ఉగాది రోజున కాచవరం గ్రామస్తులతో డిప్యూటీ సీఎం భట్టి మాటామంతి…
ప్రజలకు అందుతున్న ప్రభుత్వ పథకాలపై ఆరా …
మీ అందరికీ జీరో బిల్లులు వస్తున్నాయా..
రైతు భరోసా డబ్బులు వచ్చాయా
వంట గ్యాస్ సబ్సిడీ డబ్బులు పడుతున్నాయా
ప్రభుత్వ పథకాలు అందుతున్న తీరుతెన్నులు గురించి
కాచవరం గ్రామస్తులతో ముచ్చటించిన రాష్ట్ర ఉప ముఖ్యమంత్రి భట్టి విక్రమార్క
ఉగాది పండుగ నాడు గ్రామంలోని శివాలయంలో ప్రత్యేక పూజలు చేసిన డిప్యూటీ సీఎం భట్టి విక్రమార్క
ప్రజా ప్రభుత్వం అమలు చేస్తున్న సంక్షేమ పథకాలతో లబ్ధి పొందుతున్నామని హర్షం వ్యక్తం చేసిన కాచవరం గ్రామస్తులు
గ్రామానికి వచ్చిన సందర్భంగా హారతులు
పెద్దలతో ఆత్మీయత …పిల్లలతో సరదా ముచ్చట్లు
సంతోషం వ్యక్తం చేసిన గ్రామస్తులు …
“మీ అందరి ఇండ్లకం జీరో బిల్లులు వస్తున్నాయా…? పెద్దయ్య నీకు రైతు భరోసా డబ్బులు పడ్డాయా..? అమ్మ మీకు వంట గ్యాస్ సబ్సిడీ డబ్బులు వస్తున్నాయా? అంటూ ఇందిరమ్మ రాజ్యంలోని ప్రజా ప్రభుత్వం ప్రతిష్టాత్మకంగా అమలు చేస్తున్న సంక్షేమ పథకాలు లబ్ధిదారులకు అందుతున్న తీరుతెన్నుల గురించి” రాష్ట్ర ఉప ముఖ్యమంత్రి భట్టి విక్రమార్క మధిర నియోజకవర్గం ఎర్రుపాలెం మండలం కాచవరం గ్రామస్తులను అడిగి తెలుసుకున్నారు. ఉగాది పండుగను పురస్కరించుకొని శనివారం సాయంత్రం కాచవరం గ్రామంలోని ఓం శ్రీ పార్వతి సమేత అమృత లింగేశ్వర స్వామి వారి దేవాలయంలో శివుడికి ప్రత్యేక పూజలు నిర్వహించిన అనంతరం గ్రామస్తులతో ముచ్చటించారు. ఎన్నికల్లో కాంగ్రెస్ పార్టీ ప్రకటించిన ఆరు గ్యారెంటీల హామీల లో భాగంగా 2024 మార్చి నుంచి గృహజ్యోతి పథకాన్ని రాష్ట్ర ప్రభుత్వం ప్రతిష్టాత్మకంగా అమలు చేస్తున్నది. 200 యూనిట్ల లోపు విద్యుత్తు వాడుతున్న గృహ వినియోగదారులకు జీరో బిల్ వస్తున్నది. వీరికి సంబంధించిన డబ్బులను ప్రతినెల ప్రభుత్వం విద్యుత్ సంస్థలకు చెల్లిస్తున్నది. అయితే ఈ పథకం ద్వారా కాచవరం గ్రామంలో ఎంత మంది లబ్ధి పొందుతున్నారు? విద్యుత్తు సరఫరా ఎలా ఉంది? ఏమైనా ఇబ్బందులు ఉన్నాయా అని గ్రామస్తులను డిప్యూటీ సీఎం భట్టి విక్రమార్క అడిగి తెలుసుకున్నారు. గ్రామంలో 200 వరకు కుటుంబాలు ఉన్నాయని, 90 శాతం మంది అనగా దాదాపు 180 కుటుంబాలు జీరో బిల్లు ద్వారా లబ్ధి పొందుతున్నామని, గత ప్రభుత్వంలో కంటే మన ప్రభుత్వం విద్యుత్తు సరఫరా చాలా నాణ్యతగా ఇస్తున్నదని రైతులు ఆనందంతో చెప్పారు. కాచవరం గ్రామానికి సంబంధించి జీరో బిల్లులు మరియు వ్యవసాయ కనెక్షన్లకు