కేసీఆర్ కు కార్డు ఇచ్చేందుకు ప్రగతి భవనం కు వెళ్ళితే అర్థ గంట కూర్చోబెట్టి కార్డు తీసుకునేటప్పుడు కనీసం ముఖం కూడా చూడలేదని సీఎం పై అబద్దాలు చెప్పటం మానుకోవాలని అన్నారు నీవు , నీ భార్య, నీ వియ్యంకుడు రఘురామా రెడ్డి , మాజీ ఎంపీ సురేందర్ రెడ్డి కలిసి కార్డు ఇవ్వడానికి వెళ్ళితే కూర్చోబెట్టి కాఫీ ఇచ్చి మాట్లాడితే అబద్దాలు చెప్పి గౌరవ ముఖ్యమంత్రిపై అభాండాలు వేయడంపై తాతా మధు ఫైర్ అయ్యారు . అంతే కాకుండా నీ కుమారుడి నిశ్చతార్దానికి , పెళ్ళికి కేసీఆర్ , కేటీఆర్ హాజరైన విజయాన్ని మరిచిపోయావా అంటూ అప్పటి ఫోటోలను మీడియా ప్రతినిధులకు చూపించారు .
ఖమ్మం జిల్లా నుంచి ఒక్క బీఆర్ యస్ సభ్యుడిని కూడా అసెంబ్లీ గేటు తాకనివ్వనని అంటున్నావు ..అసెంబ్లీ గేటు దగ్గర నీవు ఏమైనా గేటి కీపర్ వా …? అంటూ ఎద్దవా జేశారు . రాజకీయ క్రాస్ రోడ్ లో ఉన్న పొంగులేటిని ఏపార్టీ చేర్చుకోవడాని సిద్ధంగా లేదని అందువల్ల మతిభ్రమించి మాట్లాడుతున్నారని వ్యంగ్య బాణాలు వదిలారు ….
మీడియా సమావేశంలో నగర మేయర్ పూనుకొల్లు నీరజ , డీసీఎంఎస్ చైర్మన్ రాయల శేషగిరిరావు , సుడా చైర్మన్ బచ్చు విజయ్ కుమార్ , ఖమ్మం జిల్లా రైతు సమన్వయ అధ్యక్షులు నల్లమల్ల వెంకటేశ్వర్లు , జిల్లా యువజన అధ్యక్షుడు చింత నిప్పు కృష్ణ చైతన్య , నగర పార్టీ అధ్యక్షులు పగడాల నాగరాజు , రూరల్ పార్టీ అధ్యక్షులు బెల్లం వేణు , కార్పొరేటర్ కమ్మర్తపు మురళి , తెలంగాణ ఉద్యమకారులు బొమ్మెర రామ్మూర్తి , ఉప్పల వెంకటరమణ , నరేందర్ సతీష్ తదితరులు పాల్గొన్నారు
