- 2019లో స్వలింగ వివాహాలకు ఆమోదం తెలిపిన తైవాన్
- ఈ తరహా చట్టం కలిగిన ఏకైక ఆసియా దేశంగా గుర్తింపు
- ప్రపంచంలో ఈ తరహా చట్టాన్ని తొలిగా తెచ్చింది నెదర్లాండ్స్
స్వలింగ వివాహాలకు చట్టబద్ధత కల్పించేందుకు భారత సుప్రీంకోర్టు నిరాకరించడంతో.. అసలు ఇలాంటి చట్టం ఎక్కడైనా ఉందా..? అన్న ఆశ్చర్యం కలగకపోదు. ఆసియాలోనే ఒక దేశంలో స్వలింగ జాతీయుల మధ్య వివాహానికి చట్టబద్ధత కలిపించారు. ఆ దేశం తైవాన్. 2019లో స్వలింగ వివాహాలను చట్టప్రకారం గుర్తిస్తున్నట్టు ప్రకటించడం ద్వారా ప్రపంచం దృష్టిని తైవాన్ ఆకర్షించింది. స్వలింగ వివాహాలు ఒక్క తైవాన్ కే పరిమితం అనుకోకండి. ఆఫ్రికా సహా ఎన్నో దేశాల్లో ఈ ఆచారం నడుస్తోంది.
ఒకే లింగానికి చెందిన వారి వివాహాలకు ప్రపంచవ్యాప్తంగా 34 దేశాలు ఇప్పటి వరకు చట్టపరమైన గుర్తింపును కల్పించాయి. ఇలాంటి వివాహాలకు ప్రపంచంలో తొలిగా ఆమోదం తెలిపిన దేశం నెదర్లాండ్స్. 2001లో ఇక్కడ ఆమోదం లభించింది. తాజాగా ఈ వివాహాలకు చట్టబద్ధత కల్పించినది అండోరా. ప్రస్తుత వివాహ చట్టాలు ప్రజల వివాహ స్వేచ్ఛ, సమానత్వ హక్కుకు విరుద్ధంగా ఉన్నాయంటూ తైవాన్ రాజ్యంగపరమైన కోర్టు తీర్పు చెప్పడం ద్వారా దీనికి మార్గం సుగమం చేసింది. చూస్తుంటే.. భవిష్యత్తులో మరిన్ని దేశాలకు ఈ స్వలింగ వివాహ చట్టాలు విస్తరించేలా కనిపిస్తున్నాయి. ప్రకృతి విరుద్ధమైన ఈ బంధానికి మన దేశంలో మంచు లక్ష్మి, సెలీనా జైట్లీ, భూమి పెడ్నేకర్ తదితర ఎంతో మంది సెలబ్రిటీలు సైతం మద్దతు పలుకుతుండడం గమనార్హం.