అందిస్తున్న ఉచిత కరెంటుకు సంబంధించిన విద్యుత్తు సబ్సిడీ డబ్బులను లబ్ధిదారుల పక్షాన 31 లక్ష రూపాయలు ప్రభుత్వం విద్యుత్ సంస్థలకు చెల్లించిందని ఏఈ అనూష ఉపముఖ్యమంత్రి కి వివరించారు. అక్కడ ఉన్న రైతులను ఉద్దేశించి రైతు భరోసా డబ్బులు మీ బ్యాంకు ఖాతాల్లో పడ్డాయా అని అడుగగా నాలుగైదు ఎకరాలు ఉన్న రైతులు అందరికీ రైతు భరోసా డబ్బులు బ్యాంకు ఖాతాల్లో పడ్డాయని సమాధానం చెప్పారు. మహాలక్ష్మి పథకం కింద వంటగ్యాసు సిలిండర్ ప్రభుత్వం 500 రూపాయలకే ఇస్తుందని, సబ్సిడీ డబ్బులు మీ బ్యాంకు ఖాతాలో పడుతున్నయా అని మహిళలను ఆరా తీశారు. గ్రామంలో 90 మంది కుటుంబాలకు వంట గ్యాస్ సబ్సిడీ డబ్బులు వచ్చాయని మహిళలు చెప్పారు. పొదుపు సంఘం లో ఉన్న మహిళలకు ఇందిరమ్మ డైరీ పథకంలో సబ్సిడీపై గేదెలను ఇస్తామని చెప్పారు. కాచవరం గ్రామంలో రేషన్ షాపు లేనందున లక్ష్మాపురం గ్రామానికి వెళ్లి తెచ్చుకోవడం ఇబ్బందిగా ఉందని గ్రామంలోనే రేషన్ దుకాణాన్ని ఏర్పాటు చేయాలని గ్రామస్తులు విజ్ఞప్తి చేశారు. అదేవిధంగా ఆర్టీసీ బస్సు ప్రయాణ సౌకర్యాన్ని కల్పించాలని కోరారు. కొంతమంది మహిళలు తమకు ఇల్లు లేవని ఇందిరమ్మ ఇండ్లు ఇప్పించాలని ఉప ముఖ్యమంత్రి కి విజ్ఞప్తి చేయగా, ఇందిరమ్మ ఇండ్ల సర్వే పూర్తి అయ్యిందని గ్రామంలో ఇంటి స్థలం ఉండి ఇల్లు లేనటువంటి వారికి ప్రాధాన్యత క్రమంలో ఇందిరమ్మ ఇండ్లను నిర్మించి ఇస్తామని వెల్లడించారు. ఇందిరమ్మ కమిటీలు పారదర్శకంగా అర్హులైన లబ్ధిదారులను ఎంపిక చేసి జాబితాను పంపించాలని సూచించారు.
“ఎండలకు పాణం బాగుండట్లేదు. నిన్ను చూస్తానో.. చూడనో అనుకున్నా. నెల రోజుల నుంచి నిన్ను చూడాలని ప్రాణం కొట్టుకుంటున్నది. సార్ వస్తే నా ఇంటికి తీసుకురమ్మని మన నాయకులకు చెప్పాను. పండుగ రోజున నన్ను చూడడానికి నా ఇంటికి వచ్చి పలకరించినవ్. నాకు చాలా ఆనందంగా ఉంది అంటూ రాష్ట్ర ఉప ముఖ్యమంత్రి భట్టి విక్రమార్కను ఆలింగనం చేసుకొని కాంగ్రెస్ పార్టీ సీనియర్ నాయకురాలు కేఎస్ నర్సమ్మ భావోద్వేగానికి గురైంది. నరసమ్మ గారు ఎలా ఉన్నారు? బాగున్నావా? ఆరోగ్యం ఎట్లా ఉంది అంటూ ఆప్యాయంగా పలకరించి యోగక్షేమాలు, ఆరోగ్య పరిస్థితి గురించి డిప్యూటీ సీఎం భట్టి విక్రమార్క అడిగి తెలుసుకున్నారు. ఉగాది పండుగ నాడు కాచవరం గ్రామానికి విచ్చేసిన రాష్ట్ర ఉపముఖ్యమంత్రి భట్టి విక్రమార్క గారికి ఎర్రుపాలెం మండల కాంగ్రెస్ శ్రేణులు, గ్రామ ప్రజలు పెద్ద ఎత్తున ఘనంగా స్వాగతం పలికారు మహిళలు మంగళహారతులు పట్టారు.
